Read South Giziga 2CH 1 Bible Online

2CH 1 - South Giziga bible

2CH 1

¹Salomoŋ mangal ngi Davite, ara nih ar zumabuy naŋ muduba. Bumbulvuŋ Buymisemuŋ naŋ naŋ da ati naŋ, a tiraŋ le ɗongor haɗa.

²Salomoŋ a zila Israyeleye gar, buy miwi soje durmuk durmuk ati skat skatay, migi kiitahay, buyɓi ngi Israyeley gar, mbiɗˀvra, buy ngi hayay.

³Salomoŋ ati mizli mukusom a cikeˀe gar, a ram ng'ar li miɗigir misi a Gabaˀoŋ, asi guɗuk ngi zlir ti Buymisevuŋ naŋ a diga, i guɗuk Moyis gawla ngi Buymisemuŋ miɗiya a wuzla ɓuh mikirɗak kirɗak tuwa.

⁴Davit a zuɓa akoti ngi Buymisemuŋ ti Kiriyat-Yeˀarime ng'ar li Buymisemuŋ mibigaŋ di. Asi Davit a ɗiyi guɗuk le hĩˀĩ vurˀe a Zeruzaleme.

⁵Amma li gi mikuli ngi ɓiri gaza, Basalel mangal ngi Uri, dideˀ ngi Hur miɗiya na, naŋ a mbuŋ guɗuk ngi Bumbulvuŋ vuna. Salomoŋ ati mizli mukusom gar na, a sipam di i naŋ.

⁶Li gi mikuli ngi ɓiri gaza misi a mbuŋ Bumbulvuŋ, migweˀ avu guɗuk ngi zlir ati Buymisemuŋ tuwa, Salomoŋ a jiɗ ng'ara, a gi mikuli mizlam zlamay durmuk mbeˀ mbeˀe.

⁷Ngi duvuɗ nah vuna, Buymisemuŋ a biga vu da Salomoŋ, a ɓaŋ: «Ki wuɗ i vuluw mike? Cufuɗiy.»

⁸Salomoŋ a mbiɗaŋ di: «Buymisemuŋ ɗu, ki ga mezle le haɗa da baha Davite, yo ki cifi ti ya buy le ar li naŋ ma.

⁹Bumbulvuŋ Buymisemuŋ, wurenna ga gwat ka miɓa da baha Davit tuwa muduba, asi micifi ti ya buy ngi mizli misikinih kaɓa murɓuk ngi ruwuy na, i ka vuna.

¹⁰Wurenna, vuliy sinmijileŋ ati sli wala ngi ɓi, ɓa i si na gi gwat a mbuŋ mizli hanayna. Da kanah ta na, mizli ɗikey, mizli misikinih haɗa hana, majigina taŋ gu i waka?»

¹¹Buymisemuŋ a ɓa Salomoŋ tuwa na: «Ani ki cufuɗ di i zlili ta, gwat ngi si haŋ malla dudok ta, muc ngi mizli mazliram hiri ti ka ta na ta, hutuŋ subur ta ma, amma ki cufuɗ ngi ɗik i sinmijileŋ ati sli wala ngi ɓi, ɓa ngi jigina mizli ɗuwoy, ya micifi ti ka buy taŋ na.

¹²I vuluw sinmijileŋ ati sli wala ngi ɓi vuna. Yo zlili, gwat ngi si haŋ waɗ dudok vuna ma na, i vuluw taŋ bac nga meˀe ava ma. Buyoy micifam dumbuŋ ar ka gar na, ko a lumam ɗaˀ ta, yo a dirba ɗike kwana, ko anta ma kini.»

¹³Salomoŋ a pula li miɗigir ngi Gabaˀoŋ, misi a mbuŋ guɗuk ngi zlir ti Buymisevuŋ, a mi nga Zeruzalem. Joˀ a zum buy asi ruwuy Israyele.

¹⁴Salomoŋ a cikila mota ngi vurumoy ati piliseye cikal cikal. Naŋ ti mota ngi vurumoyo durmuk ti skat skat mufaɗ waɗ piliseye durmuk kuruˀ nga cuw. A pa mekelemeye ar li naŋ mawi taŋ vu ar walahay madiɗahay waɗ numuŋhoyo, a ciki naŋ a Zeruzalem.

¹⁵Buy Salomoŋ a ga, hã a Zeruzaleme, ɓiri bara ati ɓiri tapasl tapasl a gi haɗi kaɓa ɗugur, yo dum ngi mitere kwana, a gi haɗi kaɓa bazlawar angi hirwuy ngi ciki mubuliy Mediterane.

¹⁶Pilis ngi Salomoŋhoyo, a sakaŋ taŋ ti Ezipte waɗ ti Silisi, i migi terere ngi buyoy mahiɗikoko taŋ a Silisi a diga da buyo.

¹⁷Migi terereheye, mota ngi vurum purla musoko di le ti Ezipte gar na, cikili naŋ, suloy bara skat merkeɗe, yo pilis purla kwana, suloy skat ti kukur zlum. Migi terere tayna, ma ram taŋ da buy ngi Hitihey waɗ da buy Siriheye, i taŋ vuna ma. A hiɗikoko taŋ ti slimiɗ taŋ.

¹⁸Salomoŋ a ɓi ɓa a ndiraka hay da Bumbulvuŋ, waɗ hay ngi buyoy da naŋ vuna.