Read South Giziga 2KI 25 Bible Online

2KI 25 - South Giziga bible

2KI 25

¹Nabukodonozor, buy madiɗa ngi Babiloŋ a ndilawa ti zigiduw naŋhay a Zeruzaleme. A ndahaka hirnga ngi walahaya ndah, waɗ a ndiram hayay midika hirnga taŋ ti dik gun gun walahaya. Naɓa ti di nah na, buy Sedesiyas a ɓul di i vi mungoltir naŋ angi zuma buyo angi hin mukuruˀ ngi kiya mukuruˀ naŋ.

²Taŋ mipam ndah hirnga ngi walahaya gun na, a zik hã angi vi mukuruˀ ngaŋ kaˀ ngi zumabuy ngi sedesiyas.

³Ti hin mungoltir naŋ ngi kiya mumufaɗ naŋ na, ko gwat ngi zum anta avu mizli ngir walahaya mata, asi may ara bul vu ti gidaŋ ar walahaya.

⁴Hirak ti nah na, naɓa Babiloŋhoy a pulam mifiliw le avu mohol ngi walahaya zleˀe. Duvuɗ miji na, soje Zudahay a bam tir mizlingre maru ng'ar jarne ngi buyo a kilam. Naɓa soje Babiloŋhoyo a pam le gun hirnga ngi walahay vuna ngbaŋ. Mizli mikilamaya a zuɓam jiviɗ maru nga Araba.

⁵Amma soje Babiloŋhoy a sipaka buyo ara jakaŋ is ar sozo a Zeriko. Akẽh na, soje naŋhay gar a zliɗam hirnga mber mber, a pulakaŋ ɗoɗok pal naŋ.

⁶Soje Babiloŋhoy a jaka buyo a ram di ng'avu buy madiɗa ngi Babiloŋ a Ribla, a slakaŋ kiita a diga.

⁷A slaka ˀay ngi ziri ngi Sedesiyasaya daˀ a mihiri naŋ vuna si. Akẽh ma na, buy Nabukodonozor a ɓi ɓa a nduzoko hiriheye, ɓa a juwakaŋ ti celelu zlaɓ hiri cuw, waɗ ɓa a slinam di nga Babiloŋ.

⁸Angi hin mitarnaˀ naŋ, ngi kiya muzlum naŋ, ngi vi mungoltir naŋ, ngi zumabuy ngi Nabukodonozor na, Nebuzaradaŋ, madiɗa ngi soje mijigina lihey, gawla ngi buy madiɗa ngi Babiloŋ, a co sar a Zeruzaleme.

⁹Nebuzaradaŋ, a wura hay ngi Bumbulvuŋ, hay ngi buyo waɗ hay ngir walahay Zeruzalemeye cek. A zla a ɗuva vu da hay ngi mizli madiɗa madiɗahaya a wuram.

¹⁰Soje Babiloŋhoy mikisoko madiɗa ngi soje mijigina liheye, a wahaka mohol mugun hirnga ngi Zeruzaleme.

¹¹A dirba nah, mizli mindiram mineˀ ɗagay muroko ar walahaya, yo mizli mujumoko ng'avu buy madiɗa ngi Babiloŋ tuwa na, Nebuzaradaŋ, a ja taŋ nga Babiloŋ.

¹²Madiɗa ngi soje mijigina liheye, a pul di i mizli misi murgahay neˀ asi ruwuyo ɓa ngi huva gudubun magam di mbaazla ati guva mekelemey.

¹³Ɓamtal ngi ɓiri gaza misi ar hay ngi Bumbulvuŋ, saret ati kisa madiɗa ngi ɓiri gaza, sojehey a wahaka taŋ, a jijiraka ɓiri gaza tayna gar nga Babiloŋ.

¹⁴A hilaka gazlanga ngi ɓiri gazahay mihĩˀĩ magam ti taŋ slra ngi mezegweleye gar: i misirgaɗay, pel ngi hila fucuhoy, sliwiɗey, kopoy.

¹⁵Madiɗa ngi soje mijigina lihey a hila gojogoɗ ngi wura urdihey ati taasa ngi tiɓi pumbus ngi pusloyo na zle gwat muvuɗa taŋ ti ɓiri tapasl tapasl ati misi ti ɓiri gazahay gar si.

¹⁶Ɓamtalay mucuw, kisa madiɗa ati saret Salomoŋ muvuɗa taŋ vur hay ngi Bumbulvuŋ na, dudok ngi ɓiri gaza naŋ muvuɗa taŋ ti naŋ na, ɓa a ji kilo kini na, mbur mawa gu anta.

¹⁷Ɓamtalaya, purla gar na, gil naŋ nga muŋ metir ngoltir. Ɓamtal gar na, mecepek ngi ɓiri gaza tiɗeˀ a hirnga naŋ, tiɗeˀ a hirnga naŋ. Gil taŋhay nga muŋ, metir pal ti reta, pal ti reta. Yo a gaka taŋ wuya ti zuva ngi ɓiri gaza, waɗ mawuyerey gun gun, gun gun cuw taŋ. Ɓamtal mucuwoy vuna taŋ rak rak, a bam vu a bam vu si, yo zuva taŋhaya kwana, kanah ya.

