Read South Giziga 1CH 26 Bible Online

1CH 26 - South Giziga bible

1CH 26

¹Mijigina mizlingrehey, taŋ ti ngay taŋ taˀ taˀ ya. Meselemiya, mangal ngi Kore, i dideˀ ngi Abiyasaf ar sukwi ngi Kore,

²Meselemiyel a yi ziri mizilehey tarnaˀ, i ti: Zakari, Yediyayel, Zebadiya, Yatiniyel,

³Elam, Yohanaŋ waɗ Eliyohenay

⁴Obet-Edom a yi ziri mizilehey dangafaɗ, slimiɗ t'ani vur mijingaˀ vur mijingaˀ: Semaya, Yozabaɗ, Yoˀa, Sakar, Netaneyel,

⁵Amiyel, Isakar waɗ Peˀultay. Naŋ kine, Buymisemuŋ a ɗuwula mi le da Obet-Edomo

⁶Modogom naŋ Semaya, a yi ziri misi gidaŋ ngi wi mizli a wuzla muy taŋhaya, asi i mizli mupuɗaway.

⁷Ziri ngi Semayahay i ti: Otni, Refayel, Obet, Elzabat waɗ sukum taŋhay, Elihu ati Semakiya, mizli mupuɗaw puɗaway.

⁸Taŋ cek i ziri ngi Obet-Edomoy. Taŋ vuna, ziri taŋhay waɗ sukum taŋhaya, taŋ cek i mizli mupuɗaw puɗaway, asi ada a bigaka gidaŋ taŋ ar slra. Taŋ jom gar mizli kukur merkeɗ nga cuw.

⁹Ngay ngi Meselemiya, taŋ mujumom ati ziri naŋhay waɗ sukum naŋhay na, a gam jom gar mizli mupuɗaw puɗaway kuruˀ nga dangafaɗ.

¹⁰Hosa ngir muy ngi Merari, a yi ziri mizilehey mufaɗ: Semri i buy, i modogom ta ngbaŋ, amma cine a cifaŋ kaɓa buy.

¹¹Mijingaˀ naŋ i Hilkiya, mimakir taŋ i Tebaliya, mumufaɗ taŋ i Zakari. Ziri ngi Husahay ati sukum naŋhay a gam jom gar mizli kuruˀ nga makir.

¹²Buyoy ati mizli ngi si mijigina mizlingreheye, a gam slra ar hay ngi Bumbulvuŋ rak rak ati sukum taŋhaya.

¹³Ɓa ngi jigina mizlingre, gawlahay ati midigilahay, a wunkaka vur muy vur muy, rak rak, ti cergizleŋ.

¹⁴Ngi jigina mizlingreŋ misi tisi pas ngi miprike, cergizleŋ a diɗ ar Selemiya. Ngi mizlingreŋ vay muŋ, a diɗ ar mangal naŋ Zakari, i mbur mukutivu misi lesle.

¹⁵Obet-Edomo, nga naŋ i mizlingreŋ vay ruwuy. Ziri naŋhay kwana, a jiginam dirgwaɗay.

¹⁶Supim ati Hosa, a jiginam nga taŋ i mizlingreŋ misi tisi pas ngi pastaˀ waɗ ngi Saleket, misi tir li miɗigir. A wunkaka mijigina mizlingrehey ani:

¹⁷Tisi pas ngi miprike, ar hiipasa, Levihey merkeɗ. Tir vay muŋ, hiipasa, Levihey mufaɗa. Tir vay ruwuyo, Levihey mufaɗa. Yo ngi jigina dirgwaɗaya kwana, hiipasa Levihey cuw makaw cuw.

¹⁸Hay mujoɓ avu cala tisi pas ngi pastaˀa, mizli mufaɗ a jiviɗe, waɗ cuw a huroˀo.

¹⁹Tayna i ngay ngi mijigina mizlingrehey, i dideˀ ngi Korehey ati ngi Merarihey.

²⁰A vulaka buyɓi ngi ji zlili ngir hay Buymisemuŋ waɗ gwat muvula le da Buymisemuŋ na, da Levihey cah.

²¹Dideˀ ngi Ladanay, ngir sukwi ngi gersoŋ, buy a wuzla muy taŋhaya, i ti Yehiyeli

²²ati ziri naŋhay waɗ Zetam ati sukum naŋ Zowel. Buy ɓi ngi zlili ngir hay Bumbulvuŋ i taŋ.

²³Ar sukwi ngi Amram, ngi Isar, Hebroŋ waɗ Uziyele,

²⁴i Sebuyel dideˀ ngi Gersoŋ, mangal ngi Moyis, majigina zlili jom gar i naŋ.

²⁵Dideˀ ngi Sebuyeley ada a wuzla muy ngi Eliyezer sukum ngi Gersoŋ, i ti Rehabiya mangal ngi Eliyezer, Yesaya, Yoram, Zikri waɗ Selomit.

²⁶Davit ati buyoy misi a wuzla muy taŋhay, waɗ soje muwam mizli durmuk durmukoy, ati skat skatay, muvulaka gwatay mipal da Buymisemuŋ na, buyɓi naŋ i Selomit ati sukum naŋhay.

²⁷Gwat taŋ mulumoko di ar vurumo, a vulam cah ngi ɗiya hay ngi Bumbulvuŋ.

²⁸Gwat mijiviɗ Samiyel muvula taŋ, Sawul mangal ngi Kis muvulaŋ, Abner mangal ngi Ner muvulaŋ waɗ ngi Zoˀap mangal ngi Seruya muvulaka taŋ gar na, buyɓi naŋ, naŋ avu Selomit ati sukum naŋhaya ma.

²⁹Kenaniya ngi sukwi ngi Isara, taŋ ati ziri naŋhaya, a jiginam nga taŋ i gwat ngi Israyeley misi i ngi Buymisemuŋhoy ta, kaɓa toho gwatay ati gi kiita.

³⁰Hasabiya waɗ sukum naŋhay mupuɗaw puɗaw, mizli durmuk ti skat skat tarnaˀ, taŋ ar sukwi ngi Hebroŋ, a jiginam nga taŋ i Israyel mikini tisi pas ngi pastaˀ ngi mizaw Zurdeŋ. Gwat ngi Bumbulvuŋhoy gar waɗ slra ngi buyo, ɓi naŋ avu taŋ.

³¹Yeriya i madiɗa ngir muy ngi Hebroŋhoy. Ar vi mizli ngir mufaɗ naŋ Davit mazum buy na, mizli Hebroŋhoy a laka virzi ngi dideˀ taŋhaya le, yo a lumam mizli mupuɗaw puɗaway le a wuzla taŋ, a lumam a ruwuy Yazer ngi Galaˀat.

³²Davit ati sukum naŋhaya, a gam jom gar, mizli mupuɗaw puɗaway durmuk cuw ti skat skat tarnaˀ, i buy ngi hayay a wuzla muy taŋhaya, Davit mucufa taŋ ɓa a waka Rubeney, Gatay waɗ reta ngi sukwi ngi Manase, ɓa a kam slimiɗ ar gwat ngi Buymisemuŋhoy ati ngi buyoy.