Read South Giziga 2CH 24 Bible Online

2CH 24 - South Giziga bible

2CH 24

¹Zoˀas micifi buy na, naɓa naŋ ti vi tarnaˀa, a zum buy vi kukur mufaɗ a Zeruzaleme. Mumuŋ i zuŋ Ber-seba, a zilaka Sibiya.

²Ti masay Yoyada, misi ar siifa na, Zoˀas a gi gwat mikaslsla a mihiri ngi Bumbulvuŋ.

³Yoyada a zuɓa ngwasay cuw da Zoˀasa, a yakaŋ ziri mizilehey ati mongosohoy haɗi.

⁴A dirba nah, Zoˀas a juwa a mevele, ɓa a mahiri ngi ɗiya hay ngi Bumbulvuŋ.

⁵A kuso masayay ati leviheye cek, a ɓa taŋ: «A ram ng'ar walahay Zudahaya, cikiloko dala avu Israyeley gar, ɓa ngi mahiri ngi ɗiya hay ngi Buymisemuŋ kumo vur vi vur vi. Wusam vu kutum ti slra nah.» Amma ko levihey a wusam vu ta.

⁶Akẽh na, buy a zilo masay Yoyada, tuwa, a ɓaŋ na: «Moyis, gawla ngi Buymisemuŋ ati jum ngi Israyeleye, a ɗuvam ɓi le ngi cikila buutu vur guɗuk misi beleler ngi jumoˀay anga na. Ɓa i levihey macikiloko di avu Zeruzalemey waɗ avu Zudahaya, na ki hurdum ti ɓi nah avu taŋ vuna ta vur mike?

⁷Asi Atali, ngwas malambaˀ ati ziri naŋhaya, a pulaka hay ngi Buymisemuŋ mbak a hiryi, yo ma na, gwat muvuku vu taŋ misi ar hay ngi Buymisemuŋ gar na, a gam taŋ slra le ngi mezegwel da Baˀal.»

⁸Buy a ɓa mizli, a ɗiyam akoti, ɓa a ɗuvaka taˀ ti vra, a mizlingre hay ngi Bumbulvuŋ,

⁹yo ɓa a tilam mi asi ruwuy Zuda waɗ a Zeruzaleme, ɓa mbur gar a so ti buutu da Bumbulvuŋ, i buutu, Moyis, gawla ngi Buymisemuŋ muɗuva ɓi nah da Israyeley a wuzlaɓuh mikirɗak kirɗak na.

¹⁰Buyoy gar ati mizli gar, a mumulom, a soko ti dala, a paka ng'ar akoti hã a naha cer cer.

¹¹Ti taŋ musoko ti dala, ɓa levihey a slufaka ar slimiɗ ngi buyo na, a puraka na, dala naŋ haɗa. Mbur mutoho gwat ngi buyo ati miji kaw ngi masay madiɗa, a soko, a zukoko dala zuk, a raka ka akoti ɓaˀ ar li naŋ a muŋ. A gaka kanah kanah vur hin gar, hã a cikilam dala haɗi teˀe.

¹²Buy ati Yoyada, a vulaka dala tuwa da buy ngi slra ngi ɗiya hay ngi Bumbulvuŋ. Yo a hilam mizli ngi ciɗa ɗuguroy ati misina juwa marjahay a hirngi hay ngi Bumbulvuŋ, waɗ, a hilam misina gi slra ti ɓiri muho gar, waɗ ti ɓiri gazahay, ɓa ngi mahiri ngi ɗiya hay ngi Bumbulvuŋ.

¹³Migi slrahay a zlaka slra, slra taŋ ara kil. A ɗiyaka hiri ngi hay ngi Buymisemuŋ nga naŋ nga naŋ a muŋ, a tiram di hay migidaŋ gidaŋ.

¹⁴A dirba taŋ mikiɗaka mi ngi slraˀahaya na, a mam ti is ngi dala a muŋ da ti buy ati Yoyada, a ɗiyam di gwat ngi gi slrahay ar hay ngi Bumbulvuŋ: i gwat ngi gi mikuli mizlam zlam, tutuŋ ati gwat ngi ɓiri tapasl tapaslay waɗ ngi ɓiri barahay. Ti Yoyada misi ar siifa aruŋ na, ara gaka mikuli mizlam zlam tayna ar hay ngi Bumbulvuŋ ko mbak le anta.

