Read South Giziga 2KI 4 Bible Online

2KI 4 - South Giziga bible

2KI 4

¹Ngi hin numuŋ ada na, ngwas wudiga a so ng'avu Elize. Zil naŋ zleˀe, naŋ ar jum ngi mijiviɗey. A tumbulo Elize, a ɓaŋ: «Zil ɗu, gawla ɗik a muc le. Ki si na le, zil ɗu zleˀe na, i mbur mazluwun ti Buymisemuŋ. Ani so na, mbur ada, i dindilam dala le ava zleˀe, a so le, a wuɗ ɓa a hila ziri ɗu mizilehey mucuw na, ɓa a tiri taŋ bekehey.»

²Elize a mbiɗaŋ di: «Zliv yi guw gwat mi ani ska? Ka ti gwat mihey a hayaka, inga ɓiy di?» Ngwas wudiga a mbiɗaŋ di: «Ya ngwas migi slra ɗike, y'anta ti gwat neˀ le a haya ta, sey mal ngi puy mindir neˀ ar gojogoɗo tewle.»

³Dar Elize a ɓaŋ: «Aru, ɓa ki didiɗ magayakay munjoŋ njoŋ kine avu midigwi ɗikey gar. Wãˀ naŋ na, ka didiɗ magayakay haɗa si.

⁴A dirba nah na, kisa ci nga viŋ ati ziri ɗik mizilehey mucuw tuwa. Gicaka miviŋ giceˀ ar kumo, yo kisa pa mala ng'ar magayakaya. Da magayak minih le gar na, kiraha nah taˀ murvay.»

⁵Ngwas tuwa, a bi, a ru, ara ga kaɓa Elize miɓaŋ di tuwa. A gica miviŋ giceˀ ar taŋ ati ziri naŋ mizilehey mucuwo. Ziriy ara tilakaŋ magayakaya, naŋ kwana ara naha taŋ ti mala cici.

⁶Magayakay a naham le gar muduba, a ɓa mangala: «Tiliy magayak mekelem ma.» Mangal a mbiɗaŋ di: «Magayak anta mata.» Dar mal a cici, anta po mata.

⁷Ngwas tuwa, ara sipa ɓi nah da mijiviɗ ngi Bumbulvuŋ. Mijiviɗ a mbiɗaŋ di: «Aru, ara hiɗika mal nah avra, ɓa ki wurka duvus ɗike so. Yo mindir is naŋ kwana, kisa ngiram di ati ziri ɗikeye so.»

⁸Ngi pas mekelem ada ma na, Elize ara cuh tir walahay Sunem. Ngwas ada a diga, i ngwas misi zlili, a hurdum, anja ɓa Elize ara zum ɗaf a hay naŋ. Vurˀe, tapas Elize mira cuh gar na, aru ndol le a zuma ɗaf a hay ngwas nah.

⁹Ngwas nah tuwa, a ɓa zil naŋ: «Mbur nah maso ndrehhe a hay ndra na, i si na le i mijiviɗ ngi Bumbulvuŋ.

¹⁰Zuwen i ndiram viŋ meciɗek jirngasl a hirngi hay ndra na, waɗ i ciyakaŋ arngawo cay angaŋ, tabul ati janga naŋ waɗ ti lampe taˀ ar tabulo. Tapas naŋ misa so le a hay ndra gar na, a sa hin anga.»

¹¹Ngi pas numuŋ, Elize a so hay taŋ ma, a jiɗ ng'ar hay mijirngasl ngi hirngi hay taŋ tuwa, a hin anga.

¹²Elize a ɓa gawla naŋ Gehazi, ɓa a zilaŋ mumuŋ ngi haya. Gehazi a zilaŋ di, joˀ ngwas tuwa, a so deŋ a mbuŋ naŋ.

¹³Elize a ɓa gawla naŋ Gehazi ɓa a ɓa ngwas na: «A cik vu le haɗi ngir ngir vur ndra. Ani i gakaŋ gwat mi ani ka? Zuwen i kiɗaka slir naŋ avu buy malla avu madiɗa ngi sojehey kwa mbrike?» Ngwas tuwa, a mbiɗaŋ di ani: «Kay! Mbak si, ya muaka na, ya zuy zuy a wuzla mizli ɗuwoyo ko gwat mikiciy anta.»

¹⁴Dar Elize a mbiɗa da gawla naŋ Gehazi: «Na i gakaŋ mi ska?» Gehazi a mbiɗaŋ di: «ˀEyˀehe! Ani naŋ anta ti zuŋ ta ɓula, yo zil naŋ kwana, a gi gal le.»

