Read South Giziga 1CH 22 Bible Online

1CH 22 - South Giziga bible

1CH 22

¹Davit maɓi: «hay ngi Bumbulvuŋ Buymisemuŋ naŋ aka, li gi mikuli zlam zlam ngi Israyeleye n'ani na vurˀe.»

²Davit a ɓi ɓa a cikilaka mulakay misi asi ruwuy Israyele. A wini misina slra ngi ɗuguroy, ɓa a ciɗam ɗugur ngi ndira hay ngi Buymisemuŋ.

³Davit a wi vu ti ɓiri haɗi teˀe, ngi ɗiya ponti ngi dira palalam ngi miviŋ, waɗ gwat ngi kilika gwatay, a cikila ɓiri gaza zikitiŋ, a sluf ta,

⁴waɗ dum ngi miter a sluf ta ma, asi mizli Sidoŋhoy ati Tirey, a soko ti dum ngi mitere le haɗi da Davite.

⁵Davit a ɓi zleˀe na: «Ani mangal ɗu Salomoŋ i zuŋ, a nih t'aruŋ. Na hay ngi ndir da Bumbulvuŋ na, i hay ngi zila slimiɗ asi ruwuy kurzluˀ gar, asi naŋ madiɗaŋ, yo i hay misi ti dudok. Sey i wi vu ti gwatay haɗi ngi ndir naŋ.» Naŋ kine, Davit a sa muc tikeˀe na, a wi vu le ti gwatay haɗi.

⁶Davit a zila mangal naŋ Salomoŋ, a ɓaŋ ɗaˀ ɓa a ndir hay da Bumbulvuŋ Buymisemuŋ ngi Israyel.

⁷Davit a ɓa Salomoŋ: «Mangal ɗu, y'ada ti wuluk zleˀe ngi ndira hay ti slimiɗ ngi Bumbulvuŋ Buymisemuŋ ɗu.

⁸Amma a ɓikiy mingiɓi ngi Bumbulvuŋ, a ɓiy na: ‹Ki pi pumbus le haɗi, yo ki gi vurum madiɗahay le. Vur ka mipa pumbus haɗi a mbuŋ ɗu na, i ka masa ndiriy hay ti slimiɗ ɗu ta.

⁹Pura, a yukuw mangal le, naŋ i mbur mijam jam ati mizli, Y'anta sa pula mesene naŋhay mugun hirnga naŋ na, a gakaŋ ngaˀa ta. A sa zilaka Salomoŋ, asi ar hin ngi zumabuy naŋ na, Israyeley a sa ndiram jam jam manja zluwun.

¹⁰Masa ndiriy hay ti slimiɗ ɗu i naŋ. Naŋ a sa tiri mangal ɗu, ya kwana, yi sa tiri cine. I sa cica zumabuy naŋ gidaŋ gidaŋ angi Israyele ngi sete.

¹¹Davit a ɓaŋ ma: «wurenne so na mangal ɗu, anja Bumbulvuŋ a ndir ati ka, ɓa ki ndir hay mindila le da Bumbulvuŋ Buymisemuŋ ɗike, kaɓa naŋ miɓa vur ka na.

¹²Bumbulvuŋ masa cifuw buy ngi Israyel na, anja a vuluw sli wala ngi gwat ati lesl, ɓa ki ja ɓimujuwa ngi Bumbulvuŋ Buymisemuŋ ɗik a hirnga.

¹³Ɓiɓi micica ati ɓimuɗuva Buymisemuŋ muvula da Israyeley ti haŋ Moyise, da ki ra ja taŋ a hirnga, ki ra gi taŋ slra na, kisa ga gwat gar gu. Cici zlak, tum vu tum. Hiri ngbay, ki zluwun ta.

¹⁴Pura ko ti murga ɗu na kwana, i wi vu le ti gwatay vur hay ngi Bumbulvuŋ: ɓiri tapasl tapasl fineˀ ton durmuk makir, ɓiri baraŋ, fineˀ ton durmuk kukur makir, ɓiri bara ati ɓiri ho gar na, a sluf ta, naŋ haɗi. I wi vu le ti dumoy ati ɗuguroy ma. Ki sa wuɗ nga mi taŋ ava so.

¹⁵Ki sa lum mizli ngi slraˀahaya haɗa, misina slrahay wal wal, miciɗa ɗuguroy, dumoy, iriŋ ngi mizli keɗeɗe, misina slrahay cek.

¹⁶Ɓiri hirnga, ɓiri bara, ɓiri gaza waɗ ɓiri ho gar na, a sluf ta. Slikiɗ, gi slra, yo anja Bumbulvuŋ a ndir ati ka.»

¹⁷Davit a ɗuva ɓi da buy ngi Israyeley gar, ɓa a jinaka mangal naŋ Salomoŋ.

¹⁸A ɓa taŋ: «Bumbulvuŋ Buymisemuŋ kumo, naŋ anta ati kum ta kwa? A jinukum le ko tir wanaka gar, ɓa ki cifam zuy zuy ta kwa? Naŋ kine, mizli misi zlezle a si ruwuyo, a vuliy taŋ le asi haŋ ɗu, wurenna, a hinam hirnga le a mbuŋ Bumbulvuŋ waɗ a mbuŋ sukwi naŋ.

¹⁹Wurenna, hurdumom hirdam ti mevel kum wãˀ, ti membezleŋ ngi vu kum wãˀ ngi sipa Bumbulvuŋ Buymisemuŋ kumo. Slikiɗam, zlaka slra ngi ndira hay ngi Bumbulvuŋ Buymisemuŋ, ɓa ki soko ti akoti ngi jumoˀay ngi Bumbulvuŋ waɗ gwat ngi slrahay muvula taŋ le da Buymisemuŋ, ng'ar hay mindira ti slimiɗ naŋ na»