Read South Giziga 2CH 11 Bible Online

2CH 11 - South Giziga bible

2CH 11

¹Roboˀam mindil ndil a Zeruzalem si na, a kus soje hirnga hirngahay durmuk skat ti kukur dangafaɗ ar sukwi ngi Zuda ati ngi Benjameŋ, nga kiɗa vu ati Israyele, ɓa zumabuy a mi ng'asi haŋ ngi Roboˀam.

²Amma Bumbulvuŋ a ɓa mingiɓi naŋ le da mijiviɗ Semaya. A ɓaŋ na:

³«Roboˀam, mangal ngi Salomoŋ, buy ngi Zuda, mizli ngi hay Zudahay ati ngi hay Benjameŋhey gar, waɗ is ngi mizli Israyeley gar na, ɓa taŋ:

⁴Bumbulvuŋ a ɓukum na: ‹Israyeleye, i sukum kumoy, anja ki ram nga kiɗa vu ati taŋ ta, anja mbur gar a mi nga hay naŋ, asi mislikiɗo ɓi misenna i yaha.›» Taŋ micinaka mingiɓi ngi Bumbulvuŋ tuwa na, a pulaka ru nga kiɗa vu ati Zeroboˀama.

⁵Roboˀam a cifi a Zeruzalem, a ndir walahayay mbeˀ mbeˀ asi ruwuy Zuda gun gun ti moholoy.

⁶A ndira Betelyem, Etam, Tekoˀa,

⁷Bet-Sur, Soko, Adulam,

⁸Gat, Maresa, Zif,

⁹Adorayim, Lakis, Azeka,

¹⁰Sora, Ayaloŋ waɗ Hebroŋ. Walahay muguno ti mohol tayna, taŋ angi hirwuy Zuda ati hirwuy Benjameŋ.

¹¹Roboˀam a ndir mohol migidaŋ gidaŋhay gun gun walahay tayna waɗ a cifi buy miwi lihey ar taŋ, yo a wi vu ti gwat ngi zumoy, mal waɗ mbaazla.

¹²Ar walahay gar na, mbarayay ati ziwitey ada. Roboˀam a ndira walahayaya le gidaŋ gidaŋ. Joˀ a zum buy angi hirwuy Zuda waɗ hirwuy Benjameŋ.

¹³Masayay ati levihey misi asi ruwuy Israyel gar na, a jumom ng'avu Roboˀama, jom ti hirwuy taŋhaya gar.

¹⁴Levihey a pulaka li jigin taŋhay ati gwat taŋhaya le, a ram nga Zuda waɗ nga Zeruzalem, asi Zeroboˀam ati ziri naŋhaya, a tikaka taŋ le, ɓa a gaka slra taŋ ngi gi mikuli da Bumbulvuŋ ta.

¹⁵Zeroboˀam a hil masay nga naŋhay le, ngi gi mikuli da kulihey, da bazuwayay ati ziri slahay naŋ mindira taŋ.

¹⁶Mizli ngir sukwi misi tir vay muŋ gar, muroko ti may ngi huruk huruk a mbuŋ Bumbulvuŋ Buymisemuŋ ngi Israyel na, a soko asi levihey nga Zeruzaleme, ɓa a gaka mikuli da Bumbulvuŋ Buymisemuŋ ngi dideˀ taŋhaya.

¹⁷A vulaka gidaŋ da zumabuy ngi ruwuy Zuda, yo a cicaka Roboˀam mangal ngi Salomoŋ solok hã vi makir, asi a sipa sar ngi Davit ati ngi Salomoŋ le, hã vi makir.

¹⁸Roboˀam a zuɓ ngi ngwasa i Mahalat, zuŋ ngi Yerimot, Yerimot mangal ngi Davit, a zilaka mumuŋ ngi Mahalata Abihayil, i zuŋ ngi Eliyap, mangal ngi Zese.

¹⁹Mahalat a yaŋ ziri mizilehey le, i ti: Yeˀuk, Semariya waɗ Zaham.

²⁰A dirba nah na, Roboˀam, a zuɓ Maˀaka, zuŋ ngi Absalom, Maˀaka a yaŋ Abiya, Atay, Ziza waɗ Selomit.

²¹Maˀaka, zuŋ ngi Absalomo, Roboˀam a wuɗaŋ haɗa fineˀ ngwas naŋhay ati ngwas mangasl naŋhaya ceke. Asi ngwas naŋhaya kuruˀ nga dangafaɗ waɗ ngwas mangaslaya kukur merkeɗ. A yi ziri mizileheye kukur cuw nga dangafaɗ waɗ ziri mongosohoy kukur merkeɗe.

²²Abiya mangal ngi Maˀaka, Roboˀam a cifaŋ i madiɗa angi sukum naŋhaya, asi a wuɗ ɓa a sa cifi di buy.

²³Ar wuluk naŋ na, a wuɗ ɓa a waha ziri naŋhaya cek ng'asi ruwuy Zuda ati hirwuy Benjameŋ gar, ng'ar walahay naŋ muguno taŋ ti moholoy cek. A vula taŋ gwatay haɗa ngi ngir ti naŋ, yo a vula taŋ ngwasay haɗa ma.