Read South Giziga 2KI 7 Bible Online

2KI 7 - South Giziga bible

2KI 7

¹Elize a mbiɗa: «Cinaka mingiɓi ngi Buymisemuŋ: Buymisemuŋ a ɓi ani: Ler kahana, tipirik a mizlingre ngi ci ng'ar walahay Samari na, hapa ngi daw mezle kilo kuruˀ nga cuw na, a sa hiɗik suloy purla, yo daw giziŋ kilo kukur cuw nga mufaɗ kwana, kanah ya.»

²Mbur majijira gwat ngi vurum ngi buyo a mbiɗa da Elize, mijiviɗ ngi Bumbulvuŋ: «Ko da Buymisemuŋ a wuna mifiliw ngi muŋhoyo le tekeɗe na, mingiɓi ɗik ka miɓa hana a sa gi kanah vuna gisiŋ kwa?» Elize a mbiɗaŋ di: «Yo kuy! Mbak ɗagay, kisa pura ti hiri ɗiki, amma ka, k'anta sa luuma zum naŋ ta ɓula.»

³Ti di nah na, misi kukulahay ada mufaɗa, gweˀ a vi mizlingre ngi walahaya. A zlaka a ɓam ar wala taŋ: «I ndiram aka ɓa i sa micam vur mike?»

⁴Da i ɓam le: Cukum ng'ar walahay na, naɓa i sa micam, asi mike na, may ara bul vu aruŋ. Yo da i ndiram le aka, naɓa i sa micam vuna ma si. Zuwen na, cukum ng'ar li pi sar ngi Sirihey na, da a pulam ndra ti siifa, naɓa i sa ngiram. Yo da a kiɗam ndra le vagay kwana, naɓa i sa micam a kiɗ mi.

⁵Ngi li guruv guruv, ngi pastaˀ na, a slikiɗam, a ram ng'ar li pi sar ngi Siriheye, a bulaka li pi sar ngi Siriheye bal bal gar. Dambalaka ko mbur loŋ anta.

⁶Asi mike na, Buymisemuŋ a ga, ɓa Sirihey a cinam hurum ngi mota ngi vurumoy ar li pi sar taŋ, hurum ngi sar ngi pilisey makilam, yo hurum ngi ru ngi sojehey haɗa maram. Ar nah kẽh na, Sirihey a zlaka a ɓam ar wala taŋ: «Buy Israyel a wuruk dala le da buy Hitihey ati buy Ezipteheye, ɓa a soko zlam ndra ngi kiɗa vu.»

⁷Hirak ngi pas madiɗ na, a slikiɗam, a kilam nga laha hirnga taŋ. A pulaka guɗuk taŋhay, pilisey, zunguhoy waɗ li pi sar taŋ mbak nga naŋ nga naŋ.

⁸Misi kukulahay tuwa, taŋ mubulaka li pi sar ngi Siriheye bal bal na, a dirba nah, a cam ng'ar guɗuku. A zumam, a sam, yo a hilam ɓiri barahay ati ɓiri tapasl tapaslay ar guɗuko, a ram di, ara ɗumoko taŋ. A moko, a cam ng'ar guɗuk mekelem ma. A hilaka gwat ngi huroˀohoyo gar, a ram ara ɗumoko taŋ.

⁹Amma a zlaka a ɓam ar wala taŋ: «Ndra magam hana na, i jiviɗ naŋ ta. Hin hana, i hin ngi cine ndum. Da i cifam le teˀteˀ, i ɓaka ɓi nah ta, hã li a wun ɓa i sa tilam mi ti ɓi nah na, a sa gam ndra bonoy haɗi. Zuwen akum, cukum ng'ar walahaya, ɓa i ra faka ɓi nah a hay buyo.»

¹⁰A ram, a zilaka mbur mijigina mizlingre ngi walahaya, a fakaŋ ɓi nah, a ɓakaŋ: «I cam ar li pi sar ngi Siriheye na, ko mbur loŋ purla anta, i cinam ˀay ngi mbur pal ta, sey pilisey ati zunguhoy mikaˀ kaˀ tewle ati guɗukoyo njoŋ njoŋ kine.»

