Read South Giziga 2KI 24 Bible Online

2KI 24 - South Giziga bible

2KI 24

¹Ti hin ngi zumabuy ngi Zoˀakiŋ na, Nebukodonozor, buy madiɗa ngi Babiloŋ, a zla ara zuma hirwuy Zuda. Buy Zoˀakiŋ a hin hirnga a mbuŋ naŋ, hã vi makir. Amma ar kiɗa mi ngi vi mimakir naŋ na, buy Zoˀakiŋ a sli himaˀ a muŋ avu buy Nebukodonozoro.

²Akẽh na, Buymisemuŋ a slino mivi vuhoy tir hirwuyoy wal wal, ti ngay taŋ taˀ, ti ngay taŋ ng'asi ruwuy ngi Zoˀakiŋe: i Babiloŋhoy, Sirihey, Moˀapay ati Amoŋhoy. Buymisemuŋ a slino mivi vu tayna ng'asi ruwuy Zuda ɓa a susuymoko gwat ngi si ruwuyoyo susuyum susuyum leɗeɗ, kaɓa mingiɓi ngi Buymisemuŋ miɓa zleˀe, mubo ti balam mijiviɗ, gawla naŋhay na.

³Hana a gi hĩˀĩ na vur i Buymisemuŋ muɗuva ɓi nah. A wuɗ ɓa a kiraha mizli Zudahaya kileŋ a mihiri naŋ. Asi mike na, Manase a gi mungra le wal wal haɗa.

⁴Yo a kiɗ mizli migam gwat tahay le haɗa, hã kiɗa hirnga a gi le haɗa ar walahay Zeruzaleme. Vurˀe, Buymisemuŋ a ngum pula ɓi nah teˀ ta.

⁵Zoˀakiŋe, ɓi naŋ mekelemey mindiram ati slra naŋ miga taŋ gar na, i mutoho taŋ le angi ɗerewol mazilaka «Ɗerewol ngi ɓi ngi buy Zudahay».

⁶Zoˀakiŋ a muc, ara luuma dideˀ naŋhay a ruwuyo. Akẽh na, mangal naŋ Zoˀakiŋ a zuɓa li naŋ.

⁷Ti di nah na, buy Ezipte anta bi put le tisi ruwuy naŋ mata, asi buy madiɗa ngi Babiloŋ a zuma hirwuy Ezipte le pay pay wãˀ, zle a mizaw Ezipte, hã sesẽŋ a mizaw Efrat.

⁸Zoˀakiŋ micifi buy madiɗa na, naɓa naŋ ti vi kuruˀ nga dangafaɗa. A zum buy a Zeruzaleme vi makir. A zilaka mumuŋ naŋ Nehuseta, zuŋ ngi Elnataŋ, mbur Zeruzalem.

⁹Zoˀakiŋ a gi di i gwat malambaˀ a mihiri ngi Buymisemuŋ, heˀ kaɓa cine naŋ zleˀe.

¹⁰Tin di nah na, soje Babiloŋhoy, gawla ngi Nabukodonozoroy miwaka taŋ na, a ram ɓa ara zliram kiɗa vu ati walahay Zeruzaleme, a ndahaka hirnga ngi walahay Zeruzaleme le ndah.

¹¹Nabukodonozor, buy madiɗa ngi Babiloŋ a ndilo na, naɓa gawla naŋhay ara ndahaka hirnga ngi Zeruzaleme.

¹²Ar nah na, Zoˀakiŋ, buy Zuda ati mumuŋ naŋ, gawla naŋhay, mizli naŋhay madiɗahay ati mizli ngi si mevelehaya, a ram ng'avu buy madiɗa ngi Babiloŋ. Joˀ buy madiɗa ngi Babiloŋ a gica Zoˀakiŋe ar dangay, naɓa Zoˀakiŋ a ɓul di i vi midangafaɗ naŋ angi zuma buyo.

¹³Zlili ngir hay ngi Bumbulvuŋ ati zlili ngi hay buyo Nabukodonozor a hila gar. Yo gazlanga ngi ɓiri tapasl tapaslay misi ar hay ngi Bumbulvuŋ, Salomoŋ, buy Israyel muvuɗa taŋ zleˀe na, a nguɓuco taŋ gar nguɓoc nguɓoc. Hana gar a gi na kaɓa Buymisemuŋ miɓa zleˀe.

¹⁴Mizli Zeruzalemey ati mizli madiɗahay gar, mizli gambarahay gar, mizli misina ɗiya gwatay ati gudihey gar, jom gar na, a gam gwat ngi mizli durmuk kuruˀu. Nabukodonozor a ja taŋ ng'a ruwuy naŋ. Sey mindiram i mizli misi murga ngi si ruwuyoy tewle.

¹⁵Nabukodonozor a ja Zoˀakiŋ, nga Babiloŋ, yo mumuŋ ngi buy ati ngwas naŋhay, mizli ngi si mevelehay gar waɗ mizli madiɗa ngi si ruwuy naŋhay gar na, a ja taŋ baɗ ti Zeruzaleme nga Babiloŋ.

¹⁶Migi vurumoy gwat ngi durmuk tarnaˀ ati mikiɗa hayay waɗ muvuɗa gwataya, gwat ngi durmuk pal, mizli mindilaka le ngi gi vurum gar na, a ja taŋ nga Babiloŋ.

¹⁷A dirba nah na, buy madiɗa ngi Babiloŋ a cifi buy ar li ngi Zoˀakiŋ, i Matatiyas, jamba naŋ, waɗ a mbiɗaŋ slimiɗe, a zilaka Sedesiyas.

¹⁸Sedesiyas micifi buy madiɗa na, naɓa naŋ ti vi kukur cuw ngaŋ kaˀ. A zum buyo vi kuruˀ ngaŋ kaˀ a Zeruzaleme. A zilaka mumuŋ naŋ Hamutal, zuŋ ngi Irmeya, mbur Libna.

¹⁹Sedesiyas a gi di i gwat malambaˀ a mihiri ngi Buymisemuŋ, heˀ kaɓa Zoˀakiŋ zleˀe.

²⁰Ɓi hana a gi kanah gar na, asi Buymisemuŋ miji mevel ar Zeruzalemey ati Zudahaya, hã a zliɗa taŋ kileŋ a mihiri naŋ. Dar Sedesiyas a sli himaˀ avu buy madiɗa ngi Babiloŋ.