Read South Giziga 1CH 13 Bible Online

1CH 13 - South Giziga bible

1CH 13

¹Davit a cifam ngi ngilawuy ati madiɗa ngi soje durmuk durmuk, skat skat waɗ gawla naŋhay gar.

²A dirba nah, a ɓa Israyeley micikilam na gar: «Da ki puraka le naŋ kuy, yo da i wuɗ ngi Bumbulvuŋ Buymisemuŋ ndra na, slinukum mizli ng'avi sukum ndrahay mindiram asi ruwuy Israyel gar, yo ng'avi masayay ati levihey misi ar walahay taŋhay, ɓa a soko, a jumom ati ndra.

³Ɓa i mam ti akoti ngi Buymisemuŋ ndra ngi hay ndra muŋ so, asi ar hin ngi Sawulo, i kam slimiɗ ara ta»

⁴Mizli mukusom gar na, a zilam mi le ɓa a gaka kanah. Asi mizli gar a puraka keɗ keɗ na, naŋ jeŋ.

⁵Akẽh na, Davit a cikila Israyeley gar, zle ar maakway ngi Ezipte misi tir vay ruwuy, hã sesẽŋ a mizlingreŋ ngi Lebot-Hamat misi tir vay muŋ, ɓa a zuɓoko akoti ngi Buymisemuŋ misi a Kiriyat-Yeˀarim.

⁶Davite, a ram bummoˀ ati Israyeley gar nga Baˀala, i Kiriyat- Yeˀarim misi angi hirwuy Zuda, ara zuɓoko akoti ngi Buymisemuŋ, a zilaka Bumbulvuŋ mua hirnga kerubeŋhey.

⁷A zuɓaka akoti ngi Buymisemuŋ ar mota nawaya ngi slahay, naŋ zleˀe a hay Abinadap, mahizigiɗaka i ti Uza ati Ahiyo.

⁸Davit ati Israyeley gar, ara ɓurgam pusak vu waˀ a mbuŋ Buymisemuŋ. A zlam dimis asi gujuvur, garaya, gangaŋ, jãwjãw waɗ asi fugumoy.

⁹Taŋ mindilam ar məlaŋ migweˀ avu Kidoŋ na, a ndir mata, ɓa slahay a hizigiɗaka akoti ngi Buymisemuŋ, Uza a ska haŋ, a jaŋ.

¹⁰Akẽh na, Bumbulvuŋ a zuɓ himaˀ ar Uza, a kiɗa vagay, asi naŋ mija haŋ avu akoti na. Uza a muc ɓaˀ aciki akoti vuna si.

¹¹Bumbulvuŋ mikiɗa Uza vagay na, a muɗa membezleŋ le da Davite. A ca slimiɗ da li naŋ Peres-Uza, hã dana a zilaka kanah aruŋ.

¹²Tapasa, Davit a zluwun ti Bumbulvuŋ le, a ɓi: «Y'anta ru ti akoti ngi Buymisemuŋ ngi hay ɗu ta!»

¹³Akẽh na, Davit aru ti akoti ngi hay naŋ ta, nga ruwuy naŋ ta, amma aru di ngi hay Obeɗ-Edomo, mbur Gat.

¹⁴Akoti ngi Buymisemuŋ a gi kiya makir a hay Obeɗ-Edomo, joˀ Bumbulvuŋ a ɗuwula mi da hay ngi Obeɗ-Edomo ati gwat naŋhay gar.