Read South Giziga 2CH 2 Bible Online

2CH 2 - South Giziga bible

2CH 2

¹Salomoŋ a hil mizli durmuk kukur tarnaˀ ngi jijira gwatay, mizli durmuk kukur dangafaɗ ngi ciɗa ɗuguroy a muwã, waɗ mizli durmuk makir ti skat skat merkeɗ ngi jigina migi slrahay.

²Salomoŋ a slin ng'avi Hiram buy madiɗa ngi ruwuy Tir, ɓa a ɓakaŋ: «Zleˀe na, ki jina cine ɗu Davite le ti dum ngi miterey ka mislinaŋ taŋ, ɓa ngi ndira hay ngi hin naŋ na.

³Naŋ kine, y'ani i wuɗ i ndir hay ngi tumbulo Bumbulvuŋ Buymisemuŋ ɗu, ɓa i vulaŋ di, ɓa a wurakaŋ urdihey a ra, ɓa a vulakaŋ gwat ngi mikulihey anga ko mbak le ta, yo ɓa a gakaŋ mikuli mizlam zlam wãˀ magaka ti miprik, ti pastaˀ, tapas sabat, ti hin mudumbuŋ ngi kiya gar, waɗ tapas muguzlum ngi Bumbulvuŋ Buymisemuŋ ndra, a sa gi ndrehhe kahana asi ruwuy Israyele.

⁴Hay ya mawuɗ ngi ndira vuna, naŋ madiɗa haɗa, asi Buymisemuŋ ndra i madiɗa fineˀ kulihey gar.

⁵Na zle, mbur mindila ngi ndiraŋ hay gu i wa ska? Asi muŋ, ti naŋ mihaɗi na tekeɗe kwana, a ndilaŋ ngi cifi joˀo gu ta. Yi wa ɓa hã i ndiraŋ haya na ka? Sey da hay ngi wuraŋ urdihey far kwa ta na.

⁶Wurenna so na, sliniy ti mbur misina slra ngi ɓiri tapasl tapasl, ngi ɓiri bara, ngi ɓiri gaza, ngi ɓiri ho gar, misina ji gabaga munduva cihhe, gagaza mindezze waɗ gagaza miwitwit, yo mbur misina ciɗa gwatay le, a sa jumom ati misina ɗiya gwatay misi a ciki ɗu a Zuda waɗ a Zeruzalemey aka, mizli baha Davit miwi taŋ vu zleˀe si.

⁷Yo sliniy ti dum ngi miter, dum migidaŋ mimezle waɗ ngi saŋtal ti Libaŋ ma. Asi i si na le, gawla ɗikey, a sinaka buko dum ngi Libaŋ le, yo gawla ɗuwoy a sa ram bummoˀ ati gawla ɗikeye,

⁸ɓa a wikiy vu ti dumo haɗa, asi hay ya mawuɗ i ndira na, i hay madiɗa, mukuy haɗi.

⁹Munguma dumoyo, ya kwana i sa vula taŋ ngi zumo, i hapa ngi alkamari ton durmuk merkeɗ, hapa ngi daw giziŋ, ton durmuk merkeɗ, mbaazla litir durmuk skat skat dangafaɗ waɗ mal, litir durmuk skat skat dangafaɗ.»

¹⁰Hiram, buy ngi ruwuy Tire, a mbiɗa mingiɓi da Salomoŋ toh toh ti tuh, a ɓaŋ: «Bumbulvuŋ mucufuw buy ngi mizli naŋhay na, asi ara wuɗ taŋ.»

¹¹Hiram tuwa, a ɓi ma: «Sise da Bumbulvuŋ Buymisemuŋ ngi Israyel, miga muŋ ati ruwuy, muvula mangal misi sinmijileŋ da Davit, mangal misi wer, misi lesl, masa ndiruw hay da ka Bumbulvuŋ, waɗ hay ngi buy da naŋ vuna.»

¹²Wurenna, y'ani i slinuw ti mbur misina gi gwat ti lesl haɗa so, i Huram-Abi.

¹³Mumuŋ i zuŋ ngir sukwi ngi Daŋ, yo cine kwana i mbur Tir. A si na slra ngi ɓiri tapasl tapasla le, ngi ɓiri bara, ɓiri gaza, waɗ ngi ɓiri ho gar, yo ciɗa ɗugur ati dum, ji gabaga munduva cihhe, gagaza wit wit, gabaga mislirkeɗ waɗ gabaga munduva ndezze gar na, a si na slra nah le. Ciɗa gwatay wal wal gar, slra ngi gi ngi gi gar masa pulakaŋ di asi haŋ naŋ gar na, a si na taŋ le. A sa gaka slra jom ati mizli ɗikey misina gwat ngi gihey waɗ ngi buy kumani ɗu, bunuk Davit miwi taŋ vu na.

¹⁴Ka kwana buy ɗu, alkamari, daw giziŋ, mal waɗ mbaazla ka miɓa ɓi naŋ tuwa na, slino di slin le da gawla ɗikeye.

¹⁵Dum ngi muwã Libaŋ, i sa ngumukuw di ka mevel ɗik muwuɗ le gar, yo i sa juwaka taŋ, i pukuw taŋ capap capap ar mubuliy sesẽŋ a Zafa, ka kwana, kisa jijira taŋ nga Zeruzaleme ya.»

¹⁶Salomoŋ a slufa mulakay misi asi ruwuy Israyele cek kaɓa cine naŋ Davit muslufa zleˀe na, mulakaya taŋ durmuk skat ti kukur zlum nga makir, ti skat skat merkeɗe.

¹⁷Salomoŋ a hil mijijira gwatay asi taŋ, durmuk kukur tarnaˀ, miciɗa ɗuguroy a muwã durmuk kukur dangafaɗ, waɗ durmuk makir ti skat skat merkeɗ ngi jigina mizli ɓa a gam slra.