Read South Giziga 2KI 23 Bible Online

2KI 23 - South Giziga bible

2KI 23

¹Neˀ si na, buy a slin ɓa ara ɓaka mizli micawwa ngi Zudahay ati ngi Zeruzalemey, ɓa a kusoko ng'avaŋ.

²A dirba nah a jiɗ ng'ar hay ngi Bumbulvuŋ, waɗ mizli ngi Zudahay ati ngi Zeruzalemey gar aseˀeŋ: i masayay, mijiviɗey ati mizli gar, mizlewey ati mizli madiɗahay. Joˀ a ɓi ɓa a slufaka taŋ mingiɓi ngi jumoˀay misi angi ɗerewol mulumaka angi hay ngi Bumbulvuŋ tuwa.

³Buyo a cici deŋ ar li miɗiya viriw a muŋ, a jum ˀay ati Buymisemuŋ daˀ akẽh. I jumoˀay matika ˀay da mbur ɓa a sipa Buymisemuŋ, ɓimujuwa naŋhaya ati ɓi ngi dubun naŋhay waɗ ɓimuɗuva naŋhaya gar na, ɓa mbur a ja taŋ a hirnga ti mevel purla, ti dumvu naŋ wãˀ, waɗ ti ga gwat mingiɓi ngi jumoˀay miɓa mutohoko angi ɗerewol misenna. Mizli gar a cam angi jumoˀay nah.

⁴masay Hilkiya, madiɗa ati masay mislakka ngi seˀeheye waɗ mijigina mizlingreheye, buy a ɗuva taŋ ɓi ani: Gwatay misi a hur hay ngi Bumbulvuŋ migaka taŋ ɓa ngi gi mezegwel ti taŋ a mbuŋ Baˀal , Asera ati gwat ngi muŋhoy gar na, bam ti taŋ avra. A ra wuraka taŋ a duba gala ngi walahay Zeruzalem, ar guva a Kedroŋ, a hilaka fucu taŋ a ram di nga Betel.

⁵Masayay ada, buy Zuda mucufa taŋ ngi wura urdihey ar li miɗingir ɗingir ngir walahay Zudahay ati ngir li ngi ciki Zeruzalemey gar zleˀe na, a susuymo taŋ avra. Yo masay ngi wura urdihey da Baˀal , da pas ati kiya, da dungusoy waɗ da gwat ngi muŋhoy ada ma, a susuymo taŋ gar avra ma.

⁶Ɓamtal miɗiyam di kuli Asera na, buy a ɓi ɓa a bam di tir hay ngi Bumbulvuŋ nga duba gala, ng'ar sozo a Kedroŋ, a zlizliraka a diga, hã a tiram di kaɓa fucu, a hilaka fucu naŋ, ara paka ar zivi ngi mizli ngatarahay.

⁷Viŋhey misi angi hay ngi Bumbulvuŋ, magam madama angi taŋ ngi ɗuva hirnga da kuli, yo misi ngwasay majam zanahay angi taŋ ngi huruk huruk a mbuŋ Asera na, buy a waha taŋ avra.

⁸A dirba nah, buy Zoziyas a slin a zilo masay ngi si ruwuy Zudahaya gar nga ava a Zeruzalem. Li miɗingir ɗingirey, masay tayna mawuram urdihey angi taŋ, zle a Geba hã a Ber-Seba gar na, buy a hirya taŋ. Li miɗingir ɗingirey ngi gi mikulihey misi a ciki mizlingre ngi ci ng'ar walahay Zeruzaleme ati misi a mizlingre ngi ci ngi hay Zozuwe, buy miwi li ngir walahaya, a waha taŋ gar avra. Li miɗingir nah na, da mbur ara ci tir mizlingre ngi walahayana, naɓa naŋ tir haŋ gula.

⁹Masayay migam slra ar li miɗingir ɗingir tayna gar na, a vulaka taŋ jiviɗ ɓa a gam mikuli ar li gi mikuli ar hay ngi Bumbulvuŋ a Zeruzaleme ta, amma a zumam ɗaf manja ˀis ara a wuzla sukum taŋhaya zuy ɓula.

¹⁰Li mazilaka Tofet ar sozo a Hinom na, buy a hirya, ɓa mbur a gi mikuli ti mangal malla ti zuŋ naŋ anga da kuli Moloko mata.

¹¹Pilis miɗiyahay ada, buy Zudahay ɓi micicaka taŋ a mizlingre ngi ci ng'ar hay ngi Bumbulvuŋ, ɓa ngi huruk huruk ti taŋ a mbuŋ kuli pasa. Taŋ gweˀ avu viŋ ngi mbur madiɗa ngi mbuŋ buy, a zilaka Netan- Melek. Buy a susuymo pilis tayna avra, yo a wura mota ngi vurum ngi kuli pasa ma.