¹¹Mbur mijigina mizlingre a zil vu nga hur walahaya, dar a ɓi ɓa a faka ɓi nah ngi hay buyo.

¹²Ngi duvuɗo, buy a slikiɗi, a ɓa gawla naŋhaya: «Y'ani ɓukum ɓi ngi juwa vu ngi Sirihey vur ndra na. A sinaka le, ndra, i roko ti may. A bam a pulaka li pi sar taŋ waˀwaˀ, ara ɗumom a duba gala, a ɓam: ‹Israyeley mawuɗam zli ndra ngi kiɗa vu na, da a sa boko le tir walahaya na, i sa jaka taŋ kaw kaw ti siifa, i sa cam ng'ar walahay taŋ.›»

¹³Akẽh na, mbur purla a wuzla madiɗa ngi soje naŋhay, a mbiɗaŋ di: «Anja i hilam pilisey zlum ti mizli ar taŋ a wuzla pilisey mindiram titiri ar walahay ɗagay na. Na zle, pilis tayna vuna taŋ gweˀ ngi muc kaɓa zigiduw Israyel ar walahay mindir gweˀ ngi muc vuna ta wal kwa. Kanah so na, i slinaka taŋ, ɓa i sa puraka, da masa gi i gwat mike na!»

¹⁴Waɗ so na, buy a ɓi ɓa a hilam mota ngi vurumoy cuw ti piliseye, dar a slina taŋ nga sipa baraf ngi soje Sirihey mikilam tuwa, a ɓa taŋ: «A ram, ara puroko di.»

¹⁵Sojehey a ram, ara sipaka baraf ngi soje Siriheye, hã sesẽŋ a mizaw Zurdeŋ. A jiviɗ taŋ maram na, keɗ na, zanahay ati gwatay saɓaɓa a ruwuyo Sirihey mizliɗaka taŋ ti taŋ makilam kutum kutum tuwa. Dar misliney a moko nga fa ɓi nah da buyo.

¹⁶Dar mizli ngir walahay Samari a bam, a ram ng'ar li pi sar ngi Sirihey tuwa, a hilaka gwat taŋhaya. Akẽh na, hapa ngi daw mezle na, kilo kuruˀnga cuwo, suloy purla, yo ngi daw giziŋ kwana, kanah ya.

¹⁷Buy a vula mingiɓi da gawla naŋ majijiraŋ gwat vurumoyo ɓa ma ra jigina mizlingre ngi walahaya i naŋ. Amma mizli a kirpakaŋ asi sar a mizlingre, a mucu. A gi le kaɓa mijiviɗ ngi Bumbulvuŋ miɓa tuwa. Elize a ɓa ti di buy Israyel muso ng'ava tuwa.

¹⁸Asi mike na, mijiviɗ ngi Bumbulvuŋ a ɓa buyo le zleˀe ani: «Tiprik, hirak ti ler kahana, a mizlingre ngi ci ng'ar walahay Samari na, hapa ngi daw mezle, kilo kuruˀ nga cuw na, a sa hiɗik suloy purla, yo hapa ngi daw giziŋ kwana, kanah ya.»

¹⁹Mbur majijira gwat ngi vurum ngi buyoy, a mbiɗa da mijiviɗ ngi Bumbulvuŋ ani: «Ko da i Buymisemuŋ muwuna mifiliw ngi muŋhoy tekeɗe kwana, mingiɓi ɗik hana vuna a sa gi gisiŋ kwa kini?» Elize a mbiɗaŋ di: «Yo kuy! Ki sa pura ti hiri ɗiki, amma ka, k'anta lum zum naŋ ta ɓula.»

²⁰Mbur mijijira gwat ngi vurum ngi buyo gwat mindilo ava na i nah so. Mizli ngir walahay a kirpakaŋ asi sar, a mucu.