Read South Giziga 2CH 20 Bible Online

2CH 20 - South Giziga bible

2CH 20

¹A dirba nah na, Moˀapay ati Amoŋhoy, waɗ Maˀoŋhey ng'avi taŋ, a kusom nga gi vurum ati Zozafat.

²Mizli a soko faka ɓi nah da Zozafata, a ɓakaŋ: «Sojehey hiɗim hiɗim, a soko le ti duba mubuliy, ti ruwuy Edom nga gi vurum ati ka. Taŋ ani wurenna a Hasasoŋ-Tamar, a mbiɗeˀvra En-Gedi.»

³A ga zluwun le da Zozafata, a wuluk a mevele ɓa a cufuɗa Bumbulvuŋ, yo a til mi ɓa mizli ngi ruwuy Zuda gar, a gam dalyam.

⁴Zudahay a kusom ɓa a tumbuloko Bumbulvuŋ, a soko tir walahay ngi si ruwuy Zuda gar, ɓa ngi tumbulo Bumbulvuŋ.

⁵Zozafat a cici deŋ a wuzla Zudahay waɗ a wuzla Zeruzalemey, hiri pulaˀ ng'ar wazlaray nawayaŋ a hay Bumbulvuŋ,

⁶a ɓi: «Bumbulvuŋ Buymisemuŋ ngi dideˀ ndrahay, misi a muŋ, yo mawa zumabuy ngi sukwi ngi si ruwuy gar na, i ka takwa? Gidaŋ ngi vu ati gidaŋ ngi wi mizli taŋ asi haŋ ɗiki, ko mbur mazlir dibiɗ ati ka gu anta.

⁷Buymisemuŋ ndra muɓula mizli ngi si ruwuy hana avra a mbuŋ Israyele mizli ɗikey, yo muvula hirwuyo wãˀ da dideˀ ngi ngama ɗik Abrahamay na, i ka takwa?

⁸A pam le anga, yo a ndirukuw hay le anga da ka, a ɓam:

⁹Da gwat ngi mendere a ndilo le avu ndra, kaɓa ani: kiɗ ti maslalam, bonoy, jiji mozorbono malla may na, i sa soko cicam a mbuŋ ɗik avu hay hana, asi k'ada angaŋ, yo ar bonoy ndra, da i wudam le ng'avi ka na, naɓa kisa cine ndra di, dar kisa laha ndra.

¹⁰Na wurenna, pura Amoŋhoy ati Moˀapay waɗ Edomoy mazlam ndra ngi kiɗa vu. Ti di dideˀ ndrahay muboko ti Ezipte na, ki pula taŋ jiviɗ ɓa a cam sar ng'asi ruwuy taŋ ta. Joˀ dideˀ ndrahay a zuɓam jiviɗ mekelem, ko a ngizlaka taŋ ta ngbaŋ.

¹¹Pura mizli tayna ɗi, ar deɗe ngi wuruk ndra na, a wuɗam ɓul ndra tir hirwuy ka muvula ndra di na!

¹²Buymisemuŋ ndra, kisa ga taŋ kiita da taŋ ta kwa? Asi sojehey mihiɗim hiɗim hana, masoko nga zlir dibiɗ ati ndra na, gidaŋ ndr'anta a mbuŋ taŋ ta, yo i sinaka i gam kini mata. Ammahiri ndra a ro taˀ ar ka.»

¹³Mizli Zudahay gar ati hay taŋhay, ngwas taŋhay waɗ ziri taŋhaya, a roko deŋ ti deŋ, yom a mbuŋ Bumbulvuŋ.

¹⁴Akẽh na, a wuzla mizli mukusomo, ˀUf ngi Bumbulvuŋ a ci avu Yaziyel, mbur levi, mangal ngi Zakari, yo i dideˀ ngi Benaya, Benaya vuna i mangal ngi Yehiyel, dideˀ ngi Mataniya, tizer ngi Asaf.

¹⁵Yaziyel a ɓi: «Kum mizli Zudahay, Zeruzalemey waɗ buy Zozafat, jam lesl gar kumo! Bumbulvuŋ a ɓukum na: Ki zluwunam ta, anja didak a muɗukum ti sojehey mihiɗim hiɗim haɗa hanayna ta, asi vurum hana, i vurum kum ta, amma i vurum ngi Buymisemuŋ.

¹⁶Tiprike, kisa pam sar nga zlir dibiɗ ati taŋ. Puraka, t'ani ara jiɗoko tir li jiɗ ngi Mufuyukoy. Ki ra jam taŋ hirnga a mi hurjijiŋ mupuɗak angi wuzlaɓuh mikirɗak kirɗak ngi Yeruyel na.

¹⁷Kum anta sa giram vu ngi kiɗa vu ati taŋ ta. A ram, cicam dedeŋ, yo Bumbulvuŋ masa lum bugawla ar taŋ vur kum na, kisa puraka ti hiri tew si. Kum Zudahay, Zeruzalemey, ki zluwunam ta, didak a muɗukum ta. Tiprike, bam nga mbuŋ taŋ, Bumbulvuŋ a sa ndir ati kum.»

¹⁸Zozafat a huruk huruk waɗ huruk a mbuŋ Bumbulvuŋ, yo mizli Zudahay gar waɗ Zeruzalemey kwana, a huruk hurukam waɗ huruk huruk a mbuŋ Bumbulvuŋ.

¹⁹A dirba nah, levi, muy ngi Kehatay ati ngi Korehey, a slikiɗam, a hunumaka Bumbulvuŋ Buymisemuŋ ngi Israyele ti ˀay ngar ngar.

