Read South Giziga 2KI 5 Bible Online

2KI 5 - South Giziga bible

2KI 5

¹Naˀaman i madiɗa ngi soje ngi buy Sirihey. Buy naŋ a wuɗaŋ haɗa teˀe, asi Buymisemuŋ miga ɓa Sirihey a lumam bugawla na, mbele naŋ. Na so na, mbur bugawla nah na, i misi kukula.

²Zleˀe ada na, Sirihey a bam vurum ng'ar hirwuy Israyel, a joko zuŋ mongoso le njalla ahaŋ. Zuŋ nah a gi slra ngi ngwas ngi Naˀaman vuna.

³Ngi pas numuŋ, zuŋ Israyel tuwa, a ɓa buy naŋ ngwasa: «Eyˀehe! Da buy ɗu na, zliv aru zleˀe gu ng'avu mijiviɗ ngi Bumbulvuŋ ada a Samari na! Kukula naŋ na, anja ani a ɗiyaŋ gu takwa.»

⁴Naˀaman micina ɓi nah na, ara mbiɗa ɓi nah da buyo: «Zuŋ Israyel mujoko di ar vurum tuwa na, a ɓi ani kahana kahana.»

⁵Akẽh na, buy Siri a ɓaŋ: «Naŋ kuy! Na, ya ani tuhuw letir toh toh ahaŋ, ɓa ki zuɓa jiviɗ, ki ra vula da buyo.» Akẽh na, Naˀaman tuwa aru so. A hil ɓiri bara, a gi gwat ngi kilo skat makir ati ɓiri tapasl tapasl kilo kukur merkeɗe waɗ zana ngi ki ng'ar muguzlumoy kuruˀu, dar aru ti taŋ ahaŋ.

⁶Naˀaman mindil a Samari na, a vula letire da buy Israyele. Angi letir vuna, buy Siri a ɓi ani: «Da letir misenna a ndiluw le na, i wuɗ ɓa ki sina, Naˀaman, gawla ɗu, ya mislinaŋ ti letir hana, ɓa a ruw di na, i misi kukula, anja ɓa ki ɗiyaŋ takwa.»

⁷Buyo naŋ muslufa letire slaf slaf na, a ngira zana naŋ ngi vu vuhoyo a ɓi: «Maga ɓa mbur a muc malla ɓa mbur andir ti siifa na, i Bumbulvuŋ ta na, i ya kwa? Purakaˀayɗi? Buy Siri a slino mbur misi kukula ng'avi ya, ɓa i ɗiyaŋ na mbri mbrike? Hana i jigina mi avu mbur takwa?»

⁸Elize, mijiviɗ ngi Bumbulvuŋ micina, buy Israyel a ngira zana naŋ ngi vu vuhoyo le na, a slin ɓa ara ɓakaŋ: «Ka mingira zana ɗikey na, vur mike? Anja Naˀaman vuna a so lumiy, a sa sina, dambalaka mijiviɗ ngi Bumbulvuŋ ada asi ruwuy Israyele.»

⁹Dar Naˀaman a so ti mota ngi pilis naŋ ati pilis naŋhaya, a kutuko Elize a mizlingre.

¹⁰Elize a slino mbur ng'avaŋ, a ɓaŋ: «Aru, ɓa ki ra ci jugoɓ jugoɓ is tarnaˀar yam a mizaw Zurdeŋ. A dirba nah, kisa mbul, yo kisa ɗiyi.»

¹¹Naˀaman a ji mevel, aru bal ti ɓi: «Yi ɓi zleˀe, ko mbri na, mijiviɗ a sa bo deŋ avu ya, a sa zila slimiɗ ngi Bumbulvuŋ Buymisemuŋ, naŋ na, yo a saka haŋ ɓaˀa ɓaˀa ar li majiy majiy vuna, yo a sa ɗiyiy avu kukula ɗu kwani.

¹²Na zle, mizaw ngi Damasay, Albana ati Parpara, taŋ puɗaw puɗaw fineˀ mizaw ngi si ruwuy Israyeley vuna gar takwa? Zliv i ci angi taŋ jugoɓ jugoɓo, ɓa i ɗiyi takwa?» Naˀaman, mamar nga dirba, ara cuh le ti ji mevel.

¹³Amma gawla naŋhay a kirohoko ng'avaŋ, a ɓakaŋ: «Kumani, mijiviɗ vuna, da a ɓuw zleˀe ngi gi gwat mutuwaˀ na, kisa ga mata kwa? Na, vur naŋ muɓuw: ‹Bun ɓa kisa ɗiyi na, gwat mutuwaˀ anga i mike?›»

¹⁴Akẽh na, Naˀaman tuwa, a pi sar nga mizaw Zurdeŋ so, waɗ a ci jugoɓ jugoɓ is tarnaˀ, kaɓa mijiviɗ ngi Bumbulvuŋ miɓaŋ tuwa. Garak ngi dumvu naŋ a tiri kaɓa ngi zuŋ meciɗeke. Naˀaman a ɗiyi le.

