Read South Giziga 1CH 11 Bible Online

1CH 11 - South Giziga bible

1CH 11

¹Mizli Israyeley gar a cikilam a ciki Davit a Hebroŋ, a ɓakaŋ na: «Ndr'i pumbus purla.

²Diga ti Sawul misi ar buy vuna kwana, mabi ti mizli Israyeleye, yo mamo taŋ i ka vuna si. Na zle Bumbulvuŋ Buymisemuŋ ɗik a ɓuw di le zleˀe si: Masa jigina Israyel mizli ɗuwoy i ka, yo masa cifi buy taŋ i ka»

³Mizli micawwa ngi Israyeley gar, a sa lumaka buy Davit a Hebroŋ, a ɗiyam ɓi ngi jumoˀay ar wala taŋ a mbuŋ Buymisemuŋ, a cakaŋ i buy ngi Israyel, kaɓa Samuyel mitil di mi zleˀe ti slimiɗ ngi Buymisemuŋ tuwa.

⁴Buy Davit ati Israyeley gar, a tiɓaka Zeruzaleme, a zilaka zleˀe Zebus, asi mipam zleˀe a diga i Zebusihey.

⁵Mizli Zebusihey a ɓaka Davite: «Ki sa coko ng'ar walahay ndra ta» Na Davite a tiɓa walahay Siyoŋ mugun gun ti moholo le ngbaŋ. A dirba nah, a zilaka «walahay ngi Davit.»

⁶Tapasa Davite a ɓi na: «Mbur mudumbuŋ masa kiɗa Zebusihey na, a sa tiri buy miwa sojehey». Zoˀap, misi mumuŋ naŋ i Seruya, ara zla kiɗa vu dumbuŋ, joˀ mitiri buy ngi sojehey i naŋ.

⁷Davit a cifi ar slala muguno gun gun ti mohol tuwa. Vurˀe, a zilaka «walahay ngi Divit».

⁸A dirba nah, a ndir slalahay gun gun a ciki li miɗigar mazilaka Milo. Yo Zoˀapa kwana, a ndira is ngi walahayaya.

⁹Davit ara tiri mbur madiɗa ti gidaŋ, Bumbulvuŋ Buymisemuŋ naŋ da ati naŋ.

¹⁰Mizli micawwa cawwa, migi vurum ngi Davitey, waɗ Israyeley gar, majahakaŋ jah gidaŋ gidaŋ, ɓa a zuma buyo, kaɓa Buymisemuŋ miɓa vur Israyeley na,

¹¹Slimiɗ ngi mizli miwirwireye t'ani: Isebaˀal, mangal ngi mbur Makmoni, i buy ngi jigina lihey. Mikiɗa mesene taŋhay ada skat skat makir ti maslalam na, i naŋ, a kiɗa taŋ ar li purla.

¹²A dirba naŋ i Elazar mangal ngi Dodo, Ahoˀa, mbur ngi wuzla mizli mimakirey.

¹³Filistihey micikilam ngi kiɗa vu a Pas-Damim, Israyeley mikilam taŋ na, naɓa naŋ da a ciki Davite. Guva ngi daw giziŋ ada akẽh.

¹⁴Elazar ati mizli naŋhay a cicam a wuzla guva, a kurusaka guva kuras kuras, a kiɗaka Filistiheye. Buymisemuŋ a vula bugawla madiɗa le da Israyele.

¹⁵Ti di numuŋ ada na, buyoy makir a wuzla mizli ngir makireye, a so lumaka Davite, naŋ ar mandazlay muwã migweˀ avu butum a Adulam, asi mizli filistihey a pam walahay guɗuk le ar sozo ngi mizli Refahay.

¹⁶Naɓa Davit a ro ɗum ar li mugun gun kuy kuy. Yo buy miwi li ngi Filistihey ada a Betelyeme.

¹⁷Davite, may gwat a jaŋ gurjik, a ɓi: «Yam misi ar futuŋ misi a mizlingre ngi Betelyem na, masiy di ɓa i si i waka?»

¹⁸Dar buy mimakirey tuwa, a cam ti gidaŋ ng'ar walahay guɗuk ngi Filistiheye. A nuwoko yam misi ar futuŋ ngi mizlingre ngi Betelyem tuwa, a soko di, a vulaka da Divite, amma buy Davite a ngum si naŋ ta, a pusla a ruwuy ti slimiɗ ngi Bumbulvuŋ.

