Read South Giziga 2KI 3 Bible Online

2KI 3 - South Giziga bible

2KI 3

¹Zoram, mangal ngi Akap, micifi buy madiɗa Israyel na, naɓa Zozafat, a ɓul di i vi mukuruˀ nga dangafaɗ naŋ angi zumabuy naŋ a Zuda. Zoram a zum buyo vi kuruˀ nga cuw a Samari.

²Zoram a gi gwat malambaˀ a mihiri ngi Buymisemuŋ. Amma antaka cine ati mumuŋ na ta ɓula. Asi mike na, miɗiyaka Baˀal ti ɗugur waɗ a ng'aka kaˀ na, naŋ a susuymo le avra.

³Na kwana, ar gwat ngi gi naŋ na, a sipi sar ngi Zeroboˀam, mangal ngi Nebat mica Israyeley ɓa a gam mungra na. Ko a kirih kirah le ti ra ta.

⁴Mesa, i buy ngi Moˀap. N'ada ti gezleŋ ngi tumuŋhoy. Vur vi gar na, sey a wurka buutu wuruk le da buy Israyele, ziri tumuŋhoy durmuk skat waɗ zlengerekey ti ngwic taŋhaya kine, durmuk skata ma.

⁵Amma, ti di Akap mumuc na, Mesa a sli himaˀ avu buy Israyele.

⁶Akẽh na, buy Zoram a bi, a pura soje Israyeleye gar keɗ keɗ.

⁷A dirba nah, a slin ng'avu Zozafat, buy ngi zuda, a ɓaŋ: «Buy Moˀap a sli himaˀ le avu ya. Ki ngum le ɓa i ram bummoˀ nga kiɗa vu ati hirwuy Moˀapa kwa?» Buy Zuda a mbiɗaŋ di: «I ngum le, i ru, ndr'i mupurlahay si, ka ati ya, mizli ɗikey ati mizli ɗuwoyo, pilis ɗikey ati pilis ɗuwoyo.

⁸Yo a ɓaŋ ma: «I sa cohom tir jiviɗ wanaka?» Zoram a mbiɗaŋ di: «I sa cohom tir jiviɗ ngi wuzlaɓuh mikirɗak kirɗak ngi Edom.»

⁹Buy Israyel ati buy Zuda waɗ buy Edom a zuɓaka jiviɗe. A vam hiipas hiipas, hin tarnaˀ ar li ru. A dirba nah na, yam ngi si da zigiduw anta, ko da gwat misãmihey misi asi taŋ.

¹⁰Akẽh na, buy Israyel a zla a til mi, a ɓi: «Kayya! I Buymisemuŋ muzulo buy mimakir hanayna, ɓa a vula taŋ asi haŋ ngi hirwuy Moˀap.»

¹¹Akẽh na, Zozafat a ɓi: «Mijiviɗ ngi Buymisemuŋ anta aka takwa? Anja ɓa zliv i ra cufuɗaka Buymisemuŋ ava.» Mbur purla a wuzla gawla ngi buy Israyel a mbiɗaŋ di: «Mbur ada aka, i Elize, mangal ngi Safat, i gawla ngi si mevel ngi Eli zleˀe.»

¹²Zozafat a ɓaŋ: «Mbur nah na, a sa ɓa ndra di i mingiɓi Buymisemuŋ miɓaŋ di le cummo gisiŋ.» Buy Israyel ati buy Zozafat waɗ buy Edomo, a ram ng'avu Elize tuwa so.

¹³Mijiviɗ Elize a ɓa buy Israyele: «Mujumo ndra ati ka i mike? Zuwen aru nga cufuɗa ɓi avu mijiviɗ ngi bunukoy malla ngi munukoy.» Buy Israyel a mbiɗaŋ di: «Kay, kanah ta, ndra buyoy mimakir na, i Buymisemuŋ muso ti ndra ng'aka, ɓa a vula ndra asi haŋ ngi hirwuy Moˀap gisiŋ.»

¹⁴Elize a mbiɗa: «Hadam ti slimiɗ ngi Buymisemuŋ, misi gidaŋ wãˀ, ya mahuruk huruk a mbuŋ naŋ na. Da vur Zozafat, buy ngi Zuda ta na, y'anta wulka ɓi ɗike wuluk le ta, yo y'anta ɗuf hiri taˀ le ar ka zleˀe ta!

