Read South Giziga 2CH 18 Bible Online

2CH 18 - South Giziga bible

2CH 18

¹Buy Zozafata a gi zlili haɗi, yo naŋ ti dudok haɗi. Zozafata, muy naŋ ati ngi Akapa, a jumom le ti ɓi ngi zuɓa ngwas.

²Vi diɓarra a dirba nah na, Zozafat ara luuma Akap a Samari. Akap a slaŋ ˀay ngi tumuŋhoy, ˀaway waɗ slahay haɗi ngi tiɓaŋ mulak ati ngi mizli ngi seˀeheye gar. Dar Zozafat a tiɓa mi ngi Akapa, ɓa a ram cuwa nga kiɗa vu ati walahay Ramot, hirwuy Galaˀata.

³Akap, buy Israyele, a ɓa Zozafat, buy Zuda na: «Ɓa i ram cuwa nga Ramot, hirwuy Galaˀata na, ki ngum kwa?» Zozafat a mbiɗaŋ di: «Ndra ati ka i misi purla, mizli ɗuwoy i mizli ɗikey, a kum cuwa ng'ar vurumo.»

⁴Zozafat a ɓa Akap, buy Israyele ma: «Inga cufuɗa Bumbulvuŋ ɗagay sini.»

⁵Buy Israyel tuwa, a kuso mijiviɗeye, taŋ skat skat mufaɗa, a cufuɗa taŋ: «Ani zliv i ra gi vurum ati Ramot, hirwuy Galaˀat na kwa malla i pula ɓi nah teˀ kwa?» Mijiviɗey a mbiɗakaŋ di: «Aru, Bumbulvuŋ a sa vula Ramot asi haŋ ɗike, buy.»

⁶Amma Zozafat a cufuɗa buy Akapa: «Mijiviɗ ngi Bumbulvuŋ mekelem anta aka takwa? Anja i cufuɗaka Bumbulvuŋ ava.»

⁷Akap, buy Israyel a mbiɗaŋ di: «Mbur mekelem ada aka, anja zliv i cufuɗaka Bumbulvuŋ ava gu, amma ya i wuɗ ɓi naŋ ta, asi naŋ anta ɓi ɓi mezle masa gi ar ya ta, amma ndrehhe na, sey ɓi malambaˀ tewle: i Mise, mangal ngi Imla.» Dar Zozafat a ɓa Akapa: «Kay, ka buyo, anja ki ɓi kanah ta!»

⁸Buy Israyel a slin mbur migi slra naŋ purla nga zilo Mise, mangal ngi Imla tuwa kutum.

⁹Buy Israyel ati Zozafat buy Zuda, cuw taŋ a cifam le joˀ joˀ, mbur gar ar janga nga naŋ buyo, zana ngi buyoy ɓaˀ ɓaˀ avu vu, taŋ a mizlingre ng'ar walahay Samari. Naɓa mijiviɗeye gar ara tilam mi a mbuŋ taŋ akẽh ti ɓi Buymisemuŋ minjika taŋ di.

¹⁰Sidekiya, mangal ngi Kenaˀana, a ɗiyi durum ngi ɓirihey le, a ɓi: «Bumbulvuŋ a ɓi na: ‹Ki sa zliga soje Siriheye ti durum hanayna, hã ki kiɗa mi taŋ.›»

¹¹Dar mijiviɗ mekelemey gar a ɓam di i mi mupurla ani: «Aru nga gi vurum ati Ramot, hirwuy Galaˀata. Ki sa lum bugawla, Bumbulvuŋ a sa vuluw di asi haŋ ɗike, buy.»

¹²Mislin muru nga zila Mise tuwa, a ɓaŋ na: «Cina ɗi, mijiviɗeye gar taŋ, ani ˀay taŋ jom purla ngi njika ɓi ngi gwat mezle masa gi avu buyo. Anja mingiɓi ɗik a zlir kasl ati nga taŋ na ya! Ɓi di i ɓi mezle masa gi avu buyo!»

¹³Mise a ɓi: «Kaba ti Bumbulvuŋ, misi ti siifa gisin na! I sa ɓi di i ɓi Buymisemuŋ ɗu masa ɓiy di na tewle.»

¹⁴Mise a ndilo avu buyo, buy a cufuɗaŋ: «Mise, ani zliv i bam nga gi vurum a Ramot, hirwuy Galaˀat na kwa malla i pula ɓi nah teˀ kwa mbrike?» Mise a mbiɗaŋ di: «A ram, kisa lumam bugawla. Buymisemuŋ a sa vula mizli asi haŋ kumo.»

¹⁵Amma buy a mbiɗaŋ di: «I sa hudumuw sar kite ɓa ki ɓiy kaslsla ti slimiɗ ngi Bumbulvuŋ ka?»

¹⁶Akẽh na, Mise a mbiɗaŋ di: «Yi pura Israyeleye, a zliɗam hirnga le nga muwãhay, kaɓa tumuŋhoy manja mijigin. Joˀ Bumbulvuŋ a ɓi: «Mizli tayna, buy taŋ anta. Anja mbur gar a mi ngi hay naŋ zuy zuy!»

