Read South Giziga 2CH 25 Bible Online

2CH 25 - South Giziga bible

2CH 25

¹Amasiya micifi buy madiɗa na, naɓa naŋ ti vi kukur cuw nga zlum, a zum buy a Zeruzaleme vi kukur cuw nga ngoltir. Mumuŋ naŋ i zuŋ Zeruzalem, a zilaka Yoˀadaŋ.

²Amasiya a gi gwat macira hiri da Bumbulvuŋ, amma anta ti mevel mikaslsla ta ɓula.

³Amasiya, a dirba naŋ mupura a cica zumabuy naŋ le gidaŋ gidaŋ muduba na, a kiɗa gawla naŋhay mikiɗaka buy Zoˀas, cine zleˀe na vagay vagay.

⁴Amma a kiɗa ziri taŋhaya ta ɓula, a ga kaɓa mutohoko ar ɗerewol ngi ɓimujuwa angi ɗerewol ngi Moyis. Bumbulvuŋ a ɓi anga ani: «anta kiɗaka miyi ziri asi ziri taŋhaya ta, yo ziri kwana, anta kiɗaka taŋ asi ziri taŋhaya ta ya. Amma mbur gar na, a sa kiɗaka asi mungra nga naŋ nga naŋ.»

⁵Amasiya a kuso mizli Zudahaya, a cifa madiɗa ngi soje durmuk durmukoy ati madiɗa ngi soje skat skatay, vur muy ngi mizli, vur muy ngi mizli angi zumabuy ngi sukwi ngi Zuda ati ngi sukwi ngi Benjameŋ gar. Mizli misi ti vi kukur cuw malla mufunaka le na, a toho taŋ, a luuma na, mizli miwirwirey ma ram ar vurum gu, misinaka cika ziwit le ati ji mbaray gar na, taŋ durmuk skat skat makir.

⁶A dirba nah, a hil mizli Israyele miwirwirey ar vurumo durmuk skat, ɓa a wurka taŋ ti ɓiri bara, gwat ngi ton makir.

⁷Amma mbur ngi Buymisemuŋ a so ɓa buyo: «Aw ɗu! Anja ki pula soje Israyeley a ram asi ka ta, asi Israyel, dideˀ ngi Efrayim tayna gar na, Bumbulvuŋ naŋ anta asi taŋ ta.

⁸Asi mike na, da a ram le asi ka, ko da ki kiɗ vu ti gidaŋ ɗike haɗa mbri tekeɗe kwana, Buymisemuŋ a sa buw sar ki diɗ a mbuŋ mesene ɗikeye, asi misi ti gidaŋ ngi jinuw malla ngi buw sar gar na, i Buymisemuŋ.»

⁹Amasiya a ɓa mbur ngi Buymisemuŋ tuwa: «Na ɓiri bara ton makir ya muvula da soje Israyeley na, a sa gi slra mi ska?» Mbur ngi Buymisemuŋ a mbiɗaŋ di: «Buymisemuŋ naŋ da ti gwat ngi vuluw di fineˀ hana vuna.»

¹⁰Dar Amasiya a ɓula sojehey musoko ti Efrayim tuwa, ɓa a mam ngi hay taŋ a muŋ. Amma mizli tayna tuwa, a slikiɗam himaˀ fõh fõh haɗi angi Zudahaya, a mam ngi hay taŋ ti himaˀ.

¹¹Ti Amasiya mitiri solok muduba na, aru ti mizli naŋhaya ng'ar sozo Mandaŋ, a kiɗ soje Edomoy durmuk kuruˀu.

¹²Mizli Zudahay a jam mizli Edomoyo titiri, durmuk kuruˀ ma. A ram taŋ nga hirnga muwã, a poko taŋ haŋ ti hirnga muwã nga ruwuy. A ngilam cek.

¹³Soje Israyeley, Amasiya mitika taŋ ɓa a ram aseˀe ng'ar vurumo ta tuwa na, a ndilam vu kuvbum ar walahay Zudahaya, zle a Samari, sesẽŋ a Bet-Horoŋ. A kiɗam mizli durmuk makir a diga, yo a hilam gwatay haɗi.

¹⁴Ti Amasiya mimawa, a dirba naŋ mulum bugawla a hirnga Edomoy na, a hilo kuli ngi Edomoy a haŋ, a tiri taŋ kuli naŋhay, a huruk huruk a mbuŋ taŋ, a wura taŋ urdi.