¹⁵Elize a ɓaŋ: «Inga zilo di» Gehazi a zilo di, waɗ a so deŋ ar li ɗuva sar ngi ci nga viŋ.

¹⁶Elize a ɓaŋ: «Didirba, li kahana na, ka ti mangal kaw avu haŋ.» Ngwas a mbiɗaŋ di: «Kay! Kanah ta, ka ki mijiviɗ ngi Bumbulvuŋ ma na, a zlir ki gi slir da ngwas beke ɗike ta.»

¹⁷Amma ngwas tuwa, a gi hur. Ngi vi mekelem naŋ tuwa na, a yi mangal mizile. A gi le kaslsla kaɓa Elize miɓaŋ di tuwa.

¹⁸Mangal ara gil. Ngi pas numuŋ ada na, ara luuma cine ar li (gi slra) ar guva, naŋ ati munjiko daway.

¹⁹Neˀ na, mangal a zla tuwuy, a ɓi: «Hirnga ɗu! Hirnga ɗu! Cine a ɓa gawla naŋ, ɓa a zuɓa, aru di da mumuŋ.

²⁰Gawla ngi buy ngi hay tuwa, a zuɓa, aru di da mumuŋ. Mangala naŋ da tuppo ar sar ngi mumuŋ, hã a ndila wuzla papas, a dirba nah, a mucu.

²¹Ar nah na, ngwas tuwa, a jiɗ di, ara hina tup ar arngawo ngi mijiviɗ ngi Bumbulvuŋ tuwa. A gica miviŋ giceˀ, dar a bi put.

²²A zilo zile, a ɓaŋ: «Ambuh takwa! Inga vuliy gawla ɗik purla waɗ madiya zungu. I wuɗ ɓa i kil kutum ng'avu mijiviɗ ngi Bumbulvuŋ na, ɓa i mawa.»

²³Zil naŋ a cufuɗaŋ: «Ki wuɗ ki ru ngi hay naŋ dana vur mike? Hana i kiya ngi muguzlum ta, yo i hin ngi sabat ta ma.» A mbiɗa da zile: «Anja didak a muɗuw ta.»

²⁴Ngwas tuwa, a juwa zungu, a ɓa gawla naŋ: «Akum, kisiy takwa! Ko ki ra cici ti ya a jiviɗe ta, sey da ya muɓuw le far.»

²⁵Aru, ara ndil avu mijiviɗ ngi Bumbulvuŋ a muwã Karmel. Mijiviɗe mupuro di zle kileŋ keɗ si na, a ɓa gawla naŋ Gehazi: «Pura, ngi diga na, i ngwas Sunem tuwa.

²⁶Kil, ara ji di hirnga, cufuɗaŋ: Naŋ zuy zuy aya? Zil naŋ ati mangal tuwa, taŋ zuy zuy kwa?» Gehazi mucufuɗaŋ na, ngwas a mbiɗaŋ di: «Ndra zuy zuy, ko ɓi anta.»

²⁷Ti naŋ mindil ndil a ciki Elize a muwã tuwa na, a diɗ asi sara. Gehazi a kirih, ɓa a paŋ haŋ ng'avra zleˀe, amma mijiviɗ ngi Bumbulvuŋ a ɓaŋ: «Pulaŋ mbaka, asi naŋ ti tuwuy a hiri, amma Buymisemuŋ a ɗumo ɓi nah le avu ya, a fiy ɓi nah feˀ le ta.»

²⁸Dar ngwas a ɓa Elize: «Buy ɗu, i cufuɗ mangal le avu ka zleˀe kwa? Gwat ngi njaha hiri aseˀe ngi giy gilaw na, anja ki vuliy di ta na, yi ɓuw le kanah takwa?»

²⁹Elize a ɓa gawla naŋ Gehazi: «Juw vu, zuɓa ganday ɗu ngi mijiviɗ na ahaŋ, ɓa ki ru nga Sunem. Da ki ji hirnga le ti mbur na, ki jaŋ haŋ ta, yo da mbur a juw haŋ le kwana, ki mbiɗaŋ di ta. Daka mindil le a diga na, kisa duko ganday ɗu na duk da mangala a midibiɗi.»

³⁰Akẽh na, mumuŋ ngi mangal a ɓa Elize: «Hadam ti slimiɗ ngi Buymisemuŋ misi ti siifa, waɗ ti ka hirnga ɗik vuna misi ti siifa na ma, da ki ru ta na, y'anta i ru ta!» Dar Elize a slikiɗ, a sipaŋ.

