Read South Giziga 2CH 14 Bible Online

2CH 14 - South Giziga bible

2CH 14

¹Asa a gi gwat mezle, mikaslsla a mbuŋ Bumbulvuŋ Buymisemuŋ naŋ.

²A susuyumo li gi mikuli ngi mulakaya waɗ li miɗingir ɗingir ngi gi mikuli taŋhaya, a waha ɗugur mikaˀkaˀ haya, yo a buko kuli ɓamtalay avra.

³A ɓa Zudahaya, ɓa a sipam Bumbulvuŋ Buymisemuŋ ngi dideˀ taŋhay, yo ɓa a gam slra ti ɓimujuwa ati ɓimuɗuvahaya.

⁴Li miɗingir ɗingir ngi mikulihey gar ati li wura urdihey na, a susuyumo taŋ asi ruwuy Zuda cek. Ti naŋ mazum buyo, hirwuy a cifi zuy zuy.

⁵A ndir walahay muguno ti moholoy asi ruwuy Zuda, asi hirwuy a ro zuy zuy. Ti naŋ mazum buy na, ko ɓi ngi vurum anta ar vi tayna ta, asi Bumbulvuŋ a vulaŋ musukavu le.

⁶Asa a ɓa Zudahaya: «Ndurukum walahay hanayna, gunukum taŋ gun gun ti mohol, ndar ndar hay suburohoy, mizlingrehey kiɗasl kiɗasl avu taŋ, asi hirwuy ara musuk vu avu ndra aruŋ. Asi mike na, Bumbulvuŋ Buymisemuŋ ndra, i sipaka i sipaka na, i lumaka le, a vula ndra musuka vu le ti ka ti ka gar.» Dar a zlaka ndira walahayay tuwa, a gaka le gu.

⁷Asa naŋ ti sojehey durmuk skat skat makir, i mizli Zudahay, ti mbaray madiɗahay ati ziwitey, waɗ mizli Benjameŋhey durmuk skat skat cuw ti kukur dangafaɗ ti mbaray memeɗehey, yo a sinaka wi haŋ ti luvuto le. Taŋ gar i soje miwirwirey.

⁸Zera, mbur Etiyopi, a so zla kiɗa vu ati taŋ, naŋ ti soje miliyoŋ pal, mota ngi vurumoy skat skat makir. A ndilam sesẽŋ a Maresa.

⁹Asa a bo nga ji di hirnga, a cinjaham ati soje naŋhaya ngi kiɗa vu ar sozo ngi Sefata, gweˀ avu Maresa.

¹⁰Asa a tila mi da Bumbulvuŋ Buymisemuŋ naŋ, a ɓaŋ: «Bumbulvuŋ, mbur maci ar wala ngi mbur migidaŋ ati hĩhĩy kaɓa ka anta, sey ka. Jina ndra Bumbulvuŋ Buymisemuŋ ndra! Asi ndra mijaham jah na ti ka, yo ndra musoko nga kiɗa vu ati zigiduw mitaˀ hana na, ti slimiɗ ɗiki. Bumbulvuŋ, ki Buymisemuŋ ndra. Ki pula mbur a tikuwˀay ta.»

¹¹Bumbulvuŋ a kiɗa Etiyopihey a mbuŋ Asa ati soje Zudahaya. Joˀ Etiyopihey a kilam.

¹²Asa ati mizli ngi seˀehey tuwa, a gidiɗaka taŋ hã sesẽŋ a Gerar. A ndilam vu kuvbum ar Etiyopiheye, ko mbur mindir ti siifa loŋ anta. Asi Bumbulvuŋ ati soje naŋhaya, a musukuɗoko taŋ le burkuɗ. Mizli ngi Asahay a hilam gwatay ar vurumo haɗi.

¹³A kiɗaka walahayay migweˀ gweˀ avu Geraraya gar. Asi Bumbulvuŋ a ga le ɓa didak a muɗa taŋ, a zumaka walahayaya pay pay gar, asi zlili ada haɗi ngi zum ar walahay tayna.

¹⁴A zlaka kiɗa mijigina gineweye ma, a tiɓam tumuŋhoy,ˀaway waɗ zlogomohoy haɗi. A dirba nah, a mam nga Zeruzalem a muŋ.