Read South Giziga 2KI 8 Bible Online

2KI 8 - South Giziga bible

2KI 8

¹Ngwas ada zleˀe, Elize a mo ti siifa ngi mangal naŋ mumuca. Nkgi pas numuŋ na, Elize a ɓaŋ: «Ka ati mizli ngi hay ɗikeye, slikiɗam, ara cifam ar li zliv kum macifam gu. Asi Buymisemuŋ a go may le, a sa so asi ruwuyo a gi vi tarnaˀ.»

²Ngwas a tiɓa mi ngi mijiviɗ ngi Bumbulvuŋ miɓaŋ di tuwa. Naŋ ati mizli nga naŋhaya, a slikiɗam nga hirwuy Filistihey, a cifam vi tarnaˀ.

³Ar kiɗa mi ngi vi tarnaˀ na, ngwas tuwa, a mo baɗ ti ruwuy Filisti. Aru nga tumbulo buyo vur ɓi ngi hay naŋ ati guva naŋ mupula taŋ zleˀe.

⁴Kasl ti nah na, naɓa buy ara kiɗam slir zleˀe ati Gehazi, gawla ngi mijiviɗ ngi Bumbulvuŋ. Buy a ɓaŋ na: «Gwat madiɗa ngi zuma hirngahay, Elize miga taŋ gar na, inga slifiy taŋ !»

⁵Gehazi mira slufa ɓi ngi mangal Elize mimaŋ ti siifa tuwa na, mumuŋ ngi mangal vuna a ndilo kasl, ɓa a tumbulo buyo vur ɓi ngi hay naŋ ati guva naŋ mupula taŋ zleˀe. Dar Gehazi a ɓa buyo: «Buy kumani ɗu, ngwas vuna n'ani ati mangal naŋ Elize mimaŋ ti siifa naŋ a muŋ vuna.»

⁶A dirba nah na, buy a cufuɗa ngwasa muduba, joˀ ngwas a slufaŋ ɓi nah so. Akẽh na, buy a mur mata, a vula ɓi ngi ngwas misenna asi haŋ ngi gawla ngi si mevele, ɓa a gi welele vurˀe, a ɓaŋ: «Ngwas misenna, gwat naŋhay gar na, makaŋ taŋ ceke. Yo gwat guva naŋ miga gar, zle ti hin naŋ mislikiɗ di, hã a ndilo dana gar na, anja a wurkakaŋ di ma.»

⁷Elize aru nga Damasa, dambalaka Ben-Hadat, buy Siri, naŋ guta. Mizli a ɓaka buyo: «Mijiviɗ ngi Bumbulvuŋ a so le, hã aka.»

⁸Buy tuwa, a ɓa Hazayele: «Wuɗ gwat, ɓa ki ru di ngatara da mijiviɗ ngi Bumbulvuŋ, kisa ɓaŋ, ɓa a cufuɗuw Buymisemuŋ: zliv i sa mbul tir jiji misenna kwa mbrike?»

⁹Hazayel ara luuma Elize so. A raŋ ti gwatay ani ngatara a haŋ: gwat mimezle ngi si ruwuy Damasay gar, kaˀ kaˀ taŋ ar zlogomohoy kukur mufaɗa. Naŋ mindil na, ara cici deŋ a mbuŋ Elize, a ɓaŋ: «Mangal ɗik, Ben-Hadat, buy Siri a slino ya ng'avu ka, ɓa i ɓuw na: zliv i sa mbul tir jiji ɗu na kwa mbrike kini?»

¹⁰Elize a mbiɗaŋ di: «A ra ɓaŋ na: ‹Haˀaw, a sa mbul, amma Buymisemuŋ a njikiy di le, a sa mucu.›»

¹¹A dirba nah na, mijiviɗ ngi Bumbulvuŋ a puraŋ ngirimme, ko zinga ngi hiri anta wus neˀ le ta, a zla a tuwuy.

¹²Hazayel a ɓa Elize tuwa: «Ki tuwuy vur mike buy ɗu?» Elize a mbiɗaŋ di: «Ya matuwuy na, asi malambaˀhay ani, ka masa ga da Israyeley na le: Li taŋhay misi mbur a ndil angi taŋ ti tuwaˀtuwaˀ na, kisa wura taŋ ti vu. Gawla taŋhaya, kisa kiɗa taŋ ti maslalam. Ki sa njirsla ziri meciɗek taŋhaya, yo ngwas taŋhay misi ti huroyo kisa ngira taŋ.»