¹⁵Yoyada a gi gal, a zum ɗaf le, akẽh na, a mucu, naɓa naŋ ti vi skat ti kukur makir.

¹⁶A dikaka ar zivi ngi buyoy ar walahay ngi Davit, asi a gi gwat mezle le a Israyele, da Buymisemuŋ waɗ ar hay ngi Buymisemuŋ.

¹⁷A dirba Yoyada mumuc na, Zudahay a soko, a putukulom a mbuŋ buy Zoˀasa, a cine mingiɓi taŋ.

¹⁸A pulaka hay ngi Bumbulvuŋ Buymisemuŋ ngi dideˀ taŋhaya, ara gam mezegwel da kuli ɓamtal waɗ da kulihey. Malambaˀ taŋ a slikiɗa himaˀ ngi Buymisemuŋ ar Zudahay waɗ ar Zeruzalemeye.

¹⁹A dirba nah, Buymisemuŋ a slin mijiviɗey ng'avi taŋ, ɓa a vulaka taŋ gidaŋ, ɓa a moko ng'avu Bumbulvuŋ, amma ko a kam slimiɗ ta.

²⁰Akẽh so na, ˀUf ngi Buymisemuŋ a ci avu Zakari, mangal ngi Yoyada, a cici zlak avu mizli, a ɓa taŋ: «Buymisemuŋ a ɓi na: Ki ngilaka ɓi Bumbulvuŋ mawuɗo vur mike? Kum anta sa lumam di gwat ta. Asi mike na, ki pulikiy ya Bumbulvuŋ le, ya kwana i pulukum le ya.»

²¹A dirba nah, mizli a gam gidiɓi ar Zakari, joˀ buy a pula taŋ jiviɗ, ɓa a kuyupakaŋ ti ɗugur, daˀ a wazlaray Bumbulvuŋ vuna si.

²²Zoˀas a puyuko hirnga ngi mezle, Yoyada cine naŋ migaŋ di na le, a kiɗa mangal naŋ Zakari. Ti naŋ mamuc na, Zakari a ɓi: «Anja Bumbulvuŋ a pura, yo a cufuɗa ɓi nah!»

²³Ar zli virzi ngi vi mekelem ma na, soje ngi ruwuy Sirihey, a so zlaka Zoˀasa ngi kiɗa vu, a soko kini ng'avi Zudahay ati Zeruzalemey, a kiɗaka buy ngi mizli gar, a slinam ti gwat taŋ mihilaka ar vurumo gar da buy taŋ a Damas.

²⁴Soje Sirihey musoko na, taŋ haɗa vuna ta ngbaŋ, amma soje Zudahay mihaɗa na, Bumbulvuŋ a vula taŋ le asi haŋ ngi Sirihey asi a pulaka Bumbulvuŋ Buymisemuŋ ngi dideˀ taŋhay na le. Zoˀasa, sojehey a gakaŋ bonoy.

²⁵Ti soje Sirihey macohom le na, a pulaka Zoˀasa guta breˀbreˀ. Gawla naŋhay a gam gidiɓi a hirnga naŋ, vur naŋ mikiɗa mangal ngi masay Yoyada, tuwa, dar a kiɗakaŋ daˀ ar arngawo naŋ vuna. Naŋ mumuc na, a dikaka ar walahay ngi Davit, amma ar zivi ngi buyoy ta ɓula.

²⁶Mizli migam gidiɓi a hirnga Zoˀas vuna t'ani: Zabat, mangal ngi zuŋ Amoŋ, a zilaka Simeyet, waɗ Yozabat, mangal ngi zuŋ Moˀap, a zilaka Simrit.

²⁷Slimiɗ ngi ziri ngi Zoˀasay, mingiɓi mihaɗa miɓaka a hirnga naŋ waɗ ɓi ngi mihiri ngi ɗiya hay ngi Buymisemuŋ na, i mutoho taŋ le ar ɗerewol mazilaka ‹pulaˀvra› ngi ɗerewol ngi buyoy. Mangal naŋ Amasiya a cifi buy ar li naŋ.