¹⁵Neˀ si na, a moko ati mizli ngi seˀeheye ng'avu mijiviɗ ngi Bumbulvuŋ. A ci, ara cici deŋ a mbuŋ naŋ, a ɓaŋ: «Wurenna, i si na le, a si ruwuy gar na, Bumbulvuŋ mekelem anta, sey ar hirwuy Israyel tewle. Ambuh, gwat ya gawla ɗik mavuluw di hana na, inga tiɓa takwa.»

¹⁶Elize a mbiɗaŋ di: «Hadam ti slimiɗ ngi Buymisemuŋ misi ti siifa, ya ma gi slra naŋ na, y'anta tiɓi gwat ko neˀ ta!» Naˀaman a hurdum, anja ɓa a tiɓa, amma Elize a ngum ta.

¹⁷Naˀaman a ɓaŋ: «Ani k'anta ngum tiɓa gwat ya mavuluw di hana ta so, na vuliy jiviɗ ɓa i hil muyuŋ ngi si hirwuy ɗike neˀ, zungu pilisey cuw. Asi mike na, ya gawla ɗike, mikuli mizlam zlam wãˀ ati mikuli ngi vula zuy na, ya ˀnta sa ga da kulihey mata, sey da Buymisemuŋ pal naŋ.

¹⁸Na so na, gwat ya gawla ɗik ma ga ani na, anja Buymisemuŋ a pula ɓi nah avra takwa: Kumani ɗu, buy Siri, ti naŋ mira ci ng'ar hay ngi kuli naŋ Rimoŋ, ɓa a huruk huruk a mbuŋ naŋ na, sey ya kwana, yi huruk huruk a ruwuy aya, ɓa buy a huruk huruk ar haŋ ɗu. Da ya misa huruk huruk le ar hay ngi kuli Rimoŋ na, ya gawla ɗike, gwat ya ma ga nah na, anja Buymisemuŋ a pula ɓi nah avra.»

¹⁹Elize a mbiɗaŋ di: «Ka ru zuy!» Joˀ Naˀaman a ru. Naˀaman a cuh, a pula Elize le zar neˀe.

²⁰Elize, mijiviɗ ngi Bumbulvuŋ, gawla naŋ Gehazi a ɓi ti kwacay naŋ: «Ani buy ɗu, gwatay, Naˀaman, mbur Siri misaŋ taŋ na, a pulaŋ taŋ, a ngum tiɓa taŋ ta, kite a ɗiyaŋ le. Na ya na, hadam ti slimiɗ ngi Buymisemuŋ misi ti siifa, yi kil i sipaŋ ɓa i ra tuɓo gwat neˀe ava.»

²¹Dar Gehazi a sipa Naˀaman. Naˀaman mupuro di, naŋ makilo kileŋ aseˀe tuwa na, a posar cak kutum tir mota ngi pilis naŋ, ɓa ara ji di hirnga. Jo ˀa cufuɗaŋ: «Mbrike, ki kilo ar jam takwa?»

²²Gehazi a mbiɗaŋ di: «Jam, ko ɓi anta! Mislino ya i buy ɗu ng'avu ka, ɓa i ɓuw na: gawlahay cuw a wuzla jum ngi ziri mijiviɗey a ndiloko ani wurenna ti ruwuy vay muwã Efrayim, ambuh vuliy avu ɓiri barahay na kilo kukur makir waɗ zana hirngahay cuw, ɓa i vula taŋ di takwa kini.»

²³Naˀaman a ɓaŋ: «Zuwen hil kilo kukur merkeɗ so.» A hurdum anja ɓa a hil kanah. A paŋ ɓiri baraˀahaya ng'ar gabalay cuw, hirzlik hirzlik mi taŋhaya, waɗ zana hirngahay cuw tuwa. A vula taŋ da gawla naŋhay cuw ɓa a jijiraka taŋ a mbuŋ Gehazi.

²⁴Ti taŋ mindilam a Ofel na, Gehazi a tiɓa gabalaya tisi haŋ ngi gawlahay tuwa, a pa taŋ ngi hay naŋ, a mbiɗa taŋ mi, a mam a muŋ.

²⁵A dirba nah na, Gehazi a mi nga mbuŋ buy naŋ Elize. Elize a cufuɗaŋ: «Gehazi, ki ro zleˀe a maka?» Gehazi a mbiɗaŋ di: «Ya gawla ɗike, ko yi zuɓ sar paɗ le ng'ar li ta.»

²⁶Elize a mbiɗaŋ di: «Ti Gehazi mupo sar cak kutum tir mota ngi pilis naŋ ngi so ji ti ka hirnga na, ki wa na, ˀUf ɗu naŋ anta avu ka takwa? Gwatay misi anihĩ: ɓiri bara, zanahay, yi ngi tutumbur, yi ngi gudubun, tumuŋ ati slahay, beke mizile ati mongosohoy gar na, hana i hin ɓa ki tiɓa taŋ zleˀe kwa?

²⁷Asi ka miga gwat hana na, sey kukula ngi Naˀaman na a tuɓuw, yo a tiɓa dideˀ ɗikeye gar hã ngi sete.» Ɓa hã Gehazi misa pula Elize tikeˀe na, naɓa a ngil kukula le si, a tiri babara ndazl kaɓa yam.