³¹Gehazi a ndil dumbuŋ angi taŋ. A duko gandaya duk a midibiɗ mangala, ɓa a wus malla ɓa a musuwun na, anta si. Gehazi a mo nga ji hirnga ti Elize, a faŋ ɓi nah: «Ko mangal a mo ti siifa ta.»

³²Ti Elize mindil a haya, keɗ na, mangal a muc le, ɓa ˀar arngawo naŋ.

³³Elize a ci nga viŋ, waɗ a gica miviŋ giceˀ ar taŋ ati vagay ngi mangala.

³⁴A dirba nah na, a hin huruk ar mangala. Aru ti mi naŋ duk avu mi ngi mangala, waɗ hiri sek ar hiri ngi mangala, yo haŋhaya ar haŋ ngi mangalaya. Hã naŋ da hurukko ar mangala, joˀ vu a ji ciɓak avu vu ngi mangala.

³⁵Elize a pi sar ngi hay, dar a liˀi, aru zok aka zok aka. Akẽh na, a jiɗ nga muŋ ma, a huruk huruk ar mangala. Ar nah na, mangal tuwa, a gi gwal waracciyah, waracciyah is tarnaˀ, a wuna hiri ngbay.

³⁶Elize a zila Gehazi, a ɓaŋ: «A ra zilo mumuŋ ngi mangal na.» Gehazi a pi sar, ara zilo di. Mumuŋ ngi mangala mindilo na, Elize a ɓaŋ: «Sawa, zuɓa mangala!»

³⁷Ngwas tuwa, a kirahawa, a diɗ waɗ huruk a mbuŋ mijiviɗ Elize. A dirba nah, a zuɓa mangal naŋ, a bi di so.

³⁸Elize a mi le nga Gilgala a muŋ. Ti di nah na, may a bul vu le ciɓak kuyta wãˀ asi ruwuyo. Ngi pas numuŋ, jum ngi ziri ngi mijiviɗey a cikilam le a ciki Elize. Akẽh na, Elize a ɓa gawla naŋ Gehazi: «Ɗuv misirgaɗ madiɗa ar vu, ɓa ki da lar ngi sliɓi ti sliɓi da ziri ngi mijiviɗey na.»

³⁹Akẽh na, mbur purla a wuzla jum ngi ziri ngi mijiviɗey a bi nga duba gala, nga ngilo lar. Adiga, a lum guva ngi gudubun lambaˀ si. A lum sukwi ngi tatiyak ada ar guva tuwa, dar a ngilo di mbaf ar zana naŋ. Naŋ mindilo a haya na, a wursluka wurslak wurslak ng'ar misirgaɗ, lar ngi sliɓi ti sliɓi ma di ara tuwa. Ko mbur misina i gwat kini na, anta.

⁴⁰A vulaka lar tuwa da mizli, taŋ mititilaka titileˀ titileˀ si na, a zlaka widi cǝruw cǝruw: «Mijiviɗ ngi Bumbulvuŋ: Slalak ada ar lara, slalak ada ar lara!» Ko a sliɓaka gu mata.

⁴¹Akẽh na, Elize a ɓi, ɓa a sakaŋ ti hapa. Waɗ a pi hapa tuwa sek ng'ar lara, a ɓa gawla naŋ: «Nduɓa da mizli, ɓa a sliɓaka muduba so.» Ko gwat malambaˀ makiɗ vu anta ar misirgaɗa mata.

⁴²Hirak ti di nah vuna ma na, mbur a ndilawa baɗ ti Baˀal-Salisa. A so ti gwat ngi zumoy a haŋ da mijiviɗ ngi Bumbulvuŋ: ɗaf ngi daw giziŋ kukur cuw, waɗ alkamari nawaya kine aruŋ buhu pal ma. Elize a ɓa gawla naŋ: «Wunuka da mizli, ɓa a zumakaŋ.»

⁴³Amma, gawla ngi Elize a mbiɗaŋ di: «Ɓa i wunka gwat hana da mizli skat, hã a ndila taŋ mbri mbrike gawlay?» Elize a mbiɗaŋ di: «Yi ɓuw na, wunka da mizli, ɓa a zumaka kini? Asi Buymisemuŋ a ɓi na: Mbur gar a sa zum, hã kwacay ndaŋ, amma a sa ndir na si.»

⁴⁴Dar gawla ngi Elize a wunka ɗaf tuwa da mizli, a zumam, hã is naŋ a ndir le, kaɓa mingiɓi ngi Buymisemuŋ miɓa.