Read South Giziga 1CH 12 Bible Online

1CH 12 - South Giziga bible

1CH 12

¹Ar hin ngi Davit muro ɗum a Siklak, ɓa a lihi avu Sawul mangal ngi Kis na, mizli a soko, a sa lumakaŋ. I soje miwirwirey, mujuwam vu le ngi gi vurum.

²Taŋ ti gulum taŋhay waɗ vehvehluhoy a haŋ. A mulam ti gula ti hazum, rak raka si. Sukwi ngi Benjameŋ i sukwi ngi Sawul vuna, mizli ngi wuzla taŋhay ani:

³Buy Ahiyezer ati sukum naŋ Yoak, ziri ngi Semahay, mbur Gibeya. Yeziyel ati Pelet, ziri ngi Azimavetey, Beraka ati Yehu, mizli Anatotoy,

⁴Isemaya mbur Gabaˀoŋ, i buy ngi wuzla buy ngi mizli migi vurumoy mizli ngir makir na.

⁵Irmeya, Yeziyel, Yohanaŋ waɗ Yozabat mizli Giderahay,

⁶Eluzay, Yerimot, Beyaliya, Simariya waɗ Sefatiya, mizli Harufoy,

⁷Elkana, Isiya, Azarel waɗ Yasobam, dideˀ ngi Korehey,

⁸ti Yawela ati Zebadiya, ziri ngi Yerohamay, mbur Gedor.

⁹Mizli mekelemey a pulaka sukwi Gata, ara lumaka Davit ar li ɗum naŋ misi a wuzlaɓuh mikirɗak kirɗaka. Taŋ i mizli miwirwirey, i mizli migi vurumoy, a sirkaka taŋ le ngi kiɗa vu. Taŋ ti mbarayay waɗ ziwitey a haŋ. A gam zluwun da mbur kaɓa moboroy, taŋ wirwir kaɓa mangazaway a muwã.

¹⁰Ezer i buy taŋ, Obadiya i mucuw naŋ, Eliyap i mimakir taŋ,

¹¹Misemana i mumufaɗ taŋ, Irmeya i muzlum taŋ,

¹²Atayi mimerkeɗ taŋ, Eliyel i mitarnaˀ taŋ,

¹³Yohanaŋ midangafaɗ taŋ, Elzabat i mungoltir taŋ,

¹⁴Irmeya i mukuruˀ taŋ, Makbanay i mukuruˀ ngaŋ kaˀ taŋ.

¹⁵A wuzla ziri ngi Gataya, buy ngi sojehey i taŋ so. Mihĩyã ngi si taŋ a jum soje deŋ deŋ skat, migidaŋ ngi si taŋ a jim soje deŋ deŋ durmuk.

¹⁶Angi kiya mudumbuŋ ngi vi, rak ti mekepel mazuɓ nay nay na, mutuwuɗam nga dubazaw Zurdeŋ i taŋ. A ɓulaka mizli ngir sozo micaya cek, zle asi pas ngi miprik hã asi pas ngi pastaˀa.

¹⁷Mizli Benjameŋhey ati Zudahay, a soko nga pura Davite hã sesẽŋ ar li ɗum naŋ.

¹⁸Davit a bo nga mbuŋ taŋ, a ɓa taŋ: «Da ki soko nga pur ɗu ngi jam ngi vu, yo ɓa ki jinikiy na, i tuɓukum ti mevel purla. Amma da ki soko ɓa ki tikinikiy da mesene ɗuwoy, manja i gi malambaˀa si na, anja Bumbulvuŋ ngi dideˀ ndrahay, a pura, yo a ga ndra kiita!»

¹⁹Akẽh na, Uf ngi Bumbulvuŋ a ci avu Amasay, buy ngi soje mizli ngir makire, a ɓaŋ: «Ndra asi ka, mangal ngi Zese! Ndra tisi ka mangal ngi Zese! Anja ki cifi jam jam, yo waɗ mizli majinukuw ma! Asi i Bumbulvuŋ ɗik majinuw» Davit a tiɓa taŋ mulaka, dar a cifa taŋ i buyoy a wuzla soje naŋhay.

²⁰Mizli ngi Manasehey a jumom ng'avi Davit, hirak ti nana, naɓa Davit a boko le ati Filistihey nga kiɗa vu ati Sawul. Kpak naŋ na, Davit ati mizli naŋhaya, anta a gaka vurumo jom ati Filistiheye ta, asi buy Filistihey a ɓulaka mizli taŋhay avra, a ɓam na: «Davit a sa jum ng'avu buy naŋ Sawul a muŋ, dar a sa vula ndra asi haŋ ngi Sawul»

²¹Ti Davit misi a Sikla na, mizli ngi Manasehey a jumom ngava so, i ti: Adna, Yozabap, Yediˀel, Mikayel, Yozabat, Elihu, waɗ Siletay, i buy miwi soje durmuk durmukoy ar sukwi ngi Manase.

