Read South Giziga 2KI 6 Bible Online

2KI 6 - South Giziga bible

2KI 6

¹Ngi pas numuŋ na, jum ngi mijiviɗey a ɓaka Elize: «Li ndra macifam anga a mbuŋ ɗik na, a kic le haɗa wãˀ avu ndra.

²Pula ndra jiviɗ ɓa i ram sesẽŋ a mizaw Zurdeŋ, ɓa mbur gar ar wala ndra a so ti mbal pal pal, ɓa i ɗiyam li ngi cifi aka.» Elize a mbiɗa taŋ di: «A ram!»

³Mbur purla a wuzla mijiviɗey tuwa, a ɓaŋ: «Buy, da ki ngum na, so asi ndra.» Elize a mbiɗaŋ di: «I ngum le, i ra ru.»

⁴Dar Elize tuwa, aru asi taŋ so. A ndilam a mi mizaw Zurdeŋ, ara ngumam dumo.

⁵Mbur purla asi taŋ, naŋ mira nguma dum tuwa na, zlimbe mepeleleŋ naŋ a cuk tivi lafa, a diɗ ng'ar yam. Dar buy naŋ a widi: «Ayyah! kumani ɗu, i didiɗo zlimbe vuna ti didiɗi?»

⁶Mijiviɗ ngi Bumbulvuŋ a ɓaŋ: «Zlimbe vuna a diɗ a maka?» Mbur a bigaŋ li naŋ midiɗ anga na. Elize a ngum dum waɗ a hiziga fuk ng'ar yam tuwa. Akẽh na, zlimbe mepeleleŋ a bo capappa a hirnga yama.

⁷Elize a ɓa mbur tuwa: «Zuɓa zlimbe ɗike!» Mbur a ska haŋ a zuɓa zlimbe naŋ.

⁸Hirak ti di nah na, buy Siri ara gam vurum ati Israyeley. Ti taŋ mira ngilam wuy ati gawla naŋhaya na, a ɓa t'ani: «I sa ra pam sar ar li kahana.»

⁹Hirak ti nah na, mijiviɗ ngi Bumbulvuŋ a slin ng'avu buy Israyele ɓa ara ɓakaŋ: «Ji lesl, ki ra tuwuɗ ng'ar li nah ta, asi soje Sirihey a pam sar le a diga si.»

¹⁰Akẽh na, buy Israyel a slin sojehey ng'ar li mijiviɗ ngi Bumbulvuŋ mibigaŋ di tuwa. Elize a ɓa buyo ɗaˀ ɗaˀ le, anja a ji lesl kuy kuy. Ɓi nah a cuh le kanah sar mbeˀ mbeˀe.

¹¹Ɓi hana a muɗa didak le haɗa da buy Siri. A zla a zilo gawla naŋhaya, a ɓa taŋ: «Mbur misi naŋ i mbur ngi buy Israyel, da ada a wuzla ndra aka na, ki bigikiy di takwa?»

¹²Mbur purla a wuzla gawla soje naŋhaya, a mbiɗaŋ di: «Buy kumani ɗu, mbur anta loŋ ta, sey Elize, mijiviɗ ngi Bumbulvuŋ ar hirwuy Israyel. Ɓi ka maɓa yaŋŋa ar ka mutup a viŋ ɗik na, naŋ a ndila le ngi njika da buy Israyele.»

¹³Ar nah na, buy Siri a ɓi: «A ra puroko li naŋ misi anga na, ɓa i slin ara zuɓoko di?» Mizli a ɓakaŋ: «Elize naŋ a Dotaŋ.»

¹⁴Buy tuwa, a slin misi ti pilisey, mota ngi vurumoy waɗ zigiduw haɗa nga diga. A ra ndilam ngi duvuɗu, a ndahaka hirnga ngi walahaya zlar.

¹⁵Ngi mipirik prik prik na, gawla ngi mijiviɗ ngi Bumbulvuŋ a slikiɗ, a bi put, keɗ na, sojehey a ndahaka hirnga ngi walahaya le ndah ti pilisey, ati mota ngi vurumoy. A ɓa Elize: «Aw, buy ɗu! Ani i sa gam mbrike?»

¹⁶Elize a mbiɗaŋ di: «Ko ki zluwun ta! Asi mizli misi ndra bummoˀ na, taŋ haɗa fineˀ misi ati taŋ.»

¹⁷A dirba nah, Elize a dir dibiɗ, a ɓi ani: «Buymisemuŋ, wuna hiri ngi gawla ɗu na, ɓa a pur takwa!» Buymisemuŋ a wuna hiri ngi gawla ngi Elize tuwa ngbay, keɗ na, muwã sirit ti pilisey ati mota ngi vurumoy ti vuhoy avu taŋ, zlar hirnga ngi ti Elize.

