Read South Giziga 2CH 10 Bible Online

2CH 10 - South Giziga bible

2CH 10

¹Roboˀam aru nga Sikem, asi Israyeley miram ɓa ngi caŋ buy na, a diga vuna.

²Amma Zeroboˀam, mangal ngi Nebak micina ɓi nah na, a mawa a muŋ. Asi naŋ a Ezipte, a kil nga diga zleˀe ti buy Salomoŋ.

³Akẽh na, a slinam mizli ɓa ara ziloko Zeroboˀama, dar a mawa. Ar nah so na, Zeroboˀam ati jum ngi Israyeley jom gar taŋ, a ɓaka Roboˀama na:

⁴«Bunuko zleˀe na, a guzuvura ndra le wãˀ kaɓa bekehey. Ani ka, wurenna so na, jijir migindiɗ asi ˀay ndra kaɓa galalaŋ na, da ki ga ndra di le kefek na, naɓa i sa gukuw gwat ka mawuɗo.»

⁵Roboˀam a mbiɗa taŋ di: «Gam hin makir ɓa kisa moko ng'avi ya.» Joˀ mizli a cohom.

⁶Akẽh na, buy Roboˀam ara ngil wuy avu mizli micawwahay magam slra ngi cine naŋ Salomoŋ zleˀe, ti naŋ misi ti siifa aruŋ na. A cufuɗa taŋ: «Vulikiy mi ngi kuti, mizli mucufuɗikiy na, i sa mbiɗa taŋ di mbrike?»

⁷A mbiɗakaŋ di: «Mizli tayna, da ki ra biga ki mbur magi mezle avu taŋ, ki ra ga taŋ gwat ngi cira hiri, yo ki ra ɓa taŋ ɓi mezlehey na, naɓa a sa ndiram ndrehhe i gawla ɗikey.»

⁸Amma, Roboˀam a ziriɗa mi ngi kuti ngi mizli micawwahay miɓakaŋ di tuwa, a cufuɗ mi ngi kuti avu ziri gawla mendele naŋhay, muroko angi slra naŋ.

⁹A ɓa taŋ na: «Mizli a cufuɗikiy ani: ‹Jijir migindiɗ asi ˀay ndra kaɓa galalaŋ, bunuk mika ndra di na, anja ɓa ki ga ndra di kefeke.› Kumo, vulikiy mi ngi kuti takwa. Taŋ mucufuɗikiy na, i sa mbiɗaka taŋ di mbrike?»

¹⁰Zir gawla mendele naŋhay tuwa, a mbiɗakaŋ di: «Mizli a ɓukuw: ‹bunuk a gi ti taŋ le kaɓa beke, yo a cufuɗukuw ɓa ki ga taŋ jijir taŋ na kefeke.› Amma kisa mbiɗa taŋ di ani kahana: ‹Muzuŋ haŋ ɗu meciɗeke, naŋ ɓiɓir fineˀ mitikinjaˀ ngi baha.

¹¹Baha a ɗuvukum jijir mududok dudok le gindiɗ asi ˀaya kaɓa galalaŋ, amma ya, yisa ɗuvukum jijir mududok gindiɗ asi ˀaya fineˀ nah. Baha a kutukum zleˀe ti laway, amma ya, yi sa kutukum ti laway dal misi ɓiri ameˀe.›»

¹²Angi hin mimakir naŋ na, Zeroboˀam ati mizli Israyele gar a moko lumaka Roboˀama kaɓa naŋ miɓa taŋ zleˀe: «Ki sa moko lumikiy ar hin mimakir naŋ» tuwa.

¹³Buyo, a mbiɗa mi da sukwi Israyele ti himaˀ. A ziriɗa mi ngi kuti ngi mizli micawwahay miɓakaŋ di na jaka.

¹⁴Mi ngi kuti ngi mendele naŋhay miɓakaŋ di tuwa na, a ɓi di i nah da mizli Israyele: «Baha a ɗuvukum jijir mudodok le gindiɗ asi ˀaya kaɓa galalaŋ, amma ya, yi sa ɗuvukum jijir mududok gindiɗ asi ˀaya fineˀ nah. Baha a kutukum zleˀe ti laway, amma ya, i sa kutukum ti laway dal misi ɓiri a meˀe.»

¹⁵Naŋ kine, buy a tiɓa mi ngi mizli ta. Nah na, i jiviɗ Bumbulvuŋ miɗiya kanah, ɓa mingiɓi naŋ miɓa ɗaˀ le da Zeroboˀam, mangal ngi Nebat na, a gi muduba, mingiɓi naŋ, mubo ti balam mijiviɗ Ahiya ngir walahay Silo tuwa.

¹⁶Mizli Israyeley gar, buy micina taŋ mi ta tuwa na, a mbiɗakaŋ di: «Na zle lum ndra i mi avu mizli ngi hay Daviteye ka? Ko gwat mujumo ndra ati mangal ngi Zese hana anta! Mizli Israyeley, anja mbur gar a mi ngi hay naŋ! Wurenna so na, ka dideˀ ngi Daviti, ka gi welele ti zumabuy ɗike.» Dar Israyeley gar a mam ngi hay taŋhay.

¹⁷Amma Roboˀama, ara zum buy naŋ ar Israyeley micifam ar walahayay misi angi hirwuy Zuda.

¹⁸Akẽh na, buy Roboˀam a slina Adoram, madiɗa ngi migi slrahay mitakˀaya, nga avu Israyeley, amma Israyeley gar a kuypakaŋ ti ɗugur. Buy Roboˀam vuna, a lih lihiriɓ kwic ngi jiɗ ŋgˀar pilis naŋ. A kil nga Zeruzaleme.

¹⁹Vurˀe, hã dana, Israyeley anta wuɗam ɓi ngi zumabuy ngi mizli ngi hay Daviteye ta.