²²Taŋ gar i soje miwirwirey, ara jinaka mizli ngi Daviteye. A tiram buy ngi soje naŋhay.

²³Naŋ kine, vur hin gar na, mizli ara soko nga jina Davite, dar soje naŋhay a sikam haɗi.

²⁴Mizli mujuwam vu le kaˀ kaˀ ti gwat ngi vurumoy, a soko ngavi Davit a Hebroŋ, ɓa a ɓakaŋ ɓi ngi zumabuy ngi Sawulo, kaɓa Bumbulvuŋ muɓaŋ di ɗaˀ le. Mizli musoko vuna t'ani:

²⁵Angi sukwi ngi Zuda, soje misi ti mbaray ati ziwiteye, taŋ durmuk merkeɗ ti skat skat dangafaɗ.

²⁶Angi sukwi ngi Simeyoŋ, mizli miwirwir ngi vurumoyo, taŋ durmuk tarnaˀ ti mizli skata.

²⁷Angi sukwi ngi Levi, durmuk mufaɗ ti skat skat merkeɗ,

²⁸waɗ Yoyada buy asi muy ngi Aroŋhoy, naŋ ti mizli durmuk makir ti skat skat tarnaˀ.

²⁹Gawla mekelem ada ma, a zilaka Sadok, i soje miwirwir, a so ti buy muy naŋhay, kukur cuw ti cuw.

³⁰Angi sukwi ngi Benjameŋ, sukwi mijeŋŋe ngi Sawul vuna, mizli durmuk makir. Hã a ndila hin misi tapasa na, naɓa vendeke taŋ, ara gam slra a hay Sawul zleˀe aruŋ.

³¹Angi sukwi ngi Efrayime, mizli miwirwirey, misi slimiɗ taŋ ara zil a wuzla muy taŋhaya, taŋ durmuk kukur cuw ti mizli skat skat dangafaɗ.

³²Angi reta ngi sukwi ngi Manase, misi kini tisi pas ngi pastaˀa, mizli muwunaˀ hĩˀĩ ngi ra ci buy Davite, taŋ mizli durmuk kuruˀ nga dangafaɗ.

³³Angi sukwi ngi Isakara, madiɗa ngi sojehey kukur cuw jom ti gawla taŋhay. Israyeley a bam rak ti wanaka, a bam mbri mbrike gar na, taŋ a sinaka le.

³⁴Angi sukwi ngi Zabuloŋ, soje misirka kuy kuyoyo, taŋ durmuk kukur zlum. A juwam vu le wãˀ ti gwat ngi vurum taŋhay, yo ɓa a kiɗam vu ti mevel purla.

³⁵Angi sukwi ngi Neftali, madiɗa ngi sojehey durmuk pal, yo soje misi ti mbaray ati ziwiteye, durmuk kukur makir nga tarnaˀ.

³⁶Angi sukwi ngi Daŋ, mizli mujuwam vu le ngi gi vurumo, taŋ mizli durmuk kukur cuw nga dangafaɗ ti skat skat merkeɗ.

³⁷Angi sukwi ngi Asere, mizli mujuwam vu le ng'ar vurumo, taŋ mizli durmuk kukur mufaɗ.

³⁸Sukwi ngi Ruben, ngi Gat waɗ reta ngi sukwi ngi Manase, taŋ mizli misi tisi pas ngi miprik ngi mizaw Zurdeŋ, mizli taŋhaya, taŋ durmuk skat ti kukur cuw, taŋ ti gwat ngi kiɗa vuhoy wal wal gar.

³⁹Soje tayna gar, muwam vu le ngi cinjih ngi kiɗa vu, a soko ti mevel purla nga Hebroŋ, ɓa a caka Davite i buy ngi sukwi Israyel keɗeɗe. Mizli Israyel mekelemey gar a zilam mi le ɓa a zuma buyo.

⁴⁰A gam hin makir a ciki Davite, ara zumam, ara sam gwat sukum taŋ Hebroŋhoy masaka taŋ di.

⁴¹Yo mana, midigwi taŋhay misi tir vay nana, hã sesẽŋ a Isakar, Zabuloŋ waɗ Neftali, ara soko ti gwat ngi zumoyo ya, a duba zunguhoy, zlogomohoy, zungu-pilisey waɗ a duba slahay. A soko di i hapa, tambali, gudubun muˀulo doc doc, mbaazla waɗ mal. Ada soko ti slahay ati tumuŋhoyo ma, gwatay haɗa. Asi Israyel kuzluˀgar ara mumul.