¹³Hazayel a mbiɗaŋ di: «Ya gawla ɗik hana, ya puɗaw fineˀ kiri ta, i sa lumo gidaŋ ngi gi gwat tayna gar kahana a maka?» Elize a mbiɗaŋ di: «Buymisemuŋ a bigiy di le, kisa tiri buy Siri.»

¹⁴Hazayel a bi tivi Elize, a mi ng'avu buy naŋ. Joˀ buy naŋ a cufuɗaŋ: «Elize a ɓuw mbrike?» Hazayel a mbiɗaŋ di: «Elize a ɓiy na: Naŋ kanah gisiŋ, kisa mbul kini.»

¹⁵Ngi li naŋ muwun na, Hazayel a zuɓ borgo ar yam, a sirta a mihiri buy mumuc tuwa, joˀ Azayel a zum buy ar li naŋm, a ca jugoɓ.

¹⁶Zoram, mangal ngi Akap, buy Israyele, angi vi muzlum naŋ ngi zumabuy naŋ na, naɓa Zoram, mangal ngi Zozafat a cifi i buy ngi Zuda.

¹⁷Zoram micifi buy na, naɓa naŋ ti vi kukur makir nga cuw. A zum buy a Zeruzaleme vi dangafaɗa.

¹⁸Zoram a sipi di i sar ngi buy Israyeley kaɓa mizli ngi hay Akapay, asi a zuɓ ngi ngwasa i zuŋ ngi Akap vuna. A gi gwat malambaˀ le a mihiri ngi Buymisemuŋ.

¹⁹Amma na, Buymisemuŋ a ngum ziza Zuda ta, asi gawla naŋ Daviti. Asi mike na, a ɓa Davite le ɗaˀ ɗaˀ le zleˀe, naŋ ati dideˀ naŋhaya, mbur masa zuɓa li t'ada ndrehhe a Zeruzaleme.

²⁰Hirak ti zumabuy ngi Zoram na, Edomoy a slam himaˀ avu zumabuy ngi Zuda, a cam buy nga taŋ.

²¹Zoram aru nga Sayir ti mota ngi vurum naŋhaya gar. A slikiɗ ngi duvuɗ, a kiɗa Edomoyo. Edomoy a ndahaka hirnga taŋ ndah ati madiɗa ngi sojehey naŋhay ngir mota ngi vurumoyo joˀ sojehey a kilam ng'ar guɗuk taŋhay.

²²Zle ti di nah na, Edom a sli himaˀ avu zumabuy ngi Zuda ar taŋ na, hã dana. Hirak ti hin nah na, Libna a sli himaˀ ya.

²³Mindir is ngi ɓi ngi Zoram ati slra naŋ miga taŋ gar na, i mutoho taŋ le ar ɗerewol mazilaka: «Ɗerewol ngi ɓi ngi buy Zudahay na takwa?»

²⁴Zoram a mucu, a dikaka a ciki zivi ngi dideˀ naŋhay ar Walahay ngi Daviti. Mangal naŋ Ahaziya a zuɓa li naŋ.

²⁵Zoram, mangal ngi Akap, buy Israyele, angi vi mukuruˀ nga cuw ngi zumabuy naŋ na, Ahaziya, mangal ngi Zoram, buy Zuda, a cifi buy Zuda.

²⁶Ahaziya micifi buy na, naɓa naŋ ti vi kukur cuw nga cuw. A zum buyo vi purla a Zeruzaleme. A zilaka mumuŋ Atali, zuŋ ngi Omri, buy Israyel.

²⁷Ahaziya a sipi di i sar ngi mizli ngi hay Akapay. A gi gwat malambaˀ a mihiri ngi Buymisemuŋ kaɓa hay ngi Akap vuna ya, asi naŋ vuna i muy ngi mizli ngi hay Akapay.

²⁸Ahaziya a ram ati Zoram, mangal ngi Akapa, nga kiɗa vu ati Ahaziya, buy ngi Siri a Ramot, hirwuy Galaˀat. Amma, soje Sirihey a gaka waˀa le da buy Zorama.

²⁹Buy Zorama, a mi nga Zisreyel, ɓa ara kufa waˀa, soje Sirihey migakaŋ di a Rama, ti taŋ makiɗam vu ati Hazayel, buy Siri tuwa. Akẽh na, Ahaziya, mangal ngi Zoram, buy Zuda, aru nga Zisreyel nga pura Zoram, mangal ngi Akap, mulum waˀa tuwa.