Read South Giziga 2CH 19 Bible Online

2CH 19 - South Giziga bible

2CH 19

¹Zozafat, buy madiɗa ngi Zuda, a mi zuy zuy ngi hay naŋ a Zeruzaleme.

²Mijiviɗ Yehu, mangal ngi Hanani, a so ji hirnga ti buy Zozafata, a ɓaŋ: «Ki jiniˀis ngi ɗike asi misi moˀorehey kwa? Yo ki wuɗ ngi ɗik i mesene ngi Bumbulvuŋhoy kwa? Bumbulvuŋ a ji mevel le ar ka vurˀe.

³Na kwana, ki gi gwat mezlehey le ɓula, ki wura kuli ɓamtalay misi asi ruwuyo le, yo ki tus didak le tos ngi sipa Buymisemuŋ ti mevel purla.»

⁴Zozafat a cifi ti hay naŋ a Zeruzalem. A dirba nah, a bula hirwuy naŋ, zle a Berseba, hã sesẽŋ a muwã Efrayime, a mo ti mizli a muŋ ng'avu Bumbulvuŋ Buymisemuŋ ngi dideˀ naŋhaya.

⁵A ci migi kiitahay asi ruwuyo, a cifa taŋ ar walahay Zuda muguno ti moholoy gar, vur walahaya vur walahaya.

⁶A ɓa migi kiitahaya na: «Jam lesl avu gwat kum masa gaka, asi kisa gaka kiitakaɓa ngi mizli magaka ta, amma ti slimiɗ ngi Bumbulvuŋ, asi masa ndir ati kum ar slra ngi gi kiita i naŋ.

⁷Na wurenna, zluwunam ti Bumbulvuŋ kuy kuy! Zluwun ti Bumbulvuŋ, jaka ɓi nah a hirnga, yo gam di slra! Asi Bumbulvuŋ Buymisemuŋ ndra na, ɓi mijeŋ ta, pura mbur ti pur, hirya mbur ti vula gwat ngatara na, anta avu naŋ ta.»

⁸Ko a Zeruzalem kwana, Zozafat a cifi levihey le ati masayay waɗ buy ngi Israyeley, ɓa ngi gi kiitaka jiviɗ ngi Bumbulvuŋ mawuɗ, yo ɓa ngi jumoˀay ngi mizli Zeruzalemeye.

⁹Zozafat a ɓa taŋ ɗaˀ ɗaˀ le ani: «Ki sa gaka gwata ti zluwun ti Bumbulvuŋ, ti gi teŋteŋ waɗ ti mevel purla.

¹⁰Sukum kumoy, misi ar walahay taŋhaya, da taŋ musoko ti kiita le gar nga mbuŋ kumo na, da i ɓi ngi kiɗa hirnga malla da i ɓi vur ɓimujuwa, ɓimuɗuva, ɓi micica malla ɓi ngi sirik kwana, dubunaka taŋ jiviɗ nah, vur taŋ masa hiryam ɓi avu Bumbulvuŋ, yo vur naŋ masa ji mevel ar kum ati sukum kumoyo. Gaka kanah, naɓa kum anta sa hiryam ɓi ta.

¹¹Amariya, masay madiɗa a sa cifi i madiɗa kum vur ɓi ngi Bumbulvuŋ gar, yo Zebadiya, mangal ngi Ismayel, mbur miɓaˀ ngi mbuŋ sukwi ngi Zuda na, i madiɗa kum, vur ɓi ngi buy ngi buy gar. Leviheye, a sa ndiram avu kum i mutoho gwatay. Tumom vu, yo gam slra! Mbur masa gi gwat mezle na, anja Bumbulvuŋ a ndir ati naŋ so!»