Read South Giziga 2KI 9 Bible Online

2KI 9 - South Giziga bible

2KI 9

¹Mijiviɗ Elize a zil mbur purla a wuzla jum ngi mijiviɗeye, a ɓaŋ na: «Juw vu, zuɓa gojogoɗ ngi mal hanakaw a haŋ, aru nga Ramot, hirwuy Galaˀat.

²Daka mindil le a diga na, aru ti pura Zehu, mangal ngi Yosafat, dideˀ ngi poprok ngi Nimsi. Ki sa ci, kisa slikiɗa ti wuzla sukum naŋhaya, yo kisa ru di ng'ar viŋ mubaˀ pal naŋ.

³Ki sa zuɓa gojogoɗ ngi mal tuwa, kisa paŋ mal a hirnga, joˀ kisa ɓaŋ na: Buymisemuŋ a ɓuw ani: Ya mapuw mal hana na, ɓa ki cifi buy Israyel. A dirba nah, kisa wuna miviŋ, kisa kil gwaɗ ɗik, ko ki ra zum vu neˀ ta.»

⁴Mbur gawla, mijiviɗ ngi Bumbulvuŋ tuwa, aru nga Ramot, hirwuy Galaˀata so.

⁵Naŋ mindil na, naɓa kasl ti nah, madiɗa ngi sojeheye, t'ada joa ruwuy. A ɓi: «Buy, yi wuɗ i ɓuw ani takwa!» Zehu a cufuɗaŋ: «Ki wuɗ di i wa a wuzla ndra migar hanaka?» Mijiviɗe kwana a mbiɗaŋ di: «I ka vuna si, buy!»

⁶Zehu a slikiɗ, a ci kulaˀ ngi hay, joˀ mijiviɗ a paŋ mal a hirnga, a ɓaŋ: «Buymisemuŋ a ɓi ani: Ya mapuw mal hana na, ɓa ki cifi buy ngi sukwi ngi mizli ngi Buymisemuŋ a si ruwuy Israyele.

⁷Ki sa kiɗa mizli ngi hay Akapay, buy ɗik misi zleˀe na. I sa pula cuwal ngi gawla ɗu mijiviɗeye, yo gawla ɗuwoy nga ya Buymisemuŋ, Zezabel mikiɗa taŋ gar na, yi sa pula cuwal taŋ ma.

⁸Naŋ kanah, mizli ngi hay Akapay gar na, a sa ngizlam, yo a hay Akapa, mizli mizilehey, bekehey malla mizli dimuhoy a si ruwuy Israyel gar na, yi sa ngizla taŋ.

⁹I sa tiri ti hay ngi Akapa rak rak kaɓa ya mitiri ti hay ngi Zeroboˀam, mangal ngi Nebat na ya. Yo yi sa tiri di rak rak kaɓa ya mitiri ti hay ngi Basa, mangal ngi Ahiya na ma.

¹⁰Zezabele, i kirihey masa humbuɗaka ar guva ngi Zisreyel, ko mbur masa dika vagay naŋ, anta.» Joˀ mijiviɗ tuwa, a wuna miviŋ wun, a kil gwaɗ naŋ.

¹¹Akẽh na, Zehu a bi, a mi ng'avu gawla ngi buy naŋhaya a muŋ. A cufuɗakaŋ: «Gwat a gi le kwa? Mibirnga nah a so ng'avu ka gi mike?» Zehu a mbiɗa taŋ di: «Kum vuna ki sinaka mijiviɗ nah le, yo ki sinaka mingiɓi naŋ le ngbaŋ.»

¹²A mbiɗakaŋ di: Kay, ki gi slir! Slufa ndra ɓi mucuh na. Naŋ kwana, a mbiɗa taŋ di: «Mingiɓi naŋ miɓiy di na, ani, a ɓiy: Buymisemuŋ a ɓi anihĩ: Ya mapuw mal hana na, ɓa ki cifi buy Israyel.»

