Read South Giziga 1CH 18 Bible Online

1CH 18 - South Giziga bible

1CH 18

¹A dirba nah, Davit a kiɗa Filistiheye, a tika taŋ ˀay. A tiɓa walahay Gat ati prok naŋhay avu Filistiheye.

²A kiɗa mizli Moˀapaya, a tiram i gawla naŋhay mahinam hirnga a mbuŋ sukwi naŋ.

³Davit a kiɗa Hadadezer buy madiɗa ngi Aramay misi a Soba, ruwuy naŋ sesẽŋ a Hamat. Hirak ti nana, Hadadezer ara ru nga ndaha zumabuy naŋ ngir ti mizaw Efrat.

⁴Davit a tiɓi avu Hadadezere, mota ngi vurumoy durmuk, misi pilisey durmuk tarnaˀ waɗ soje misi saray durmuk kukur cuw. A pul da naŋ mota ngi vurum jom ti pilise jom ti pilise gwat ngi skata, dar a nguma zlambar ngi mekelemeye cek.

⁵Mizli A ram ngi Damasay a soko ɓa a jinam is asi Hadadezer buy ngi Soba, amma Davit a kiɗ asi taŋ mizli durmuk kukur cuw ti cuw.

⁶Dar Davit a cifi buy miwi lihey asi ruwuy A ram ngi Damasa. Mizli Aramay a tiram gawla ngi Davitey mahinam hirnga a mbuŋ sukwi naŋ. Ar li Davit maru gar na, Bumbulvuŋ ara vulaŋ bugawla.

⁷Davit a tiɓa mbaray ngi ɓiri tapasl tapaslay, misi avu gawla ngi Hadadezereye, a cuh taŋ nga Zeruzalem.

⁸A Tibat waɗ a Kun ruwuy ngi Hadadezere, Davit a tiɓi ɓiri gaza le haɗa ma. Nga mbuŋ, Salomoŋ a sa ɗiyi di magayak madiɗahay, ɓamtalay waɗ gwat ngi gi slrahay misi ti ɓiri gaza.

⁹Toˀu buy madiɗa ngi Hamata, a cine na, Davit a kiɗa soje ngi Hadadezer buy ngi Sobahaya le cek.

¹⁰Akẽh na, Toˀu a slina mangal naŋ Hadoram nga ja haŋ da Davite, yo ɓa a gaŋ sise vur naŋ mikiɗa Hadadezer ar vurum na. Naŋ kine, Hadadezer i mesene ngi Toˀu. Hadoram a so ti gwatay ti sukwi wal wal da Davite, gwat ngi ɓiri tapasl tapaslay, ngi ɓiri barahay waɗ ngi ɓiri gazahay.

¹¹Gwat tayna vuna, Davit a vula taŋ da Bumbulvuŋ, bac nga hirnga ɓiri bara ati ɓiri tapasl tapasl naŋ mutuɓo taŋ avu sukwi ngi mizli Edomoy, ngi Moˀapay, ngi Amoŋhoy, ngi Filistihey waɗ ngi Amalekey na ma.

¹²Abisaya, mumuŋ a zilaka Seruya. A kiɗ mizli Edomoy durmuk kuru nga dangafaɗ ar sozo ngi mandaŋ.

¹³A cifi buy miwi lihey a diga, joˀ Edomoy a tiram gawla ngi Davitey. Naŋ kine, ar li Davit maru gar na, Bumbulvuŋ ara vulaŋ bugawla.

¹⁴Davit a zum buy a ruwuy Israyel kurzluˀ gar, a ga kiita da sukwi naŋ gar kasl kasl.

¹⁵Zoˀap misi mumuŋ naŋ a zilaka Seruya na, i buy ngi sojehey, Yosafat mangal ngi Ahilut, i mijiviɗ ngi buy.

¹⁶Sadok mangal ngi Ahitup, waɗ Abimelek mangal ngi Abiyatara, taŋ i masayay, Savesa kwana i mutoho gwata.

¹⁷Benaya mangal ngi Yoyada, i naŋ mawa Kretey ati Peletey majiginam mizlingreŋ ngi buyo. Ziri ngi Daviteye kwana, i gawla ngi Davitey mikasl kasl wãˀ.