Read South Giziga 2CH 23 Bible Online

2CH 23 - South Giziga bible

2CH 23

¹Angi vi mitarnaˀ naŋ na, masay,Yoyada, a tum vu a mevele, a zila buy ngi sojehey skata, i ti: Azariya, mangal ngi Yeroˀam, Ismayel mangal ngi Yohanaŋ, Azariya mangal ngi Obet, Maˀaseya mangal ngi Adaya, waɗ Elisafat mangal ngi Zikri.

²Buy ngi sojehey a bulaka hirwuy ngi buy Zuda zlar, a zilaka levi ngir walahay ngi si ruwuy zudahay gar, yo buy ngi wuzla muy ngi Israyeleye, a moko bumaˀ ati taŋ nga Zeruzalem.

³Mizli mukusom gar ar hay ngi Buymisemuŋ na, a jumomˀay ati buyo. Yoyada a ɓa taŋ na: «Zoˀas, mangal ngi buyo n'ani! Sey a zuma buyo, kaɓa Bumbulvuŋ miɓa vur dideˀ ngi Daviteye.

⁴Gwat kum masa gaka ani: Masayay ati leviheye, a ngicam taˀ taˀ makir. Taŋ masa zlaka slra taŋ tapas hin ngi sabat na, mizli mingac mudumbuŋhoyo, a sa jiginam mizlingrehey,

⁵mingac mucuw taŋ, a sa ndiram a hay buy, yo mingac mimakir taŋ kwana a mizlingre ngi Ɗuva virzi ngi hay. Mizli gar na, taŋ a sa ndiram a mamay hay ngi Bumbulvuŋ.

⁶Anja ko mbur loŋ maci ng'ar hay ngi Bumbulvuŋ anta, sey masayay ati levihey magam slra na tewle. Taŋ a cam zuy ɓula, asi taŋ i muvulahay le da Buymisemuŋ. Mizli gar na, gwat Bumbulvuŋ mitika le gar na, masa jiginaka i taŋ.

⁷Levihey a sa cicam gun hirnga ngi buyo, mbur gar na, ti gwat ngi vurumoy kaw kaw a haŋ. Ko wa gar muwuɗ le ngi ci ngi hay buyo na, a sa kiɗaka vagay. Da buy ara ru nga ma gar na, a ram aseˀeŋ.»

⁸Levihey ati Zudahay gar, a gaka kaɓa masay Yoyada, miɓa taŋ ɗaˀ ɗaˀ le tuwa. Buy gar na, a cikila mizli naŋhaya, mizli mazlaka slra tapas sabat ati misi makiɗaka mi ngi slra tapasa gar, asi Yoyada a vul musuka vu taˀ le da mizli ar ngic taŋ ta.

⁹Buy ngi soje gar na, Yoyada a vulaŋ ziwitey ati mbaray ti sukwi wal wal, i ngi buy Davitey zleˀe misi ar hay ngi Buymisemuŋ.

¹⁰A cica mizli gar, mbur gar na, ti zivit kaw a haŋ kaw a haŋ, zle a mi vay hazum ngi haya, hã a mi vay gula ngi haya, a gunoko buyo cah, gweˀ avu li gi mikuli ati hay ngi Buymisemuŋ.

¹¹Akẽh na, a boko ti Zoˀas, mangal ngi buyo, a tuwuɗakaŋ hirnga, a gakaŋ gwat magaka ngi ci buyo, a cakaŋ ar buyo. Yoyada ati ziri naŋhaya, a pakaŋ mal ngi vula slra, joˀ mizli gar a wudam: «Anja Bumbulvuŋ a juw hutuŋ subur!»

¹²Ti Atali micina ˀay ngi mizli mazluzluɓam, yo majam salalay da buy tuwa na, aru nga wuzla mizli, ar hay ngi Bumbulvuŋ.

¹³Keɗ na: buy deŋ a ciki ɓamtal ngir hay ngi Buymisemuŋ, gweˀ avu mizlingre. Buy ngi sojehey ati mifi za rahay dedeŋ dedeŋ gweˀ avu buyo. Mizli ngi si ruwuyo gar ara mumulom, mizli ara fam za ra, mikiɗa gwat ngi dunguroy ara kiɗaka gwat ngi dunguroyo, yo ara jam salalay kiɗ kiɗ aseˀe. Akẽh na, Atali a ngira zana naŋhaya, a widi, a ɓi: «Hana i gidiɓi, hana i gidiɓi!»

¹⁴Dar masay Yoyada, a zila buy ngi soje skat skataya, a ɓa taŋ: «Bam di ti wuzla mizli avra! Ko wa gar misipaŋ le na, a sa kiɗaka vagay ti maslalam! Asi mike na, masay a ɓi le zleˀe: kum anta sa kiɗaka vagay ar hay ngi Bumbulvuŋ ta.»

¹⁵Sojehey a ɗiɗaka Atali tuwa ngir tivi hay ngi buyo, Atali mindil gweˀ avu miviŋ ngi pilisey na, sojehey tuwa, a kiɗaka akẽh.

¹⁶Yoyada a jumomˀay ar wala taŋ ati mizli gar, waɗ buy vuna, ɓa a tiram mizli ngi Bumbulvuŋhay.

¹⁷Dar mizli gar a ram ng'ar hay ngi Baˀala, a wahakaŋ, a wahaka li gi mikuli naŋhay ati kuli naŋ miciɗa ti ciɗey na, a kiɗaka Mataŋ, masay ngi mikuli da Baˀala vagay, daˀ a mbuŋ li gi mikulihey vuna si.

¹⁸A dirba nah, Yoyada a pula ɓi ngi jigina hay ngi Bumbulvuŋ asi haŋ ngi levi, masayay. Davit a wuɗuka taŋ le zleˀe ti ngay ti ngay ar hay ngi Bumbulvuŋ, ɓa a gam mikuli mizlam zlam da Bumbulvuŋ, a gaka ti mumul, ti zli dimis, kaɓa mutohoko ar ɓimujuwa ngi Moyis, yo kaɓa Davit mibiga taŋ jiviɗ naŋ.

¹⁹Yoyada a pi mizli sek ngi jigina mizlingre ngi hay Bumbulvuŋ, ɓa ko gwat misi dili a ci ko ti jiviɗ wana ka ta

²⁰Yoyada a kuso buy ngi soje skat skatay, mizli madiɗa ngi buyoy, madiɗa ngi wuzla mizli waɗ mizli ngi si ruwuyo gar, a poko sar ti buyo tir hay ngi Bumbulvuŋ, a cam di tir miviŋ madiɗa ngi hay buyo, a cifaka buyo ar janga ngi buyo.

²¹Mizli ngi si ruwuyoy gar ara mumulom, walahaya gar setetete. Amma Atali, a kiɗakaŋ naŋ le vagay ti maslalam.