Read South Giziga 1CH 17 Bible Online

1CH 17 - South Giziga bible

1CH 17

¹A cufaka Davite le ar hay naŋ muduba. Ngi pas numuŋ ada na, Davit a ɓa mijiviɗ Nataŋ: «Ya yi hin ar hay miɗiya ti dum ngi miter, na akoti ngi jumoˀay ngi Bumbulvuŋ naŋ ar guɗuk miɗiya ti godo na, ki wuluk mbrike?»

²Nataŋ a mbiɗa da Davite: «Gwat ka muwulka le ngi gi gar na, gaŋ, asi Buymisemuŋ naŋ da ati ka»

³Amma ngi duvuɗ nah vuna, Buymisemuŋ a ɓa ɓi ani da Nataŋ:

⁴«Aru ng'avi gawla ɗu Davite, ara ɓaŋ na: Bumbulvuŋ a ɓi ani: Masa ndiriy hay da ya, ɓa yi cifi anga, i ka ta.

⁵Na zle, diga ya mubo ti Israyeley ti ruwuy Ezipte na, i cifi ɗaˀ ar haya ta. I cifi aka aka ar guɗuku.

⁶Yo ma na, ar li gar ya misi a wuzla Israyeley na, i wini migi kiitahay le, miwaka Israyeley i taŋ. Yi ɓi mbur ɗaˀ asi taŋ: «Ki ndirikiy hay ti mitere ta vur mike na, yi ɓi ɗaˀ ta»

⁷Wurenna, kisa ɓa gawla ɗu Davite so: ya Bumbulvuŋ misi gidaŋ wãˀ, i ɓi ani: Yi zuɓo ka baɗ ar li jigin asi virzi ngi ginewey, ɓa ki tiri buy ngi sukwi ɗu Israyel.

⁸Ar li ka muru le gar na, y'ada ati ka, i kiɗa mesenehey misi a mbuŋ ɗike le gar. Slimiɗ ɗik a sa zil haɗa kaɓa ngi buy madiɗa ngi si ruwuyoy na, mbele ya.

⁹I sa vula li cifi da sukwi ɗu Israyele, i sa cifaŋ virzi hǝrǝk hǝrǝk, a sa ndir wãˀ anga. Anta a sa zluwun mata.

¹⁰Diga ti ya mupula sukwi ɗu Israyel asi haŋ migi kiitahay, ɓa a jiginaka na, i hina hirnga da mesene ɗikeye le gar, joˀ yi ɓuw na: Ya Bumbulvuŋ, yi sa ɗuvuw hay taˀ.

¹¹Naŋ kine, da hin ɗik misa ndila le ɓa ki muc so na, i sa wini pal asi ziri ɗik mizileheye, ɓa a cifi ar li ɗike. I sa cica zumabuy naŋ gidaŋ gidaŋ.

¹²Masa ndiriy haya i naŋ. Janga naŋ ngi buyo, a sa ndir gidaŋ gidaŋ ngi sete.

¹³I sa tiri cine, naŋ kwana, a sa tiri mangal ɗu. Y'anta sa pula gaŋ mezle ɗu mbak le, kaɓa ya mupula avu buy mudumbuŋhoy ar naŋ na ta.

¹⁴I sa ga ɓa a ndir i buy ngi sukwi ɗu Israyel ngi set, yo ɓa a ndir ar zumabuy ɗu ngi sete ma. Asi gidaŋ ngi zumabuy misi a hay naŋ, a sa ndir ngi caˀa.»

¹⁵Buymisemuŋ a biga gwat da Nataŋ, joˀ Nataŋ ara slufa mingiɓi nah ati gwat naŋ mupura cek da Davite.

¹⁶Akẽh na, buy Davit a so cifi a mbuŋ Bumbulvuŋ, dar ɓi: «Bumbulvuŋ Buymisemuŋ ɗu, ndra ati hay ɗo, ndr'i ndilaka ɓa ki gi ti ndra kaɓa hana ta.

¹⁷Amma tivi ka, naŋ muk t'aruŋ Buymisemuŋ ɗu. Ani ki ra ɓi ɓi ngi sa gi gwat da hay ɗu nga mbuŋ ma. Bumbulvuŋ Buymisemuŋ ɗu, ki ra puriy kaɓa mbur madiɗaŋ.

¹⁸Ki giy dudok le si, ɓa i ɓuw mbri aruŋ maka? Ka ki si na gawla ɗike le.

¹⁹Bumbulvuŋ, ka miga gwat madiɗa tayna cek na, asi ka misi ti mevel mezle avu gawla ɗike, yo ɓa ngi biga ka madiɗa haɗa.

²⁰Bumbulvuŋ, mbur ngi wi ti ka anta, mbak ka le na, Buymisemuŋ mekelem anta, i cinaka le ti slimiɗ ndra, a ɓaka ndreehe kanah.

²¹Naŋ kine ya, sukwi mekelem a ruwuyo, misi kaɓa sukwi Israyel ada kwa? I sukwi ka Buymisemuŋ mira tuɓo di asi haŋ Eziptehey, ɓa a tiri sukwi, ɗiki. Slimiɗ naŋ ara zil, ara gi gwat ngi gi zluwun ngi ɓula sukwi ngi mizli a mbuŋ sukwi naŋ.

²²Bumbulvuŋ, ki tiri ti Israyele le i sukwi ɗik ngi sete, yo ka kwana, ki tiri Buymisemuŋ taŋ le.

²³Bumbulvuŋ, wurenne ga gwat ka miɓa ɓi naŋ na wãˀ, yo ɓi ka miɓiy di da ya ati hay ɗu na, anja a gi gisiŋ ar pas gar.

²⁴Anja a gi gisiŋ, anja slimiɗ ɗik a zil ngi caˀa, yo anja a ɓam: Bumbulvuŋ misi gidaŋ wãˀ, Buymisemuŋ ngi Israyele, i Buymisemuŋ ngi Israyel, yo anja hay ngi gawla ɗik Davite a ndir gidaŋ gidaŋ a mbuŋ ɗike.

²⁵Naŋ kine Bumbulvuŋ ɗu, i ka ti haŋ ɗik miɓa gawla ɗike ɗaˀ ɗaˀ le: kisa ndiraŋ hay. Gawla ɗik mulum gidaŋ ngi diruw dibiɗ hana na vurˀe.

²⁶Na wurenna so na Bumbulvuŋ, Buymisemuŋ ɗu i ka, ki ɓa ɓi ngi luuma wuya nah na le da gawla ɗike.

²⁷Wurenne, anja ki ɗuwula mi da hay ngi gawla ɗike, ɓa dideˀ naŋhay a ndiram ngi set a mbuŋ ɗike. Bumbulvuŋ, maɗuwulaŋ mi i ka, a sa ndir i muɗuwula mi ngi sete»