¹³Dar akẽh na, madiɗa ngi sojehey tuwa, a wusam vu, mbur gar a turo godo naŋ ngi vu vu, a ciyaka taŋ a ruwuy asi sar ngi Zehu, ar li ɗuva sar ngi jiɗ ngi haya. A zlaka fi tulum, a ɓam: «Bumbulvuŋ a vuluw siifa, buy Zehu!»

¹⁴Naŋ kine, Zehu, mangal ngi Zozafat, dideˀ mukutur ti kutur ngi Nimsi, ara gi gidiɓi ar Zorama. Naɓa ti di nah na, Zoram ati mizli Israyeley gar na, ara jiginaka Ramot, hirwuy Galaˀata avu Hazayel, buy Siri.

¹⁵Amma, zleˀe ada na, buy Zoram aru le kufa waˀa naŋ a Zisreyele, waˀa naŋ Sirihey migakaŋ di ti di taŋ makiɗam vu ati Hazayel, buy Siri. Zehu a ɓa mizli ngi seˀeheye: «Kumo, ki jumoko le ng'avi ya takwa? Anja mbur pal a sumuɗ tir walahaya ta, vur naŋ masa ra waha ɓi nah a Zisreyele.»

¹⁶A dirba nah, Zehu a jiɗ ar mota ngi vurum naŋ, aru nga Zisreyel, asi Zoram a ro tup ti jiji ngi waˀa naŋ tuwa a diga. Ahaziya, buy Zuda kwana, aru le nga pura Zorama zleˀe.

¹⁷Mijigina li mideŋ a hirngi hay ngi jigina li a pura zigiduw mandilawa ati Zehu keɗ na, a ɓi, ɓa a ɓaka buyo: «Y'ada pur zigiduw hiɗim hiɗim.» Zoram a ɓaŋ: «Slin mbur misi pilis ɓa ara ji ti taŋ hirnga», ɓa a cufuɗa taŋ: «I jam maso ti kum aya?»

¹⁸Mbur misi pilis ara ji ti taŋ hirnga, a ɓa taŋ: Buy a ɓukum na: «I jam maso ti kum aya kini?» Zehu a mbiɗaŋ di: «Mucuw ka ti ɓi ngi jam i mike? Ka so sipiy!» Mbur mijigina li a til mi, a ɓi: «Mislin a ndil le gbaˀ avu taŋ so, na, naŋ anta mo ta.»

¹⁹Buy tuwa, a slin mbur mekelem ma, a ndil le gbaˀ avu taŋ, a ɓa taŋ: «Buy a ɓukum na: I jam maso ti kum aya kini?» Zehu a mbiɗaŋ di: «Mucuw ka ti ɓi ngi jam i mike? Ka so sipiy!»

²⁰Mbur mijigina li a til mi, a ɓi: «A ndil le gbaˀ avu taŋ so, amma naŋ anta mo ta. Na misi gwat naŋ na so na, a bam vu ati misi gwat ngi Zehu, dideˀ mukutur ti kutur ngi Nimsi, asi a misi gwata kaɓa mibirnga.»

²¹Buy Zoram a ɓi na: «Juwikiy mota ɗu ngi vurumo.» Joˀ a juwakaŋ mota ngi vurumo. Akẽh na, Zoram, buy Israyel ati Ahaziya, buy Zuda, mburo gar ti mota naŋ ngi vurum, a bam nga ji hirnga ti Zehu, ara lumakaŋ ar guva ngi Nabot a Zisreyel.

²²Zorama, naŋ mupura Zehu keɗ na, a ɓaŋ: «Ma so ti ka i jam aya, zehu?» Zehu a mbiɗaŋ di: Jam ngi mike? Munuk Zezabel a ro ar li huruk huruk naŋ a mbuŋ kulihey aruŋ, yo ar li gi sin naŋ ngi mijuwrihey na aruŋ na, jam anta.

²³Zoram tuwa, a mbiɗi duba, a kil, bal ti tila mi da Ahaziya: «Ahaziya, ji lesl, hana i vula mbur ngi ji?»

²⁴Zehu a zuɓa lek naŋ, a mula Zorama, luvut ara lumaŋ ar jeˀer, a bi gor njoŋ ti wuzla duduwa, waɗ a diɗ ndirɗaɗ ti virzi ar mota naŋ ngi vurumo.

