Read South Giziga 1CH 14 Bible Online

1CH 14 - South Giziga bible

1CH 14

¹Hiram, buy madiɗa ngi Tir, a slino mizli ngavi Davite. A slinaŋ ti dum ngi miter, a slinaŋ miciɗa ɗuguroy, micira dumoy, ɓa a ndirakaŋ hay.

²Akẽh so na, Davit a si na le muduba, i Bumbulvuŋ mcifaŋ buy ngi Israyele, yo i naŋ miga ɗongor da zumabuy naŋ, asi Israyel mizli naŋhay.

³Davite, a zuɓ ngwas mekelemey a Zeruzaleme, a yi ziri mizile ati mongoso mekelemey.

⁴Ziri naŋ miya taŋ a Zeruzaleme, slimiɗ taŋhay ani: Samiwa, Sobap, Nataŋ, Salomoŋ,

⁵Ibar, Elisuwa, Elpelet,

⁶Noga, Nefeg, Yafiya,

⁷Elisama, Beˀeliyada waɗ Elifelet.

⁸Filistihey a cinaka na, a cifaka Davite le i buy ngi Israyel keɗeɗe. Dar a slikiɗam, a ram ti sipi naŋ. Davit micina ɓi nah na, a bo nga mbuŋ taŋ.

⁹Filistihey tuwa, a ndiloko, a nahaka sozo ngi Refaya heɓeheɓe.

¹⁰Dar Davit a cufuɗa Buymisemuŋ: «I ra zla Filistihey na kwa? Ki sa vuliy taŋ asi haŋ ɗu kwa?» Bumbulvuŋ a mbiɗaŋ di: «A ra zla taŋ, i sa vuluw taŋ asi haŋ ɗike»

¹¹Filistihey tuwa, a ram nga Baˀal-Perasim, Davit a kiɗa taŋ a diga. Davit a ɓi na: «Buymisemuŋ a ga ɓa i buto li baɗ a wuzla mesene ɗuwoy, kaɓa yam mabuto» A zilaka li nah Baˀal-Perasim na, vurˀe. Mbiɗeˀvra: ‹buy ngi li mubuto.›

¹²Filistihey mikilam tuwa, a pulaka kuli taŋ miciɗa ti ciɗey akẽh. Davit a ɓi ɓa a wuraka taŋ.

¹³Filistihey a moko heɓeheɓe ng'ar sozo tuwa ma.

¹⁴Davit a cufuɗa Buymisemuŋ ava ma ni. Buymisemuŋ a mbiɗaŋ di: «Ki zla taŋ ti dirba ta, ara guno kileŋ avu taŋ, ɓa kisa ndilo ngavi taŋ puɗak ar biizihey na.

¹⁵Daka misa cin sar ngi mbur le a hirnga biizihey na, bi nga kiɗ taŋ so. Asi i sar ngi Buymisemuŋ maru a mbuŋ ɗike nga kiɗa soje filistiheye»

¹⁶Davit a ga kaɓa Buymisemuŋ miɓaŋ di tuwa, a kiɗa filistiheye, a ɓula taŋ zle a Gabaˀoŋ hã sesẽŋ a Gezer.

¹⁷Diga ar nana, slimiɗ ngi Davite a zil asi ruwuy kuzluˀ gar. Bumbulvuŋ a ga ɓa sukwi ngi mizli gar a zluwunam di.