¹⁹A ɓi: «Da i sa yam hana le na, anja Buymisemuŋ ɗu a puriy ka mbur malambaˀ wãˀ. Ɓa i sa pumbus ngi mizli muvulaka hirnga taŋ taˀ da muc na sukwa? Asi ara nuwoko di, taˀ hirnga taŋ da mucu!» Dar a ngum si naŋ ta. Gwat bugawlahay mimakir migaka na, i hana so.

²⁰Abisay sukum ngi Zoˀapa, i buy ngi mizli mimakir tayna. Mududuɓa ziwit ng'ar mizli skat skat makir, mikiɗa taŋ vagay vagay na, i naŋ vuna. Amma slimiɗ nga naŋ, naŋ a wuzla mizli mimakirey na ta.

²¹A ɗuvakaŋ hirnga da naŋ makaw cuw fineˀ mekelemey mucuw na, a cifi buy taŋ, taŋ mimakir ar ngay taŋ na, ko mbur mindilaŋ anta.

²²Benaya, mbur Kapseyel, mangal ngi Yoyada, i dideˀ meciɗek ngi mbur miwirwir ar vurum, a gi gwat mezlehey le haɗi. Mikiɗa bugawla Moˀapay mucuw na, i naŋ. Mipi sar ngi kiɗa mobor ar futuŋ, ar hin ngi yam mapawa ada buk buk na, i naŋ vuna ma.

²³Mikiɗa mbur Ezipte, suburo, migil gwat ngi metir cuw ti reta na, i naŋ vuna ma. Mbur Ezipte naŋ kaw ti ziwit migbizl kaɓa dum ngi ji caka. A kirih ng'avaŋ, a zla kiɗ naŋ ti ganday, a tiɓa ziwit naŋ, a cika ti naŋ tehhe a muŋ.

²⁴Benaya mangal ngi Yoyada, gwat naŋ miga i hana so, joˀ slimiɗ naŋ a zil a wuzla ngay ngi migi vurumoy mimakir na.

²⁵Slimiɗ naŋ a zil kaˀ a wuzla ngay ngi mizli mizli ngir makir na, amma a ndila ngay ngi mizli mimakirey na ta. Davit a ci di buy ngi soje mijigin naŋhay.

²⁶Soje miwirwirey i ti: Asabeyel sukum ngi Zoˀap, Elahaŋ mangal ngi Dodo mbur Betelyem.

²⁷Samot mbur Haror, Heles mbur Paloŋ,

²⁸Ira mangal ngi Ikek mbur Tekoˀa, Abiyezer mbur Anatot,

²⁹Siɓkay mbur Husa, Ilay mbur Ahoˀa,

³⁰Maray mbur Netofa, Heleɗ mangal ngi Baˀana, mbur Netofa.

³¹Itay mangal ngi Ribay, mbur Gibeya, misi a ruwuy Benjameŋ, Benaya mbur Piratoŋ.

³²Huray mbur ngir sozo Gaˀak, Abiyel mbur Bet-Araba,

³³Azimavet mbur Bahurim, Eliyaba mbur Saˀalboŋ.

³⁴Ziri mizile ngi Hasemey, mbur Gizoŋ, Yonataŋ mangal ngi Sage, mbur Harar,

³⁵Ahiyam mangal ngi Sakar, mbur Harar, Elifal mangal ngi Ur.

³⁶Hefer mbur Mekara, Ahiya mbur Paloŋ,

³⁷Hesro mbur Karmel, Naˀaray mangal ngi Ezibay,

³⁸Zowel, sukum ngi Nataŋ, Mibar mangal ngi Hagri,

³⁹Serek mbur Amoŋ, Naray mbur Beˀerot, mangal ngi Seruya, i mijijira gwat ngi vurum ngi Zoˀapay,

⁴⁰Ira, mbur ngi hay Yeter, Garep i muy taŋ ma,

⁴¹Uri mbur Hiti, Zabaɗ mangal ngi Alay,

⁴²Adina mangal ngi Siza, i buy a wuzla buy ngi sukwi Ruben, soje kukur makir aseˀe.

⁴³Hanaŋ mangal ngi Maˀaka, Yosafat mbur Meten,

⁴⁴Uziya mbur Asetarot, Sama ati Yehiyel ziri ngi Hotamay, mbur Aroˀer,

⁴⁵Yediyayel, mangal ngi Simri, waɗ Yoha sukum naŋ, i mbur Tis,

⁴⁶Eliyel mbur Mahava, Yeribay waɗ Yosaviya, ziri ngi Elnamay, Itina mbur ngi ruwuy Moˀap,

⁴⁷waɗ ti Eliyel, Obeɗ, Yasiyel mizli Sobahay.