¹²Buy Zudahay a ɗiyam li gi mikulihey le zleˀe a hirngi hay ngi Ahas, gbale. Yo mekelemeye, i buy Manase miɗiya taŋ a wazlarayay cuw taŋ angi hay ngi Bumbulvuŋ. Tayna gar na, buy a waha taŋ avra nguɓoc nguɓoc kuɗ kuɗ, dar ara pa murɓuk taŋ ng'ar sozo a Kedroŋ.

¹³Li miɗingir ɗingirey ada magam mikulihey ar taŋ, taŋ hiri taˀtaˀ angi Zeruzaleme, kini tir vay ruwuy muwãˀ ngi ziza vu, buy a hirya taŋ. Li tayna i buy Salomoŋ mindira taŋ zleˀe ɓa ngi huruk huruk ar taŋ a mbuŋ kuli Astarte, kuli ngwas malambaˀ naŋ kuyta ŋwa ˀngi Sidoŋhoy, da Kemos, kuli zil malambaˀ naŋ kuyta wãˀ ngi Moˀapay, waɗ da Milkoŋ, kuli malambaˀnaŋ kuyta ŋwa ˀngi Amoŋhoy.

¹⁴Ɗugur kuli mikaˀ kaˀhaya, a waha taŋ avra, yo ɓamtal miɗiyam taŋ kuliheye gar na, a nguma taŋ kaf kaf avra, a naha li taŋhaya ti tesl ngi mizli.

¹⁵Li gi mikuli ada a Betel, i li miɗingir ngi Zerobaˀam, mangal ngi Nebat miɗiya zleˀe ngi hizigiɗa Israyel ɓa a gam mungra anga na, Zoziyas a waha avra. A waha li gi mikuli nah ati li naŋ miɗingire, a tiri di kaɓa murɓuku, waɗ kuli ɓamtal tuwa, a zlizlira ti vu.

¹⁶Zoziyasa, a mbiɗi hiri pula ˀna, a pur zivihey akẽh ar li miɗingir akẽh. A slin mizli, ara hilakaŋ tesl ngir zivi tayna, a zlizlira taŋ ar li gi mikuli tuwa ɓa a hiryi. Naŋ mihirya li gi mikuli nah na, a gi le kaslsla kaɓa Mingiɓi ngi Buymisemuŋ, mijiviɗ naŋ mitil di mi, miɓa zleˀe.

¹⁷Mijiviɗ ngi Bumbulvuŋ a ɓi ani: «Ya mapur ngi digaha na, i gwat mike?» Mizli ngir walahay a mbiɗakaŋ di: «I zivi ngi mijiviɗ ngi Bumbulvuŋ muso ti Zuda, mitil mi zleˀe ti ɓi ngi gwat migam ani wureˀ ar li gi mikuli ngi Betel na»

¹⁸Dar buy Zoziyas tuwa, a ɓi: «Pulaka mbaka! Anja ko mbur a ja haŋ avu tesl tayna ta!» Naŋ kahana taŋ muwam vu ti tesl ngi mijiviɗ nah ati tesl ngi mijiviɗ muso zleˀe ti Samari.

¹⁹Viŋhey misi ar li miɗingir ɗingirey a Samari, buy Israyeley mindiraka taŋ ngi slikiɗa mevel ngi Buymisemuŋ na, buy Zoziyas a susuymo taŋ avra. A waha taŋ kaɓa naŋ muwaha taŋ a Betel na ya.

²⁰Migi, mikulihey migam slra angi li miɗingir ɗingir tayna gar na, a gi ti taŋ mikuli angi taŋ, a zlum tesl ngi mizli angi taŋ. A dirba nah a mi nga Zeruzalem a muŋ.

²¹Buy a ɓa mizli gar ani: «Gaka muguzlum Pak ngi Bumbulvuŋ, Buymisemuŋ kumo, kaɓa mutohoko ɓi nah angi ɗerewol ngi jumoˀay.»

²²Naŋ kine, zle ti hin ngi migi kiitahay mawaka hirwuy Israyele zleˀe, yo zle i hin ngi zumabuy ngi buy Israyeley ati zumabuy ngi buy Zudahay gar na, a gam muguzlum Pak misi kahana ɗaˀ ta ndiɗaˀ wãˀ.

²³Taŋ migaka muguzlum Pak ngi Buymisemuŋ misi kahana a Zeruzaleme na, naɓa Zoziyas a ɓul di i vi mukuruˀ nga dangafaɗ naŋ angi zuma buyo.

²⁴Ɓi ngi pi daˀas ati hiziga njol, ɓi ngi pura jubuɗ ati ɓi ngi kulihey, gi gwat malambaˀ mukuy tahay gar mizli duniyahay magaka taŋ asi ruwuy Zuda ati Zeruzalem gar ar huruk huruk taŋ na, Zoziyas a susuymo taŋ gar avra ma. A ga kanah na, ɓa ɓimuɗuva mutohoko angi ɗerewol, masay Hilkiya, muluma angi hay ngi Bumbulvuŋ tuwa na, ɓa mizli a jaka a hirnga.

