Read South Giziga 1CH 10 Bible Online

1CH 10 - South Giziga bible

1CH 10

¹Ti di numuŋ ada na, Filistihey a zlaka Israyeley ngi kiɗa vu a muwã Gilboˀa. Israyeley a kilam ti taŋ, joˀ Filistihey a kiɗam haɗi asi taŋ.

²Filistihey a suroko Sawul ati ziri naŋhaya sor. A kiɗaka Zonataŋ, Abinadap waɗ Malkisuwa ziri naŋ mizileheye vagay vagay.

³Zle ti nah na, gidaŋ ngi vurum a slikiɗ ng'ar Sawul. Misi luvutoy, a purakaŋ, Sawul a zla zluwun kirkir.

⁴A ɓa mbur majijiraŋ gwat ngi vurumoyo: «Zuɓa maslalam ɗike, kiɗiy vagay, vur Filisti manja ci mizaw tayna masa kiɗikiy, a sa singiram ar ya» Amma mbur mijijira gwat ngi vurum naŋhay a ngum ta, asi zluwun ara gaŋ haɗi. Dar Sawul a zuɓa maslalam naŋ, a diɗ kuɓ ng'araŋ.

⁵Mijijira gwat ngi vurumoy mupura buy naŋ a muc le na, naŋ kwana, a diɗ kuɓ ng'ar maslalam nga naŋ, a muca ya.

⁶Sawul ati ziri naŋ mizile mimakireye, a micam kahana so, a micam pay ar li purla.

⁷Ti Israyeley micinam, soje taŋhay a kilam le, yo Sawul ati ziri naŋhay a micam le na, a kilam, a pulaka walahay taŋ, joˀ Filistihey a sa pam ar li taŋ.

⁸Li naŋ muwun na, Filistihey musoko nga cuko gwat ngi mizli mumucahaya na, a lumaka vagay ngi Sawul ati ngi ziri naŋhay a muwã Gilboˀa.

⁹A cukoko gwat ngi Sawuloyo, a ram ti hirnga naŋ waɗ gwat ngi vurum naŋhaya a haŋ. A rudigam ti gwat ngi bugawlahay tayna, asi ruwuy taŋ, a tilaka mi naŋ da kuli taŋhay ati mizli taŋhay ɓa a cinam.

¹⁰A dirba nah, a paka gwat ngi vurum naŋhaya sek ar hay kuli taŋ purla, yo guduguzluŋ hirnga naŋ, ara diraka dar dar ar hay ngi kuli Dagoŋ.

¹¹Mizli misi a Yabes ngi Galile gar na, a cinaka gwat Filistihey migaka da Sawul na le.

¹²Migi vurum miwirwirey ngir walahaya, ara hiloko vagay ngi Sawul ati ziri naŋhaya, a ram taŋ nga Yabes. A ra dikaka tesl taŋhay asi widis mazilaka terebente ngi Yabes, dar a gam dalyam hin tarnaˀ.

¹³Sawul a muc asi naŋ migi teŋteŋ avu Buymisemuŋ ta, yo ma na, aru le ɗaˀ nga pur daˀas,

¹⁴mbak Buymisemuŋ le. Bumbulvuŋ a kiɗa vagay, dar a vula zuma buyo da Davit mangal ngi Zese.