¹⁵Sikiy ti mbur mikiɗa gujuvur wurenna.» Mbur mikiɗa gujuvuro mira kiɗa gujuvur tuwa na, gidaŋ ngi Buymisemuŋ a po sar ar Elize.

¹⁶Elize tuwa, a zla a ɓi: «Buymisemuŋ a ɓi ani: ‹Anja mizli a lam vigiɗey haɗa ar zlazlar ngi mizaw mingbazlazlaŋ hana.

¹⁷Asi ya Bumbulvuŋ i ɓi na: Kum anta sa puram burkataŋ ta, yo kum anta sa puram hiri ngi vuŋ ta ngbaŋ ni, amma zlazlar misenna a sa nih mbaf ti yam, hã kisa sam yam ati gezleŋ ngi ginew kumoy waɗ gwat misãmi ngi jijira gwat kumoyo.›

¹⁸Hana gar na, i gwat mineˀkini a mihiri ngi Buymisemuŋ. Hã a sa vula Moˀapay vuna asi haŋ kumo ma kini.

¹⁹Walahay muguno hirnga taŋhaya le gun gun ti mohol ati walahay mupuɗaw puɗaway gar na, kisa wahaka taŋ avra. Widis miyihey gar na, kisa ngumaka taŋ avra. Miviɗiviɗi ngi yamay gar na, kisa dikaka taŋ ti muyuŋ. Li muhuvahay le gar na, kisa hizigam ɗuguroy ng'ar taŋ, kisa hiryaka taŋ.»

²⁰Put ngi li naŋ muwun, prik prik, hirak ti ler ngi gi mikuli da Buymisemuŋ na, keɗ na, yam ara ɓulo tir hirwuy Edom, hã a naha liheye gar mbaf mbaf.

²¹Mizli Moˀapay gar a cinaka le, buyoy mimakir musoko na, ɓa ngi gi vurum ti taŋ. Moˀapaya kwana, mizli, vi taŋ mindila le ngi jijira gwat ngi vurum gu gar na, a kusoko taŋ, dar a paka taŋ ar maakway.

²²Ngi miprik prike, soje Moˀapay a puɗukam tir hinje, yo laway ngi pas ara wucuɗ ar yama. Moˀapaya, taŋ mapuraka yam mikileŋ a mbuŋ taŋ tuwa na, a pur kaɓa pumbusu.

²³Joˀ Moˀapay tuwa, a wudam, a ɓam: «Ngi diga na i pumbusu! Ko mbri na, buyoy ati soje taŋhay na, a kiɗam vu le ti maslalamay ar wala taŋ tehhe a muŋ. Moˀapay, wurenna, slikiɗukum, i ra hilaka gwat taŋhaya so!»

²⁴Yo ti taŋ mindilam gweˀ ng'ar li pi sar ngi Israyeley na, soje Israyeley a slikiɗam ti taŋ badam, a kiɗaka Moˀapaya, dar a kilam a mbuŋ Israyele mber mber. Israyeley a sipaka taŋ, hã kulaˀ a Moˀap, a kiɗaka taŋ.

²⁵A wahaka taŋ walahayaya, mbur gar na, a hizik ɗugur ng'ar li taŋ muhuvahaya gar, hã guvahay i ɗugur pal naŋ. A dikaka miviɗiviɗi ngi yamaya gar ti muyuŋ. Widis miyi miyihey gar na, a ngumaka taŋ avra. Sey mindir manja ji haŋ ava na, i walahay Kir- Heres pal naŋ, amma soje misi ti ŋvehŋvehluhoy a soko ndahaka ndah, a kiɗaka taŋ.

²⁶Buy Moˀap a pura na, vurum nah a funa gidaŋ le, a cici ava gu mata. Akẽh na, a hil mizli mizilehey skat skat tarnaˀ, jom ng'avu naŋ vuna, i mizli zliv mindilaka le gu ngi jijira gwat ngi vurumoyo, ɓa a ngiram jiviɗ ng'avu Buy Siri, amma a ɓusaka gu ta.

²⁷Akẽh ma na, buy Moˀap a ɓi ɓa a sakaŋ ti mangal naŋ modogom, masa zum buy ar li naŋ zleˀe na. Joˀ a gi di mikuli mizlam zlam wãˀ a ciki moholo. Mzli haɗi a wuzla Israyeley mupuraka kanah na, a ga taŋ kuyta wãˀ. Dar Israyeley a kiraham kileŋ avu buy Moˀap tuwa, a mam ng'asi ruwuy taŋ.