¹⁵Akẽh na, Bumbulvuŋ a slikiɗ himaˀ ar Amasiya, a slinaŋ mijiviɗ, ɓa a ɓaŋ: «Mizli tayna, kuli taŋhay a tiɓaka taŋ tisi haŋ ɗike gu ta, na ki ɗuva hirnga da kuli tayna vur mike?»

¹⁶Ti mijiviɗ mira ɓaŋ kanah tuwa na, Amasiya a slaŋ di, a ɓaŋ: «A cucukuw kaɓa ngi biga wuluk da ya buyo kwa? Ki ɓi hirdam hirdam ta, malla ki wuɗ kiɗ kwa?» Mijiviɗ a ɓi hirdam hirdam mata, amma a ɓaŋ: «Ka migi kahana, yo ka mitiɓa wuluk ɗu ta na, yi si na le, Buymisemuŋ a juwa le ɓa a kiɗuw vagay.»

¹⁷Amasiya, buy Zuda, a wuluk wuluk mekelem, a slin ng'avu Zoˀas, buy Israyel, mangal ngi Zoˀahas, i dideˀ ngi Zehu, ɓa a ɓakaŋ na: «Sawa i zliram dibiɗ ati ka!»

¹⁸Zoˀas, buy Israyel, a slin ɓa a ɓaka Amasiya, buy Zuda na: «Titif ngi Libaŋ, a slin ɓa ara ɓaka miter ngi Libaŋ na: ‹Vuliy zuŋ ɗike ngi ngwas da mangal ɗu.› Amma gwat misãmi ngi ɓuh, a cuh baɗ ar titif tuwa, a kurupaŋ kirap kirap.

¹⁹Ko mbri na, ki ra ɓi ti kwacay ɗike, ki pa hirnga le da Edomo. Ki ra jijih di a mevel ɗike, yo ki ra huhum di vu. Amma zuwen ka macifi a hay ɗiki! Vurum masa kiɗ mi ti malambaˀ, yo masa kiɗukuw anga jom ati Zudahay na, ki zla ɓi naŋ ngi mike?»

²⁰Amma ko Amasiya a cinaŋ di ta, asi mike na, ɓi nah a so ti vu Buymisemuŋ, a wuɗ ɓa a vula Amasiya ati soje naŋhay asi haŋ ngi mesene taŋhay, vur taŋ mihuruk hurukam a mbuŋ kuli ngi Edomoy.

²¹Zoˀas, buy Israyele, a bi, ara zliram dibiɗ ati Amasiya, buy Zuda, a Bet-Semes, hirwuy Zuda.

²²Israyeley a kiɗaka Zudahaya, dar soje Zudahaya a kilam, mbur gar ngi hay naŋ ngi hay naŋ.

²³Amasiya, buy Zuda, mangal ngi Zoˀas, dideˀ ngi Ahaziya, Zoˀas, buy Israyele, a jaŋ ng'ar beke, aru di nga Zeruzalem. Zoˀas a wuh avu mohol ngi Zeruzaleme gwat ngi metir skat skat cuw, zle a mizlingre Efrayime, hã a mizlingre zlirɗi ngi mohol.

²⁴A hila ɓiri tapasl tapasl ati ɓiri bara gar, waɗ gwatay misi ar hay ngi Buymisemuŋ gar, Obet-Edom majigina taŋ, zlili ngi hay buyo waɗ a ji mizli ngi mbiɗi hirnga taŋ ti mbiɗi, a mi nga Samari.

²⁵Zoˀas, buy Israyel, mangal ngi Zoˀakas mumuc na, a dirba nah, Amasiya, buy Zuda, a gi ar siifa vi kuruˀ nga zlum.

²⁶Is ngi slra ngi Amasiya, zle angi ɗuva virzi naŋ hã avu kiɗa mi naŋ na, i mutoho taŋ le angi ɗerewol ngi buy Zudahay ati Israyeleye,

²⁷zle ti hin ngi Amasiya mupula sipa Bumbulvuŋ. Mizli a gam gidiɓi ar Amasiya a Zeruzaleme, a kil nga Lakis. Amma a slinam mizli, a sipakaŋ nga Lakise, a kiɗaka a diga vagay.

²⁸Akẽh na, a zuɓaka vagay naŋ ti pilisey, ara dikaka angi zivi ngi dideˀ naŋhay ar walahay ngi ruwuy Zuda.