Read South Giziga 2CH 13 Bible Online

2CH 13 - South Giziga bible

2CH 13

¹Angi vi mukuruˀ nga dangafaɗ ngi zumabuy ngi Zeroboˀam angi hirwuy Israyel na, Abiya a tiri buy madiɗa angi hirwuy Zuda.

²A zum buy a Zeruzaleme vi makir. Slimiɗ ngi mumuŋ naŋ i Mikaya, i zuŋ ngi Uriyel, mbur Gibeya. Abiya ati Zeroboˀama, a gam vurum ar wala taŋ.

³Abiya a zla vurumo ti soje hirngahay durmuk skat skat mufaɗ, i soje midar daray. Zeroboˀam kwana, a cinjih ngi kiɗa vu ati Abiya i soje naŋ muwuna taŋ ti wini, durmuk skat skat dangafaɗ, i soje miwirwirey.

⁴Muwã ada, a zilaka Semarayim, angi hirwuy muwã Efrayim, Abiya a cico deŋ anga, a ɓi: «Zeroboˀam ati kum Israyeley gar, cinam.

⁵Zuma buy ar Israyeleye, Bumbulvuŋ Buymisemuŋ ngi Israyele, a vula le wãˀ da Davite ati Ziri naŋhay na, ki sinaka ta kwa? I jumoˀay makiɗ mi ta.

⁶Amma Zeroboˀam, mangal ngi Nebat, gawla ngi Salomoŋ, mangal ngi Davite, a sli himaˀ, a mbiɗi hirnga le avu buy naŋ.

⁷Mizli misuweˀ lambaˀ, mizli ngi pula girey ta mukos kos a cikeˀe na, a tikakaˀay da Roboˀam, mangal ngi Salomoŋ. Roboˀam i zuŋ, ar kpak naŋ na, a sin ɓi t'aruŋ, a cici zlak a mbuŋ taŋ gu ta.

⁸Ani wurenna, ki ɓam ɓi ngi kiɗa vu ati zumabuy ngi Bumbulvuŋ misi asi haŋ ngi ziri ngi Daviteye kini kwa! Kum ani zigiduw taˀ, yo kum ada ti ziri sla ngi ɓiri tapasl tapaslay, Zeroboˀam muvuɗukum taŋ ar deɗe ngi kulihey.

⁹Migi mikuli ngi Bumbulvuŋhoy, ziri ngi Aroŋhoy waɗ leviheye, ki ɓulaka taŋ le, ɓa ki cam masay kumoyo i mizli ngi ruwuy mekelemey ta kwa? Da mbur a so le ti gusoŋ pal waɗ zlengerekey tarnaˀ si na, naɓa a tiri masay le da kuli tayna, misi i Buymisemuŋ ta na.

¹⁰Na ndra na, Bumbulvuŋ Buymisemuŋ ndra i naŋ, ndr'i pulakaŋ ta: masayay magaka mezegwel da Bumbulvuŋ na, i ziri ngi Aroŋhoy, yo i levihey, ara gaka slra taŋ!

¹¹A ra wuram gwat ngi mikuli mizlam zlam wãˀ da Bumbulvuŋ, vur miprik gar, vur pastaˀ gar. A ra wuram urdi mazĩˀĩ ndummo ma, ara pam ɗaf da Buymisemuŋ ar tabul manja dili , yo vur pastaˀ gar na, a jaka vu avu lampehey misi ar gwat ngi ɓiri tapasl tapasl ngi ɗuva lampeheye. Asi ndr'i gaka slra ngi Bumbulvuŋ Buymisemuŋ ndra, amma kumo, ki pulakaŋ le.

¹²Ani buy ndra i Buymisemuŋ, masay naŋhaya t'ani, a wam vu le ngi fi zara ng'ar kum. Israyeley, Bumbulvuŋ Buymisemuŋ ngi dideˀ kumoyo, ki kiɗam vu ati naŋ ta, asi kum anta sa ndilaka ta.»

¹³Zeroboˀam a slin ti sojehey weˀ vu gun ti dirba taŋ: Israyeleye taŋ tumbuŋ Zuda, yo soje muwam vu weˀ tuwa ti dirba taŋ.

¹⁴Soje ngi Zudahay a mbuɗam pulaˀ na, vurumo naŋ ti mbuŋ ti dirba. Dar a kilam widi ng'avu Bumbulvuŋ, naɓa masayay kwana ara faka zaraˀahaya.

¹⁵Mizli ngi Zudahay a hizigaka widi ngi vurum, taŋ mira wudam na, Buymisemuŋ ara ɓula Zeroboˀam ati Israyeleye gar a mbuŋ Abiya ati Zudahaya.

¹⁶Israyeley a kilam a mbuŋ zudahaya, joˀ Buymisemuŋ a vula taŋ asi haŋ taŋ.

¹⁷Abiya ati soje naŋhay a kiɗaka Israyeleye le haɗi. A kiɗam soje muwunahay ti wini vagay vagay durmuk skat skat zlum.

¹⁸Ti di nah na, Israyeley i mitikaˀayay le, Zudahay a tiram bugawlahay le ar taŋ, asi a gumbaˀam le gumbaˀ ti Bumbulvuŋ Buymisemuŋ ngi dideˀ taŋhay.

¹⁹Abiya a gidiɗa Zeroboˀam tuwa, a tiɓi walahayay le ava, i Betel, Yesana waɗ Efroŋ ati prok taŋhaya wãˀ wãˀ.

²⁰Ti Abiya mazum buy na, Zeroboˀam a lum gidaŋ ɗaˀ mata. A dirba nah, Bumbulvuŋ a kiɗaŋ, a mucu.

²¹Abiya jak na, ara lum gidaŋ. A zuɓ ngwasay kuruˀ nga mufaɗa, a yi ziri mizilehey kukur cuw nga cuw, waɗ mongosohoy kuruˀ nga merkeɗe.

²²Is ngi ɓi ngi slra Abiya miga, gwat madiɗahay, naŋ miga taŋ ati ɓi naŋ miɓa gar na, i mutoho le ar ɗerewol mazilaka ‹pulaˀvra› ngi mijiviɗ Ido.

²³Abiyam a mucu, a dikaka ar Walahay ngi Daviti. Mangal naŋ Asa a zuɓa li naŋ. Ti Asa mazum buy na, hirwuy a cifi setette ngi vi kuruˀu.