Read South Giziga 2CH 17 Bible Online

2CH 17 - South Giziga bible

2CH 17

¹Asa, mangal naŋ Zozafata, a zum buy ar li naŋ. Zozafat a cici gidaŋ gidaŋ avu Israyeleye.

²Ar walahay Zuda muguno ti moholoy gar na, a pi sojehey sek sek, yo a cifi buy miwi lihey ar hirwuy Zuda waɗ ar walahay Efrayimey, cine naŋ Asa mitiɓa taŋ na.

³Bumbulvuŋ naŋ da ati Zozafata asi gwat ngi gi naŋ, naŋ kaɓa ngi dideˀ naŋ Davit miga zleˀe ti naŋ micifi buy madiɗa wureˀ aruŋ. Naŋ a sipa kuli Baˀalaya ta.

⁴Amma a sipi nga naŋ i Bumbulvuŋ Buymisemuŋ ngi cine naŋ, yo a sipi ɓimuɗuva naŋhay, naŋ a gi gwat ka ngi Israyel vay muŋhoy na ta.

⁵Bumbulvuŋ a vula gidaŋ da zumabuy naŋ asi ruwuy naŋ, joˀ mizli Zudahay gar a soko ti gwat ngi vul taŋhay da Zozafata, hã a gi zlili haɗi, yo a lum dudok haɗi.

⁶A ra sipa jiviɗ ngi Bumbulvuŋ a mevele nga mbuŋ nga mbuŋ, hã a susuyumo li miɗingir ɗingir ngi gi mikulihey ati kuli ɓamtalaya cek asi ruwuy Zuda.

⁷Angi vi mimakir naŋ ar zuma buyo na, a slina mizli madiɗa ngi slra naŋhay nga dubuna gwat da mizli ar walahay Zudahaya, i ti: Ben-Hayil, Obadiya, Zakari, Netaneyel waɗ Mikaya.

⁸Mizli levihey ada ngoltir jom ati taŋ, i ti: Semaya, Netaniya, Zebadiya, Asayel, Semiramot, Yonataŋ, Adoniya, Tobiya waɗ Top-Adoniya, masayay ada cuw avu taŋ ma, i ti: Elisama waɗ Yoram.

⁹A dubunam gwat da mizli angi hirwuy Zuda, a ram ti ɗerewol ngi ɓimujuwa ngi Bumbulvuŋ a haŋ. A bulaka walahay ngi ruwuy Zudahaya bal bal gar ngi dubuna gwat da mizli.

¹⁰Bumbulvuŋ a ya zluwun cak cak da hirwuy ngir zumabuy ngi Zudahaya gar, mbak ko mbur matum vu ngi gi vurum ati Zozafata anta mata.

¹¹Ko Filistihey kwana, a sakaŋ ti gwat ngi vuloy, ɓiri bara waɗ laada. Ko Arapay kwana, a sakaŋ ti ginewey le ma: i zlengerekey durmuk tarnaˀ ti skat skat tarnaˀ, waɗ bazuwayay durmuk tarnaˀ ti skat skat tarnaˀ ma.

¹²Zozafat ara sik ti gidaŋ nga mbuŋ nga mbuŋ. Angi hirwuy Zuda, a ndir walahay muguno ti moholoy, waɗ walahayay ngi wi vu ti gwatay.

¹³A wi vu ti gwat ngi zumoy haɗa angi walahay ngi si ruwuy Zudahaya, yo a Zeruzaleme, naŋ da ti mizli mupuɗaw puɗaw ngi gi vurumoy.

¹⁴A ngicaka sojeheye vur hay taŋhaya vur hay taŋhaya: angi sukwi ngi Zuda, madiɗa ngi soje durmuk durmuk ada, i ti: Adna, a wi soje miwirwir migi vurumoyo durmuk skat skat makir.

¹⁵A cikeˀe kwana, i Yohanaŋ, a wi soje durmuk skat skat cuw ti kukur dangafaɗ,

¹⁶yo Amasiya, mangal ngi Zikri, a vula vu naŋ ngi mongoy naŋ ngi gi slra ngi Bumbulvuŋ, a wi soje miwirwir migi vurumoyo durmuk skat skat cuw.

¹⁷Angi sukwi ngi Benjameŋ, i Eliyada, soje miwirwir ngi vurum, a wi soje misi gulumoy a duba waɗ misi mbarayay mujuwam vu le, durmuk skat skat cuw.

¹⁸A cikeˀe kwana, i Yozabat, a wi soje durmuk skat ti kukur dangafaɗ, mizli mujuwam vu le ngi kiɗa vu.

¹⁹Sojehey magam slra ngi buy a Zeruzaleme i tayna so. Sojehey buy mipa taŋ ar walahay muguno ti moholoy misi asi ruwuy Zuda gar na, a slufaka taŋ ta.