Read South Giziga 2CH 22 Bible Online

2CH 22 - South Giziga bible

2CH 22

¹Ahaziya, mangal tuboˀo, mizli Zeruzalemey a cakaŋ buy ar li ngi cine Zorama. Asi sojehey hiɗim hiɗim musoko asi Arapay, micam ng'ar walahay guɗuko, a ngizlaka ziri mizile modogomoyo le gar. Naŋ kahana, Ahaziya, mangal ngi Zoram, buy Zuda micifi buyo.

²Ahaziya micifi buy na, naɓa naŋ ti vi kukur cuw nga cuw, a zum buyo vi pal a Zeruzaleme. A zilaka mumuŋ Atali, zuŋ ngi Omri.

³Ahaziya kwana, a sipi jiviɗ malambaˀ kaɓa mizli ngi hay Akapay. Asi mumuŋ ara vulaŋ kuti ɓa a ziriɗa ɓi ngi Buymisemuŋ.

⁴A gi gwat macira hiri da Bumbulvuŋ ta, kaɓa hay ngi Akap. Asi a dirba cine mumuc na, mizli tayna a vulakaŋ kuti ngi zizaŋ hirngaŋ.

⁵Ahaziya miram ati Zoram, buy Israyel, mangal ngi Akap, nga kiɗa vu ati Hazayel, buy Siri, misi a Ramot, hirwuy Galaˀat na, a sipi di i kuti taŋ vuna. Amma mizli Sirihey a gaka waˀa da Zorama,

⁶dar Zoram a mi nga Zizreyel, a kufa waˀa migakaŋ taŋ a Rama, ti taŋ makiɗam vu ati Hazayel, buy Siri tuwa. Akẽh na, Ahaziya, mangal ngi Zoram, buy Zuda, aru nga pur naŋ a Zizreyele, asi naŋ mulum waˀa na.

⁷Ahaziya miziza hirnga naŋ ti ru naŋ nga pura Zoram na, miga i Bumbulvuŋ. Ahaziya mindil ndil si na, a ram ati Zorama nga ji hirnga ti Zehu, mangal ngi Nimsi. Dambalaka Bumbulvuŋ a pa mal ngi ci buy le da Zehu, ɓa a ngizla mizli ngi hay Akapaya.

⁸Zehu a ga kiita ngi Bumbulvuŋ da mizli ngi hay Akapaya. Zehu ara luuma buy ngi Zudahay ati ziri ngi sukum ngi Ahaziyahay magam slra a hay buyo, dar a kiɗa taŋ sunok sunok.

⁹A dirba nah, a ɓa mizli, ara supoko Ahaziya: a joko di ar li ɗum naŋ a Samari, a soko di da Zehu, a kiɗaka vagay. A dikaka le ɓula, asi a ɓam na: «I mangal ngi Zozafat misipa Bumbulvuŋ ti mevel purla tuwa.» A hay Ahaziya, mbur mindila le ngi cifi buy na, anta loŋ ta.

¹⁰Atali, mumuŋ ngi Ahaziya, mupura mangal naŋ a muc le na, a juwa a mevele, ɓa a ngizla dideˀ ngi buy Zudahayakap wãˀ.

¹¹Amma Yoseba, zuŋ ngi buy Zoram, a zuɓa Zoˀas, mangal ngi Ahaziya, paɗ ti wuzla ziri buyoy mawuɗam ɓa a kiɗaka taŋ vagay vagaya, ara ɗumo taŋ ɗum ati gwas migil naŋ, ar viŋ ngi hin ngir hay ngi Buymisemuŋ. Yoseba, zuŋ ngi buy Zoram, ngwas ngi masay,Yoyada, yo i sukum mongoso ngi Ahaziya, naŋ muɗumo Zoˀasa, ɓa Atali a lumaŋ ngi kiɗ vagaya ta na, naŋ kahana.

¹²Zoˀasa, naŋ da ɗum ar hay ngi Buymisemuŋ ati ngwas migil naŋ waɗ Yoseba tuwa hã vi merkeɗe, amma Atali ara zum buy asi ruwuyo.