¹⁷Ar nah na, buy Israyel tuwa, a ɓa Zozafata: «Yi ɓuw le takwa! N'anta njik ɓi mezle vur ya ta kini, sey ɓi malambaˀa.»

¹⁸Mise a mbiɗaŋ di ma: «Haˀaw, cine mingiɓi ngi Bumbulvuŋ. Yi pura Bumbulvuŋ le ar janga naŋ ngi buyo. Yo gawla naŋhaya, dedeŋ dedeŋ tir vay hazum waɗ tir vay gula naŋ a muŋ.

¹⁹Bumbulvuŋ a ɓi: ‹Masa tikina Akap ɓa ara zla kiɗa vu ati Ramot hirwuy Galaˀata, yo ɓa a kiɗaka vagay a diga na i waka?› Mbur gar, a zil mi pal avu ngi cala avu ngi cala.

²⁰Dar ˀUf ara cici a mbuŋ Bumbulvuŋ, a ɓi: ‹Y'ani, i ra tikinaŋ.› Bumbulvuŋ a ɓaŋ: ‹Ki sa ra tikinaŋ ti jiviɗ wanaka?›

²¹A mbiɗaŋ di: ‹I bi, i ru, i ca wuluk ngi slir a balam mijiviɗ naŋhaya gar.› Bumbulvuŋ a mbiɗaŋ di: ‹Hana i jiviɗ mezle ngi tikin naŋ, ara ga kanah so.›

²²Da Bumbulvuŋ a ca wuluk ngi slir le a balam mijiviɗ ɗikeye gar na, kite i naŋ vuna mislino mendere ng'ar ka takwa!»

²³Neˀ na, Sidekiya, mangal ngi Kenaana, a kiroho ng'avu Mise, a caŋ babarva paw, a ɓaŋ: «ˀUf a bi ti dama tivi ya, ɓa ara ɓuw ɓi ka?»

²⁴Mise a mbiɗaŋ di: «Haˀaw ɓula! Tapas ka masa ru ti ɗum ar li mukulkuc wãˀ a viŋ na, kisa sla wala ngi ɓi hana.»

²⁵Akẽh na, buy a ɓa gawla naŋhaya: «Jaka Mise na, a ram di da Amoŋ, buy ngir walahay, waɗ da yarama Yoˀas.

²⁶Ki sa ɓa taŋ na: ‹Buy a ɓukum: caka mbur misenna ng'ar dangay, vulakaŋ gwat ngi zumo neˀkini waɗ yam frew si, sey da ya mumo le jam tir vurumo far.›»

²⁷Mise a mbiɗaŋ di: «Da ki mo le jam jam na, naɓa mingiɓi mubo ti balam ɗu na, i mingiɓi ngi Bumbulvuŋ ta.» Waɗ a ɓi ma: «Kum mizli gar, cinaka kuy kuy.»

²⁸A dirba nah na, buy Israyel ati Zozafat, buy Zuda, a ram nga gi vurum a Ramot, hirwuy Galaˀata so.

²⁹Ti taŋ ma ram na, buy Israyel a ɓa Zozafata: «I mbiɗa zanahaya, ɓa a sinikiy ta, ɓa i ci nga wuzla vurumo, amma ka, ka zana ɗik ngi buyoyo ɓula.» Joˀ buy Israyel a mbiɗa zanahaya, ɓa a sinakaŋ ta, a ci nga wuzla vurumo.

³⁰Dambalaka, buy Siri a ɓi le ɗaˀ le da buy ngi mota ngi vurum naŋhay mizli ngir makir nga cuw na, a ɓa taŋ zleˀe: «Ko ki kiɗam vu ati sojehey malla madiɗa ngi sojehey ta, amma sey ati buy Israyel tewle.»

³¹Vurˀe, buy ngi mota ngi vurumoyo mupuraka Zozafata keɗ na, a zlaka a ɓam: «Ngi diga na, i buy Israyel tuwa,» a gunoko hirnga naŋ gun, ɓa ara kiɗakaŋ. Zozafat a hiziga widi ngi vurum kaˀ. Amma Bumbulvuŋ Buymisemuŋ a jinaŋ, dar a pulakaŋ, a mam.

³²Buy ngi mota ngi vurumoy mupuraka i buy Israyel ta tuwa na, a pulakaŋ, dar a mam.

³³Soje Siri a mula luvuto lambaˀ si na, luvut a so mula buyo tir mizlir ngi mbaray naŋ. Buy a ɓa mbur misi mota ngi vurum naŋ: «Mo nga dirba, bi ti ya ti wuzla vurumo, asi a gikiy waˀa le.»

³⁴Tapasa, kiɗa vu a bul vu le culok wãˀ, hã buy a ndir a hur mota ngi vurum naŋ, hiri pulaˀ ng'ar Siriheye, hã pastaˀa. A dirba nah, ti pas madiɗ na, a mucu.