Read South Giziga 2CH 21 Bible Online

2CH 21 - South Giziga bible

2CH 21

¹Zozafat mumuc na, a dikaka a ciki dideˀ naŋhay ar walahay ngi Davit. Mangal naŋ Zoram a zuɓa li naŋ.

²Zoram, mangal ngi Zozafata, sukum naŋ mizilehey ada haɗi, i ti: Azariya, Yehiyel, Zakari, Azariyahu, Mikayel waɗ Sefatiya.

³Cine taŋ Zozafat a vula taŋ gwatay le zleˀe haɗi: gwat ngi ɓiri barahay, ɓiri tapasl tapasl waɗ gwat mupuɗaw puɗaway, yo a vula taŋ walahay muguno taŋ le ti moholoy a ruwuy Zuda. Amma zuma buyo, a vula da Zoram, asi modogom i naŋ.

⁴Zoram a cifi buy ar li ngi cine, a lum gidaŋ. A dirba nah, a kiɗa sukum naŋ mizilehey tuwa cek ti maslalam, waɗ buy Israyeley cah ma.

⁵Zoram micifi buy na, naɓa naŋ ti vi kukur makir nga cuw, a zum buy a Zeruzaleme vi dangafaɗa.

⁶A sipi jiviɗ ngi buy Israyeley, kaɓa mizli ngi hay Akapay zleˀe, asi a zuɓ ngi ngwasa i zuŋ ngi Akap. A gi gwat malambaˀ le a mihiri ngi Bumbulvuŋ.

⁷Amma Bumbulvuŋ a ngum ngizla hay ngi Davite ta, asi jumoˀay naŋ mujum zleˀe ati Davit vuna. Yo ma na, a ɓa Davite le zleˀe: masa zumam buy ar li ɗike ngi caˀa i dideˀ ɗikey.

⁸Ti Zoram mazum buy na, mizli Edomoy a slikiɗam ɓi vur zumabuy ngi Zuda, a cam buy taŋ ya.

⁹Akẽh na, Zoram a ram ati buy ngi soje naŋhay waɗ mota ngi vurum naŋhaya gar. A slikiɗ ngi duvuɗo, a kiɗa Edomoy ati buy ngi mota ngi vurumoy mugun gun hirnga taŋ na.

¹⁰Mizli Edomoy a ndiram ti slikiɗa ɓi avu zumabuy ngi Zuda, hã dana aruŋ. Hirak ti nah vuna ma na, hirwuy Lipna a slikiɗ ɓi avu zumabuy ngi Zorama ya, asi Zoram a pula Bumbulvuŋ Buymisemuŋ ngi dideˀ naŋhaya le.

¹¹Zoram vuna, a ɗiyi li miɗingir ɗingirey le ngi gi mikuli a muwã Zuda, a hizigiɗa Zeruzalemeye ng'ar sulome, yo ɓa Zudahay a ndiram teŋteŋ avu Buymisemuŋ ta.

¹²Ti di numuŋ ada na, Zoram a lum letir ngi mijiviɗ Eli, a ɓaŋ na: «Bumbulvuŋ Buymisemuŋ ngi dunuk Davite, a ɓuw na: ani ki sipa jiviɗ ngi bunuk Zozafat ati ngi Asa, buy Zuda ta,

¹³amma ka, ki zuɓ ngi ɗik i jiviɗ ngi buy Israyeley jaka, joˀ ki pa mi da hirwuy Zuda ati Zeruzalemeye, ɓa a gam sulome, kaɓa hay ngi Akap na ya, yo ko sukum ɗik, ziri ngi bunukoy, mifineˀ kahaya, ki ngizla taŋ pay jaka.

¹⁴Pura, ani Bumbulvuŋ a wuɗ a go mendere madiɗa da mizli ɗikey, ziri ɗikey, da ngwas ɗikey waɗ da zlili ɗik gar.

¹⁵Yo ka vuna, kisa lum jiji mutuwaˀ tuwaˀhay, jiji a kwacay a sa gi ɓesde nga mbuŋ nga mbuŋ, hã tanday ɗik a sa bo curɗoɗ ng'avra.»

¹⁶Akẽh na, Bumbulvuŋ a pa mi da Filistihey ati Arapay, midigwi ngi Etiyopiheye, ɓa a gam mesene ati Zorama.

¹⁷A soko zlaka Zudahaya ngi kiɗa vu, a cam, a hilaka zlili ngi hay buyo cek, yo ziri ati ngwas naŋhaya, ko zuŋ mindiraŋ anta, sey Ahaziya tuboˀ naŋ tewle.

¹⁸A dirba nah ma na, Bumbulvuŋ a gaŋ jiji a kwacay, i jiji ngi mbul di ta wãˀ.

¹⁹Hin ara cuh, ng'avi kiɗa mi ngi vi mucuw naŋ na, jiji tuwa, a baŋ ti gwat ngi kwacayaya curɗoɗ, hã a muc ti bonoy mukuyta wãˀ. Mizli naŋhay a bulam vu ngiɗ ar slimiɗ naŋ, kaɓa mubulam ar slimiɗ ngi dideˀ naŋhay na ta.

²⁰Zoram micifi buy madiɗa na, naɓa naŋ ti vi kukur makir nga cuw, a zum buy a Zeruzaleme vi dangafaɗa. A muc, ko mbur milikaŋ anta, a dikakaŋ ar walahay ngi Davit, amma ar zivi ngi buyoy ta ɓula.