Read South Giziga 2KI 22 Bible Online

2KI 22 - South Giziga bible

2KI 22

¹Zoziyas micifi buy madiɗa na, naɓa naŋ ti vi dangafaɗa. A zum buyo vi kukur makir ngaŋ kaˀ a Zeruzaleme. A zilaka mumuŋ naŋ Yedida, zuŋ ngi mbur mazilaka Adaya, mbur Boskat.

²Zoziyasa, a gi i gwat mikaslsla a mihiri ngi Bumbulvuŋ. A sipa jiviɗe heˀ ka ngi dideˀ naŋ Daviti, ko a ngizli avu gwat ngi gi naŋ neˀ le ta.

³Buy zoziyasa, angi vi mukuruˀ nga dangafaɗ ngi zumabuy naŋ na, a slina Safana ng'ar hay ngi Bumbulvuŋ. Safan i mbur naŋ matohoŋ ɗerewol, i mangal ngi Asaliya, dideˀ ngi Mesulam. A slinaŋ a ɓaŋ na:

⁴«A ra ɓa masay Hilkiya, madiɗa na, dala mizli muvuloko ng'ar hay ngi Buymisemuŋ ati misi mijigina mizlingrehey micikilaka avu mizli, jom gar na, kiteka?

⁵Ɓa a vulaka asi haŋ ngi buyɓi ngi slrahay maɗiyaka hiri ngi hay ngi Bumbulvuŋ na, waɗ asi haŋ ngi buyɓi ngi hay ngi Bumbulvuŋhoyo. Kanah na, ɓa taŋ kwana, mizli magam slra ngi ɗiya hiri ngi gwat mihiryahay le avu hay ngi Bumbulvuŋ na, a wurkaka taŋ ti naŋ.

⁶Migi slra tayna i micira dumoy, mikiɗa hayay, mindira hayay, yo ɓa a hiɗikam di mbalay ati ngi cira ɗugur jejekehey, ɓa ngi ɗiya hay ngi Buymisemuŋ.

⁷Amma anja mizli a cufuɗaka dala ngi si haŋ taŋ na ta, asi i mizli miteŋteŋhey ar slra taŋ magaka na»

⁸A dirba nah na, masay Hilkiya, madiɗa, a ɓa Safan, mbur mutoho gwat ngi buyo na: «Ɗerewol Ɓimuɗuva ngi Bumbulvuŋ i luuma le ar hay ngi Bumbulvuŋ!» Akẽh na, Hilkiya a vula ɗerewol tuwa da Safana, a slufaŋ.

⁹A dirba nah na, Safan, mbur mutoho gwat ngi buyo a so slufa ɓi nah da buyo a ɓaŋ ani: «Dala muluma angi hay ngi Bumbulvuŋ, gawla ɗikey a vulaka le asi haŋ ngi buyɓi ngi slrahay maɗiyaka hiri ngi hay ngi Bumbulvuŋ waɗ asi haŋ ngi buyɓi ngi hay ngi Bumbulvuŋhoyo.

¹⁰Akẽh na, Safan, mbur mutoho gwat a slufa ɓi ani da buyo ma, a ɓaŋ: «masay Hilkiya, madiɗa a vuliy ɗerewol anihĩ.» Joˀ Safan a slufa ɗerewol tuwa, a mbuŋ buyo.

¹¹Buy tuwa micina mingiɓi ngir ɗerewol ɓimujuwa cin cin na, a ngira zana ngi vu vuhoyo.

¹²Akẽh a zila ti Hilkiya, Ahikam, mangal ngi Safaŋ, Akbor, mangal ngi Mikaya, Safaŋ, mbur mutoho gwat waɗ da Asaya, mbur ngi si gawla naŋhay, a ɓa t'ani:

¹³Ɓi ngi ɗerewol mulumoko di hana na, ara cufuɗaka Bumbulvuŋ aseˀe vur ya, vur mizli Zudahay gar. Asi mingiɓi hana i ɓi madiɗa, Bumbulvuŋ a zuɓ himaˀ le fõh fõh ar ndra, asi dideˀ ndrahay a jaka ɓi nga naŋ Bumbulvuŋ a hirnga ta, yo a gaka gwata kaɓa mutohoko cek ar ɗerewol hana na ta.»

¹⁴masay Hilkiya, ati Ahikam, Akbor, Safaŋ waɗ Asaya tuwa, a ram ng'avu Hulda, ngwas mijiviɗe. Hulda i ngwas ngi Salum, mbur mijigina zana ngi mezegweley, mangal ngi Tisva, yo i dideˀ meciɗek ngi Haras. Hulda, naŋ a slala nawaya a Zeruzalem. Taŋ miɓakaŋ ɓi ngi buy tuwa, a kiɗ mi na,

¹⁵joˀ Hulda a ɓa taŋ: Bumbulvuŋ, Buymisemuŋ ngi Israyel a ɓi ani: A ra ɓaka mbur mislino kum ng'avi ya vuna ani:

¹⁶Bumbulvuŋ a ɓi na: «I wuɗ i go mendere ng'ar li hana waɗ ng'ar mizli ngi raˀahaya. Mingiɓi ngir ɗerewol buy zuda muslufa hana gar na, i ga muduba.

¹⁷Asi mike na, a pulikiy le fuku, yo a wuram urdihey da kulihey, hã gwat ngi gi taŋ na, a slikiɗiy mevel. Vurˀe, i zuɓ himaˀ le fõh fõh ng'ar taŋ, himaˀ ɗu anta muc mata.

¹⁸Amma, buy Zuda mislino kum nga cufuɗa Bumbulvuŋ na, kisa ɓakaŋ na: ‹Bumbulvuŋ, Buymisemuŋ ngi Israyel a ɓuw ani: Ki cine mingiɓi ngir ɗerewol hana le kuy kuy,

¹⁹ka micina mingiɓi ya miɓa vur li hana waɗ vur mizli ngi raˀahaya cin cin na, li hana a sa tiri i li ngi bonoy, yo i minisa na, a wusuw mevele le, ki hin hirnga a mbuŋ ɗu, ya Bumbulvuŋ. Dar ki ngira zana ɗik ngi vu vuhoyo hã ki tuwuy a mbuŋ ɗu. Naŋ kuy, ya kwana i cinuw di le, i mingiɓi ɗu, ya Bumbulvuŋ.

²⁰Vurˀe, yi sa puluw ka, kisa muc ti mucu, ki ra muc ti zuy. Bonoy, ya masa go di ng'ar li hana na, ko k'anta sa pura keɗ le ta. Dar misliney ara mbiɗaka ɓi nah da buyo.»