Read South Giziga 2CH 15 Bible Online

2CH 15 - South Giziga bible

2CH 15

¹Azariya mangal ngi Odete, ˀUf ngi Buymisemuŋ a ci ava,

²a bi, ara luuma Asa, a ɓaŋ: «Ka asa ati mizli Zudahay waɗ Benjameŋhey gar, cinaka mingiɓi ɗu! Da kum ada ati Bumbulvuŋ na, naɓa naŋ da ati kumo. Da ki ra sipakaŋ na, a pulukum vu, ki lumakaŋ. Amma da ki pulakaŋ le fuk na, a pulukum fuko ya.

³Israyeley a zikam le haɗi, manja Buymisemuŋ migisiŋ gisiŋ, manja masayay ɓa a dubunaka taŋ gwata, yo manja ɓimujuwa.

⁴Amma taŋ misi ar bonoy na, a moko le ng'avu Bumbulvuŋ Buymisemuŋ ngi Israyeley. A sipakaŋ na, a pula taŋ vu, a lumakaŋ le.

⁵Ti di nah na, hirwuy anta setette, ɓa mizli a ram ng'ar li, yo a moko ta. Amma zluwun ara ga mizli ngisi ruwuyo gar jaka.

⁶Sukwi ati sukwi a kiɗam vu, walahay ati walahay cala, asi Buymisemuŋ a jijika taŋ le ti sukwi ngi bonoy wal wal.

⁷Amma kumo, cicam gidaŋ gidaŋ, ki hĩhĩyam ta, asi kisa lumam migir asi slra kumo!»

⁸Buy micina mingiɓi ngi mijiviɗ Azariya mangal ngi Odet tuwa cin cin na, a tum vu, a susuyumo kulihey misi asi ruwuy Zuda ati Benjameŋ gar, waɗ ngir walahayay naŋ mitiɓa taŋ a muwã Efrayime. A dirba nah, li gi mikuli da Bumbulvuŋ misi a mbuŋ jawleeru ngi Bumbulvuŋ na, a ɗiya hiri naŋ a muŋ.

⁹A kuso mizli Zudahay ati Benjameŋheye gar, waɗ jom ng'avi taŋ ma na, mizli Efrayimey, Manasehey waɗ Simeyoŋhoy mukuloko nga ɗumo. Asi mizli Israyeleye, diga ti taŋ mupuraka Bumbulvuŋ Buymisemuŋ naŋ da ati Asa na, a hinam hirnga wãˀ angi hirwuy naŋ.

¹⁰A kusom a Zeruzaleme angi kiya mimakir naŋ ngi vi mukuruˀ nga zlum ngi Asa mazum buyo.

¹¹Gwatay taŋ mulumoko taŋ ar vurum tuwa na, tapasa, a gam taŋ mikuli da Bumbulvuŋ: sla skat skat tarnaˀ waɗ tumuŋ ati ˀaway durmuk tarnaˀ.

¹²A ɓam ɓi ngi jumoˀay, ɓa a sipaka Bumbulvuŋ Buymisemuŋ ngi dideˀ taŋhaya ti mevel taŋ wãˀ waɗ ti membezleŋ ngi vu taŋ wãˀ.

¹³Da mbur mungum sipa Bumbulvuŋ Buymisemuŋ ngi Israyele ta na, a kiɗaka vagay. A zli avu zuŋ meciɗek muwãˀ, hã avu mbur micawwa, zle avu mbur mizile, hã avu ngwasa.

¹⁴A hudumom a mbuŋ Bumbulvuŋ ti widi cǝruw cǝruw, salalay, zara waɗ tulum.

¹⁵Mizli Zudahay gar a mumuloko hudum nah le. Taŋ muhudumom ti mevel taŋ wãˀ, yo taŋ misipakaŋ ti mevel taŋ wãˀ tuwa na, Bumbulvuŋ a pula taŋ vu, a lumakaŋ. Dar a vula taŋ ɓa a cifam zuy zuy ar maakway taŋhay gun gun gar.

¹⁶Maˀaka, dideˀ mongoso ngi Asa, slimiɗ naŋ ‹Maˀay Madiɗa› na, Asa a muɗaŋ di avra, asi Maˀaka a ɗiyi deŋ ngi kuli ngwas mukuyta wãˀ mazilaka Asera. Asa a ɓa mizli, a ngurfoko kuli mukuy ta nah, ara zlizliraka ar hurjijiŋ Sedroŋ.

¹⁷Asa, angi hin ngi siifa naŋ gar na, a wuɗ Bumbulvuŋ le ti mevel purla ngbaŋ. Amma ti nah gar na, li miɗingir ɗingir ngi gi mikulihey ar taŋ na, a susuymom avra ta.

¹⁸Gwatay, cine naŋ muvula taŋ zleˀe da Bumbulvuŋ ati misi naŋ vuna muvulaŋ taŋ: i ɓiri bara, ɓiri tapasl tapasl ati gazlangahay wal wal na, Asa a ɓa mizli, a soko taŋ ng'ar hay ngi Bumbulvuŋ:

¹⁹Hã a ndilaka vi mizli ngir makir nga zlum naŋ ngi buy Asa mazum buyo, ko vurum anta mata.