²⁵Zehu a ɓa Bitsar, gawla naŋ majijiraŋ gwat ngi vurumo: «Zuɓa, hiziga ng'ar guva ngi Nabot a Zisreyel. Wuluka ŋkeŋ ɗi: Ti di ndra ati ka misi ada zleˀe ar mota ngi pilis a dirba cine naŋ Akap na, Buymisemuŋ a ɓi ɓi mutuwaˀ le vurˀe, ani:

²⁶Ya Buymisemuŋ, ngi dambu ngi dambu ani, yi pura pumbus ngi Nabot ati ngi ziri naŋhay ara ɓul. I sa pula cuwal naŋ ar guva misenna. Ma ɓi hana i ya Buymisemuŋ. Wurenna, zuɓa vagay ngi Zorama, hiziga ng'ar guva hana kaɓa Mingiɓi ngi Buymisemuŋ miɓa.»

²⁷Ahaziya, buy Zuda mupura kanah na, naŋ kwana a ja kil kini ngir i Ben- Gaŋ. Na Zehu ɓaˀ aseˀeŋ. A ɓa gawla naŋhaya: «Kiɗaka naŋ vuna vagay aya!» A kiɗaka Ahaziya ar mota naŋ ngi vurumo ar miɗingir ngi Sur, gweˀ avu Ibeleyam. A kil ara ndil a Megido, a muc a diga.

²⁸Gawla naŋhay a zuɓaka ti mota naŋ ngi vurumo nga Zeruzalem, a dikaka angi zivi ngi muy naŋhay ar Walahay ngi Daviti.

²⁹Ahaziya micifi buy Zuda zleˀe na, naɓa Zoram, mangal ngi Akapa, a ɓul di i vi mukuruˀ ngaŋ kaˀ naŋ angi zuma buyo.

³⁰Zehu naŋ gweˀ ngi ci nga Zisreyele. Ɓi mucuh gar na, naɓa Zezabel a cine le gar. Zezabel a zla a ci ɓerem a hiri, a ɗiya ngwic hirnga sat sat kuy kuy, a puro hiri tir fenetir.

³¹Hirak ti Zehu matuwuɗa miviŋ ngi ci ng'ar walahay na, Zezabel tuwa, a ɓi: «I jam muso ti ka ya, ka sukwi ngi Zimri, mikiɗa buy naŋ?»

³²Zehu a zuɓa hiri paɗɗa ng'avu fenetire, a til mi, a ɓi: «Misi ati ya i waka? I waka?» akẽh, mizli madiɗa ngi hay naŋhay, mizli ngi si mevelehay cuw malla makir a puram hiri ng'avu fenetir tuwa.

³³Zehu a vula taŋ mingiɓi, a ɓa taŋ: «Paka haŋ da Zezabele nga ruwuy». Dar a pakaŋ haŋ nga ruwuyo. Pumbus ngi Zezabel a gic avu mohol, yo ar piliseye. Joˀ Zehu a kirpaŋ.

³⁴A dirba nah na, Zehu a ci ngi haya, a zum gwat, a si gwat, dar a ɓi: «Ngwas minisa hana, kum gam welele vurˀe, dikakaŋ, asi i zuŋ ngi buy.»

³⁵Mizli a ram ɓa nga dik naŋ tuwa na, ara lumam di i guduguzluŋ hirnga, saray ati tapaɗak haŋhay tewle.

³⁶A dirba nah na, mizli a moko, a slufaka labara nah da Zehu, a ɓi: «Hana a gi na kaɓa mingiɓi ngi Buymisemuŋ, gawla naŋ mijiviɗ Eli, mbur Tisibe miɓa zleˀe ani tuwa: «Kirihey a sa humbuɗaka vagay ngi Zezabele ar guva a Zisreyel.

³⁷Yo mindir is ngi dumvu ngi vagay ngi Zezabele a sa zliɗ hirnga purla purla kaɓa zay ngi gwatay ngi zãˀã li ar guva a Zisreyele. Naŋ kine, ɓa hã mbur a sa ɓi: Hana i vagay ngi Zezabel na, anta.»