¹⁸Soje Sirihey a pam sar ng'avu Elize. Dar Elize a tumbulo Buymisemuŋ ava ma, a ɓi: «Buymisemuŋ slirɓa hiri ngi soje hanayna, ɓa a puram ta!» Joˀ Buymisemuŋ a slirɓa taŋ hiriheye kaɓa mingiɓi ngi Elize.

¹⁹Ar nah na, Elize a ɓa sojeheye: «Jiviɗ mubugu kum di na i nah ta, yo walahay kum mawuɗam na, naŋ aka ta. Supoko ya, ɓa i ru ti kum ng'avu mbur kum mawuɗam vuna.» Joˀ aru ti taŋ nga Samari.

²⁰Ti taŋ mira ndilam, a cam kula ar walahaya na, Elize a cufuɗa Buymisemuŋ ma: «Buymisemuŋ, wuna hiri ngi mizli hanayna, ɓa a puram takwa!» Buymisemuŋ a wuna taŋ hiri wun, a puraka na, taŋ ar walahay Samari.

²¹Buy Israyele mupura taŋ keɗ na, a ɓa mijiviɗ Elize: «Baha ɗu, ani i kiɗa taŋ kwa mbrike?»

²²Elize a mbiɗaŋ di: «Kay! Ki kiɗa taŋ ta. Mizli ka mujo taŋ le ti ji ar vurum, mbele maslaam ati lek ɗik na, hõyyõ na, ka ada ki kiɗa taŋ kwa? Ka vula taŋ gwat ngi zum ati yam ngi si, ɓa a zumam, a sam, a dirba nah, ka pula taŋ a ram ng'avu buy taŋ a muŋ.»

²³Buy Israyel a da taŋ ɗaf madiɗa, a zumam, a sam. A dirba nah, a mbiɗa taŋ mi, a ram ng'avu buy taŋ a muŋ. Zle ti di nah na, soje Sirihey a pulaka ci taŋ ti vurum ng'ar hirwuy Israyele.

²⁴Zik neˀa dirba nah na, Ben-Hadat, buy Siri, a kuso soje naŋhaya gar, aru nga zla kiɗa vu ati Samari.

²⁵May a gi le haɗa a Samari. Zli kiɗa vu ati walahay tuwa, a zik, mbak ko hirnga ngi zungu tekeɗe kwana, a hiɗik suloy kukur dangafaɗa, yo zay ngi ɗiyuw dirgwaɗ reta litir na, a hiɗik suloy zlum.

²⁶Ngi pas numuŋ, buy ara cuh ti hirnga mohol, ngwas a tilaŋ mi: «Buy, kumani ɗu, so jiniy takwa!»

²⁷Amma, buy a ɓaŋ na: «Da Buymisemuŋ a ngum ɓa a jinuwo ta na, yi sa lum mi gu ngi sa jinuw ka? Ti alkamari a məlaŋ kwa malla ti mbaazla kwa?»

²⁸Buy tuwa, a ɓaŋ ma: «Ki wuɗ mike?» Ngwas a mbiɗaŋ di: «Ngwas misenna zleˀe na, a ɓiy le: vulo mangal ɗike, i zumaka dana, yo tiprik kwana, i sa zumaka nga ya ya.

²⁹I da ka mangal ɗu, i zumaka le. Ngi li naŋ muwun na, yi ɓaŋ: Vulo mangal ɗike, ɓa i zumaka ya na, amma a ɗumo mangal naŋ le.»

³⁰Buyo micina mingiɓi ngi ngwas tuwa na, a zla a ngira zana naŋhaya, yo naŋ macuh tir mohol tuwa na, sukwi Israyel a pura buyo a ki buhu ar deɗe ngi zana ɓaˀ a hirnga zana naŋhaya, i garak ma kini.

³¹Buy a ɓi: «Elize, mangal ngi Safat na, dana, da a ndir le ti hirnga naŋ nakaˀ ar pepesl naŋhay na, hadam, anja Bumbulvuŋ a kutiy ti bonoy mukuyta wãˀ.»

³²Elize a cifi le a hay naŋ, yo gawla naŋhay kwana, t'ada joˀ a cikeˀe. Dambalaka, buy a slino mbur le purla asi gawla naŋhay ng'avaŋ. Ɓa gawla ngi buy misa ndilo tikeˀe ng'avu Elize tuwa na, naɓa Elize a ɓa mizli micawwahaya le si: «Puraka ɗi! Mbur mikiɗa hirnga nah, a slino mbur ɓa a so buko hirnga ɗu. Kutukoko, da naŋ mindilo le ndil aka si na, gicaka miviŋ, ɓa kisa pakaŋ haŋ ti parewal vuna. Na zle, buy naŋ ara supo di ani ɓaˀ a dirba, cinaka hurum ngi sar naŋ.»

³³Elize tuwa, ti naŋ mira ɓi aruŋ sina, mislin ngi buy a ndilawa ng'avaŋ, a ɓaŋ: «Mislino ndra bonoy misenna i Buymisemuŋ! I njih hiri ngi wana ar Buymisemuŋ aruŋ maka?»