Read South Giziga 2CH 16 Bible Online

2CH 16 - South Giziga bible

2CH 16

¹Angi vi mizli ngir makir nga merkeɗ naŋ ngi zumabuy ngi Asa na, Basa, buy madiɗa ngi Israyel ara zla kiɗa vu ati hirwuy Zuda, waɗ a guno walahay Rama ti mohol gun, ɓa ngi disla jiviɗ a mbuŋ Asa, madiɗa ngi buy Zuda.

²Dar Asa a hil ɓiri bara waɗ ɓiri tapasl tapasl ar zlili ngir hay ngi Bumbulvuŋ waɗ ar zlili ngi hay buyo, a slin di da Ben-Hadat, buy madiɗa ngi Siri misi a Damas. A ɓaŋ na:

³«Ndirukum ti jumoˀay ar wala ndra, kaɓa cine ndrahay zleˀe na ya. I slinuw ti ɓiri bara ati ɓiri tapasl tapasl ani. Aru, ki ra puska jumoˀay kum ati Basa, buy Israyel na, ɓa a so gi vurum ati ya mata.»

⁴Ben-Hadat a tiɓa mi ngi buy Asa le. A slina madiɗa ngi soje naŋhay nga kiɗa vu ati walahay Israyeleye. Sojehey a tiɓaka walahay Yoŋ, Daŋ waɗ Abel-Mayim ati walahay Neftaliheye gar ati dirgwaɗ taŋhaya.

⁵Basa micina labara nah cin na, a pula guno walahay Rama ti moholo, a cica slra naŋhaya.

⁶Akẽh na, buy Asa a hila Zudahaya cek ng'avaŋ: a jijiraka ɗugur ati dum, Asa magun di mohol ngi Rama tuwa. Joˀ Asa a gun di mohol ngi walahay Geba ati Mispa.

⁷Ti di nah na, mijiviɗ, Hanani, a so luuma Asa, buy Zuda, a ɓaŋ na: «Ani, ka ki jih jah na ti buy Siri, mbak ti Bumbulvuŋ Buymisemuŋ ɗike le. Vurˀe, soje ngi buy Sirihey a laham le tisi haŋ ɗike.

⁸Mizli Etiyopihey ati Libiheye, taŋ zleˀe ti sojehey mbeˀ mbeˀ haɗa, yo taŋ ti mota ngi vurumoy ati misi pilisey haɗa takwa? Bumbulvuŋ muvuluw taŋ asi haŋ ɗik na, asi ka mijih jah ti naŋ na.

⁹Asi Bumbulvuŋ a bula hiri bal bal asi ruwuy gar na, ɓa ngi jina mizli muvulakaŋ mevel taŋ le taˀ wãˀ da naŋ. Na wurenna, ki gi gwat ngi gilaway le. Vurˀe, zle dana, mizli a sa gam vurum ti ka.»

¹⁰Asa a ji mevel ar mijiviɗ tuwa, a ɓa mizli, a kakaŋ ar dangay, asi mingiɓi naŋ na, a jaŋ mevel le. Hirak ti nah na, Asa a guzuvur cah a wuzla mizli.

¹¹Slra ngi Asa, zle ar zli virzi naŋ hã avu kiɗa mi naŋ na, i mutoho taŋ le ar ɗerewol ngi buy Zuda ati ngi Israyeleye.

¹²Asa a ki jiji ar vi mizli ngir makir nga ngoltir naŋ ar zuma buyo. A lum jiji madiɗa avu saraya. Ko gar ti jiji naŋ vuna kwana, a kil widi ng'avu Bumbulvuŋ ta na si, amma sey ng'avi misi slalakay.

¹³Asa a muc ar vi mizli ngir mufaɗ ngaŋ kaˀ ngi zuma buy naŋ.

¹⁴A dikaka ar vigiɗ, naŋ mila ti haŋ naŋ ar walahay ngi Davit. A dikaka ɓaˀ ar arngawo minaha mbaf ti urdihey wal wal waɗ gwatay wal wal haɗa, hĩˀĩ ngi gi da vagay ngi mburo waɗ a wuram urdi haɗa ti slimiɗ naŋ.