²⁵Buy Zoziyas a mo le ng'avu Buymisemuŋ ti mevel purla, ti membezleŋ ngi vu naŋ wãˀ, yo ti gidaŋ ngi vu naŋ wãˀ, kaslsla kaɓa ɓimuɗuva ngi Moyis mawuɗo. Amma, dumbuŋ angi naŋ na, ko buy mumo ka naŋ na, anta, yo a dirba naŋ kwana, ko a lumam buy misi ka naŋ na ta ma.

²⁶Amma bam ti nah na, Buymisemuŋ mislikiɗ himaˀ ar mizli Zudahay na, naŋ anta pula teˀta na si. Nah gar na, asi gwat buy Manase miga ɓa ngi slikiɗa mevel da Buymisemuŋ.

²⁷Buymisemuŋ a ɓi: «I sa kiraha mizli Zudahay avra kileŋ a mihiri ɗu kaɓa ya mikiraha mizli Israyeley zleˀe na ya. Yo walahay Zeruzalem misenna, ya muwunaˀ ati hay ya miɓi zleˀe, a sa zilaka slimiɗ ɗu anga na, y'anta i wuɗ pura hiri taŋ mata.»

²⁸Is ngi slra ngi Zoziyas miga taŋ ati gwat naŋ miga taŋ gar na, i mutoho taŋ le angi ɗerewol mazilaka Ɗerewol ngi ɓi ngi buy Zudahaya.

²⁹Ti hin ngi zumabuy naŋ na, buy madiɗa ngi Ezipte mazilaka Neko, buy Ezipte, a bi nga kiɗa vu ati buy Asiri a ciki mizaw Efrat. Amma buy Zoziyas a wuɗ ɓa a tikaŋ hiri. Akẽh na, buy madiɗa ngi Ezipte mupuraŋ keɗ si na, a kiɗaŋ vagay a Megido ar taŋ mizliram ngi kiɗa vu mudumbuŋ naŋ vuna si.

³⁰Gawla naŋhay a zuɓaka vagay naŋ baɗ a Megido nga Zeruzalem, ara dikakaŋ ar zivi naŋ. Mizli ngi si ruwuyo a zuɓaka Zoˀakas, mangal ngi Zoziyasa, a pakaŋ mal ngi vula slra, a cakaŋ buy ar li ngi cine.

³¹Zoˀakas micifi buy madiɗa na, naɓa naŋ ti vi kukur cuw nga makir. A zum buy a Zeruzaleme kiya makir. A zilaka mumuŋ naŋ Hamutal, zuŋ ngi Irmeya, mbur Libna.

³²Zoˀakas a gi di i gwat malambaˀ a mihiri ngi Buymisemuŋ, heˀ kaɓa dideˀ naŋhay zleˀe.

³³Buy madiɗa ngi Ezipte Neko aru di, ara gica ar dangay a Libna, anja ɓa a zum buy a Zeruzaleme mata. Akẽh na, Neko a tikaˀay da mizli ngi si ruwuyoyo ɓa sey a wurkakaŋ buutu, ɓiri bara kilo durmuk makir waɗ ɓiri tapasl tapasl kilo kukur makir.

³⁴Dar buy madiɗa ngi Ezipte a cifa Eliyakim, mangal ngi Zoziyasa, i buy ar li ngi cine naŋ Zoziyasa, a mbiɗaŋ slimiɗe Zoˀakiŋ. A zuɓa Zoˀakas, naŋ mijaŋ ar dangay zleˀe tuwa, aru di nga Ezipte, hã a muc a diga.

³⁵Zoˀakiŋe, ɓa a pa ɓiri bara ati ɓiri tapasl tapasl da buy madiɗa ngi Ezipte na, a tika ˀay da mizli ngi si ruwuy naŋhaya, ɓa a wurkaka kaɓa buy madiɗa ngi Ezipte vuna muɗuva taŋ ɓi nah. Mbur ngi si ruwuy naŋ gar na, a wurka ɓiri bara ati ɓiri tapasl tapaslkaɓa taŋ mislakaŋ di le, joˀ Zoˀakim a pa da buy madiɗa ngi Ezipte.

³⁶Zoˀakim micifi buy madiɗa na, naɓa naŋ ti vi kukur cuw nga zlum, a zum buy a Zeruzaleme vi kuruˀ ngaŋ kaˀa. A zilaka mumuŋ naŋ Zebuda, zuŋ ngi Pedaya, mbur Ruma.

³⁷Zoˀakiŋ a gi gwat malambaˀ a mihiri Bumbulvuŋ, heˀ kaɓa dideˀ naŋhay zleˀe na ya.