¹⁸Seraya, masay madiɗa ati Sefaniya, masay mislakka ngi seˀe, waɗ mijigina mizlingrey makire, madiɗa ngi soje mijigina liheye, a ja taŋ.

¹⁹Ar walahaya kwana, a ja mbur madiɗa migi slra, yo i madiɗa ngi soje ngi ɓuhoyo ma. Waɗ a ji mizli zlum, mizli ngi si mevel ngi buyoy. A ja mbur mutoho gwat, yo i madiɗa ngi sojehey, muvulakaŋ slra ngi hila mizli ng'ar slra. Waɗ ma na, a ji asi Zudahay, ziri ngir walahay Zeruzaleme kukur merkeɗe.

²⁰Nebuzaradaŋ, madiɗa ngi soje mijigina liheye, a ja taŋ ngi dangay, aru ti taŋ ng'avu buy madiɗa ngi Babiloŋ a Ribla.

²¹Akẽh na, buy madiɗa ngi Babiloŋ kwana, a ɓi ɓa a kiɗaka taŋ. Dar mizli a kiɗaka taŋ, hã a micam a Ribla a diga, ar hirwuy Hamat. Naŋ ka misenna mijaka Zudahay, miram ti taŋ kileŋ avu hirwuy taŋ na.

²²Amma mizli mekelemey a ndiram le angi hirwuy Zuda, i buy Nabukodonozor mupula taŋ zleˀe. Akẽh na, buy vuna a cufa taŋ buy miwi li taŋ i Gedaliya, mangal ngi Ahikam, dideˀ ngi Safaŋ.

²³A dirba nah na, madiɗa ngi soje Zudahay ati mizli taŋhay a cinaka na, buy madiɗa ngi Babiloŋ a cufa Gedaliya le, i buy miwi li. Ti taŋ micinaka kanah na, taŋ jom ati mizli taŋhaya, a soko lumaka Gedaliya a Mispa. Mizli madiɗa tayna musoko na, i ti: Ismayel, mangal ngi Netaniya, Yohanaŋ, mangal ngi Kareya, Seraya, mangal ngi Tanehumet, mbur Netofa, waɗ Yazaniya, mbur Maˀaka.

²⁴Taŋ tuwa waɗ mizli taŋhaya, Gedaliya a ɓa t'ani ti hudum: «Anja ko ki zluwunam ti Babiloŋhoyo neˀ ta, amma, kum cifam asi ruwuyo hinam hirnga a mbuŋ buy madiɗa ngi Babiloŋ si. Kanah na, naɓa kisa ndiram ar mumul»

²⁵Amma angi kiya mitarnaˀ naŋ ngi vi nah na, Ismayel, mangal ngi Netaniya, dideˀ ngi Elisama, i sukwi ngi buyoy, a soko ati mizli kuruˀ nga Mispa. Dar a kiɗaka Gedaliya tuwa vagay, waɗ mizli Zudahay ati Babiloŋhoy misi taŋ bummoˀ a Mispa vuna.

²⁶A dirba nah so na, sukwi ngi mizli Zudahay gar, zle avu mizlewey, sesẽŋ avu mizli madiɗahay, waɗ madiɗa ngi sojeheye gar, a slikiɗam, a ram nga Ezipte, asi ara zluwunam ti Babiloŋhoy.

²⁷Zoˀakiŋ, buy Zuda, hirak ti hin ani na, naɓa a ɓul di i vi mizli ngir makir nga tarnaˀ naŋ, ngi ji taŋ nga Babiloŋ. Angi hin mizli ngir cuw nga tarnaˀ naŋ, ngi kiya mukuruˀ nga cuw naŋ. Evil- Merodak, buy madiɗa ngi Babiloŋ, angi vi naŋ micifi buy madiɗa vuna si na, a ga mezle da Zoˀakiŋ, buy Zuda, waɗ a pulaŋ tir dangaya.

²⁸Evil-Merodak a ɓaŋ ti ˀay mezle, yo a vulaŋ janga ngi buyo fineˀ ngi buy mekelemey misi ati naŋ a Babiloŋ.

²⁹Buy a ɓi ɓa a cukokoŋ zana naŋ ngi dangayaya avra. Joˀ Zoˀakiŋ a zumam ɗafa ndrehhe ar skiɗ misi purla ati buyo hã hin ngi siifa naŋ a ruwuyo.

³⁰Naŋ kine, Zoˀakiŋe, ar hin ngi siifa naŋ gar, hã avu muc naŋ na, buy madiɗa ngi Babiloŋ a vulaŋ gwat ɓa naŋ mangir ti naŋ le gar.