Read South Giziga 2CH 12 Bible Online

2CH 12 - South Giziga bible

2CH 12

¹Ti Roboˀam micifi le hǝrǝk hǝrǝk, gidaŋ gidaŋ ar buyo muduba na, a pula ɓimujuwa ngi Bumbulvuŋ, Israyeleye gar a gam ka naŋ na ya.

²Angi vi muzlum naŋ ngi zumabuy ngi Roboˀam na, Sisak buy Ezipte, a so zla gi vurum ti Zeruzaleme. A gi kanah na, asi Israyeley a gam gwat ngi ji mevel le da Bumbulvuŋ.

³Sisaka naŋ ti soje migi vurumoy durmuk ti skat skat cuw, misi pilisey durmuk kukur merkeɗ, waɗ soje mekelemey musoko ti Ezipte aseˀe, a slufam ta, i soje ngi ruwuy Libihey, Sukihey waɗ Etiyopihey.

⁴Sisak a tiɓa walahayay muguno ti mohol ngisi ruwuy Zudahaya, hã a ndil sesẽŋ a Zeruzalem.

⁵Akẽh na, mijiviɗ Semaya, a so ng'avi Roboˀam waɗ ng'avu buy ngi Zudahay mukusom a Zeruzaleme, asi buy Sisak ara gumbuˀ ng'avi taŋ. Simaya a ɓa taŋ: «Bumbulvuŋ a ɓukum na: ki pulikiy ya le. Na ya kwana, i pulukum le asi haŋ ngi Sisaka ya.»

⁶Buy Israyeley ati buy Roboˀama, a sinaka le a gam mungra le, a ɓam: «Bumbulvuŋ naŋ jeŋŋe.»

⁷Bumbulvuŋ mupura a sinaka a gam mungra le na, a ɓa mingiɓi ani da Semaya: «Ani a sinaka le a gam mungra le. Y'anta sa ngizla taŋ mata. Amma i wuɗ i laha taŋ wurenna, yo y'anta sa zuɓ himaˀ, ɓa Sisaka a ngizla Zeruzaleme mata.

⁸Gar ti nah kwana, a sa gam gawla ngi Sisakay gbaˀ na si ɓula, ɓa a sa sinaka gi gawla nga ya Bumbulvuŋ ati gi gawla ngi buy ngisi ruwuyoy na, taŋ wal wal.»

⁹Sisak, buy Ezipte a zla Zeruzaleme ngi kiɗa vu. A hila zlili ngir hay ngi Bumbulvuŋ ati zlili ngi hay buyo. A hila gwataya slar slar gar si, ko mbaray ngi ɓiri tapasl tapaslay, Salomoŋ muvuɗa taŋ na kwana, a hila taŋ le.

¹⁰Buy Roboˀam a vuɗ mbaray ngi ɓiri gazahay ar deɗe taŋ, waɗ a vula taŋ da madiɗa ngi sojehey majiginaka mizlingre ngi buyo.

¹¹Buyo, tapas naŋ mira ru ng'ar hay ngi Bumbulvuŋ gar na, sojehey a hilaka mbarayay tuwa, a ram taŋ ng'ar hay ngi sojeheye.

¹²Roboˀam a hin hirnga le, Bumbulvuŋ anta zuɓ himaˀ ar naŋ mata, naŋ anta ngizla taŋ leɗeɗ mata. Yo ma na, gwat mezlehey ada asi ruwuy Zuda vuna aruŋ.

¹³Roboˀam micifi buy a Zeruzalem na, naɓa naŋ ti vi kukur mufaɗ ngaŋ kaˀa. A zum buy a Zeruzaleme, naŋ gidaŋ gidaŋ ar zuma buyo. A zum buyo vi kuruˀ nga tarnaˀ a Zeruzaleme, walahay Bumbulvuŋ muwuna a wuzla walahay Israyeley gar, ɓa a ndir anga. A zilaka mumuŋ ngi Roboˀama Naˀama, i zuŋ Amoŋ.

¹⁴Roboˀam a gi malambaˀ le, asi a vula mevele ngi sipa Bumbulvuŋ ti mevel purla ta.

¹⁵Ɓi ngi slra ngi Roboˀam miga taŋ, zle angi zli virzi naŋ, hã avu kiɗa mi naŋ na, i mutoho taŋ le angi ɗerewol ngi slra ngi mijiviɗ Semaya waɗ ar ngi Ido, mbur mapur ti kleŋ. Kiɗavu ar wala ngi Roboˀam ati Zeroboˀam na, a zik ko mbak le anta.

¹⁶Roboˀama, ti naŋ mumuc na, a dikakaŋ ar walahay ngi Davit. Dar mangal naŋ Abiya a zum buy ar li naŋ.