²⁰Cẽẽt ngi li naŋ muwun na, mizli a slikiɗam, a bam nga wuzlaɓuh mikirɗak kirɗak ngi Tekoˀa. Taŋ macohom le na, Zozafat a slikiɗ, a ɓa mizli na: «Kum Zudahay ati Zeruzalemey, cinaka mingiɓi ɗu ɗi! Pulaka mevel kumo mbak da Bumbulvuŋ Buymisemuŋ kumo, naɓa kisa lumam gidaŋ. Pulaka mevel kumo mbak da mijiviɗ naŋhaya, naɓa kisa lumam bugawla.»

²¹Dar Zozafat a ngiɓam ˀay ati mizli, a pam mizli dimisey sek a mbuŋ sojeheye waɗ zana ngi mezegwel ɓaˀ ɓaˀ avu vu ngi hunuma Bumbulvuŋ ti dimisi, a ɓam: «Hunumaka Buymisemuŋ, asi wuɗa vu naŋ anta kiɗ mi ta.»

²²Hirak ti mizli dimisey mizlaka ji salalay ngi hunuma vu na, Bumbulvuŋ a so ti wunkaˀay ar wala ngi Amoŋhoy ati Moˀapay waɗ Edomoy musoko nga kiɗa vu ati Zudahay tuwa, dar a zlaka kiɗa vu ar wala taŋ.

²³Amoŋhoy ati Moˀapay, a mbiɗam pulaˀ ng'ar Edomoyo, a kiɗaka taŋ, a ngizla taŋ kap wãˀ. A dirba taŋ mikiɗaka mi ngi Edomoy na, a mbiɗam pulaˀ, a ngizlam vu taŋ tehhe a muŋ.

²⁴Zudahay mindilam ar ɗigar misi wuzlaɓuh a pur na, keɗ keɗ mesene taŋhaya na, i vagay taŋhay siɓilak a ruwuyo, ko mbur misi ti siifa loŋ anta!

²⁵Dar Zozafat ati mizli naŋhaya, a soko hilaka gwat taŋhaya. A lumam ginewey haɗi, zlili, zanahay waɗ gwat mupuɗaw puɗaway. A hilaka taŋ da taŋ, hã a jijiraka taŋ gu ta, asi gwataya haɗa, a gam hin makir ar li hil taŋ.

²⁶Ar hin mumufaɗ naŋ na, a kusom ar sozo Beraka, a gaka sise da Bumbulvuŋ a diga. Vurˀe, sozo nah, hã dana, a zilaka «sozo Beraka.»

²⁷Mizli Zudahay ati Zeruzalemey gar, waɗ Zozafata ɓaˀ a mbuŋ taŋ, a mam nga Zeruzaleme ti mumul. Asi mike na, Bumbulvuŋ milaha taŋ tisi haŋ ngi mesene taŋhay na, a vula taŋ mumul le haɗi.

²⁸Dar a cam nga Zeruzaleme ti kiɗa gujuvur, kããku, ti fi za ra, hã ara ndilaka hay ngi Bumbulvuŋ.

²⁹Zluwun ti Buymisemuŋ a ga mizli ngi si ruwuy mekelemeye gar, asi taŋ micinaka, Bumbulvuŋ a kiɗa mesene ngi Israyeleye le.

³⁰Naŋ kine, zumabuy ngi Zozafata, a cuh ti setette, yo Buymisemuŋ naŋ a vulaŋ jam le ati mizli ngir maakway naŋhaya gun gun gar.

³¹Zozafat, mangal ngi Asa, ti naŋ micifi buy madiɗa Zuda na, naɓa naŋ ti vi kukur makir nga zlum. A zum buy a Zeruzaleme, vi kukur cuw nga zlum. A zilaka mumuŋ Azuba, i zuŋ ngi Sili.

³²Zozafat a sipi di i jiviɗ ngi cine naŋ Asa, ko a ngizli neˀ le ta. A gi di i gwat macira hiri da Bumbulvuŋ.

³³Na gar ti nah kwana, li miɗingir ɗingir ngi gi mikuliheye, a susuyumo taŋ avra ta, yo naɓa mizli a vulaka mevel taŋ taˀ wãˀ da Buymisemuŋ ngi dideˀ naŋhaya t'aruŋ.

³⁴Is ngi slra ngi Zozafat miga taŋ, zle avu zli virzi naŋ, hã avu kiɗa mi naŋ na, i mutoho taŋ le angi ɗerewol ngi Slra ngi Yehu, mangal ngi Hanani. Yo a caka taŋ le ng'ar ɗerewol ngi buy Israyeleye ma.

³⁵A dirba nah, Zozafat buy Zuda, a jumom ati Ahaziya, buy Israyel. Gwat ngi gi ngi Ahaziya na, i malambaˀa.

³⁶A jumom ati Ahaziya ɓa a ɗiyam palalam ngi yamay ngi ru nga Tarsis. A ɗiyaka palalamaya a Esiyoŋ-Geber.

³⁷Amma mijiviɗ Eliyezer, mangal ngi Dodavaŋ mbur Maresa, a njika ɓi ngi Buymisemuŋ da Zozafata, a ɓaŋ na: «Ani ki jumom le ati Ahaziya, Bumbulvuŋ mihirya slra ɗik na aseˀeŋ.» Dar palalamay tuwa, a waham kpah kpah, manja a ram taŋ ndol le a Tarsis tuwa.