Read South Giziga 2CH 26 Bible Online

2CH 26 - South Giziga bible

2CH 26

¹Mizli Zudahay gar, a zuɓaka Oziyasa, naɓa naŋ ti vi kuruˀ nga merkeɗe, a cakaŋ buy ar li ngi cine naŋ Amasiya.

²Mindira hiri ngi walahay Elat i naŋ, a vula da hirwuy Zuda a muŋ. Hana a gi na, a dirba muc ngi cine naŋ.

³Oziyas mici ar buyo, naɓa naŋ ti vi kuruˀ nga merkeɗe, a zum buyo vi kukur zlum nga cuw a Zeruzaleme. Mumuŋ i zuŋ Zeruzalem, a zilaka Yekoliya.

⁴Oziyas a gi gwat mikkaslsla a mihiri ngi Bumbulvuŋ, rak rak ati cine naŋ Amasiya miga zleˀe.

⁵Ti Zakari misi ar siifa na, ara dubuna zluwun ti Buymisemuŋ da Oziyasa, yo Oziyas vuna kwana ara sipa Buymisemuŋ. Ti Oziyas miteŋteŋ avu Bumbulvuŋ na, Buymisemuŋ a ga ɓa gwat naŋ maga gar na, a gi kasl kasla.

⁶Oziyas aru nga gi vurum ati Filistihey, a mbizla mohol ngi walahay Gat, ngi Yapne waɗ ngi Asdoto. A ndir walahayay gun gun ti mohol angi hirwuy Asdoto, waɗ angi hirwuy Filisti.

⁷Taŋ makiɗam vu ati Filistihey, Arapay misi ti hayay a Gur-Baˀal waɗ ati Meˀunihey na, Buymisemuŋ a so jiniˀis aseˀeŋ.

⁸Mizli Meˀunihey vuna, a wurkaka buutu taŋ da Oziyas misi slimiɗ naŋ mazil sesẽŋ ar maakway ngi Ezipte, asi Oziyas a tiri le i mbur migidaŋ haɗa.

⁹Oziyas a ndir hay migilahay a Zeruzaleme: a hirnga mizlingre ngir ngi zlirɗi, a mizlingre ng'ar Sozo, waɗ ar mohol mumusl le gar, waɗ gun gun taŋ ti mohol.

¹⁰Yo a ndir hay migilahay a wuzlaɓuh mikirɗak kirɗaka ma, a li futuŋhoy mbeˀ mbeˀ, asi naŋ ti ginewey haɗi. Yo naŋ da ti mizli muhufoy ar Hirwuy-Mukutuk, yo ar li micayya, waɗ naŋ da ti muhuva gudubunoy a muwãhay waɗ a Karmel. Asi mike na, Oziyas i mbur mawuɗ hufu.

¹¹Oziyasa, naŋ da ti sojehey mindilaka gi vurumo le, yo a ndilaka le ngi bi ng'ar vurumo. A wuɗkaka taŋ le taˀ taˀ weˀe avu hil taŋ ng'ar slra, Yehiyel, mbur mutoho gwat ngi buy waɗ Maˀaseya, mbur miji kaw ngi zlili muslufaka taŋ na, yo mawa soje tayna i Hananiya, mbur ngi wuzla madiɗa ngi soje ngi buyoy.

¹²Soje miwirwir tayna, a wuɗkaka taŋ vur buy ngi sukwi ngi sukwi, a gam jom gar mizli durmuk cuw ti skat skat merkeɗe.

¹³A wam soje durmuk skat skat makir ti durmuk tarnaˀ ti soje skat skat zlum, mindilaka gi vurumo le ti gidaŋ, ko ti gambara ngi vu, t'ada sek ngi tiɓa hirnga ngi buy avu mesene naŋhay.

¹⁴Taŋ mira bam ng'ar vurum gar na, buy Oziyas a wuɗuka taŋ mbarayay, ziwitey, jiiku ngi gandafay, libitihey, lekey waɗ ɗugur ngi vehvehluhoy.

¹⁵A Zeruzaleme, Oziyas a ɗiyi masiney taˀ taˀ a hirngi hay migilahay waɗ a zlirɗihey ngi moholoy mira zliram tuwa, hĩˀĩ ngi mula luvutoy ati ngi hiziga ɗugur madiɗahay. Slimiɗ naŋ a zil, hã aru kileŋ. Asi Buymisemuŋ a jina Oziyasa le haɗi, hã a tiri buy migidaŋ haɗa.

¹⁶Naŋ migidaŋ haɗa tuwa na, a zla huhumo vu a mevele, hã ara zizaŋ, a zla gi teŋteŋ a mbuŋ Bumbulvuŋ Buymisemuŋ naŋ mata: a ci ng'ar hay ngi Bumbulvuŋ nga wura mukuturɓuy ar li gi mikuli ti urdi.

¹⁷masay Azariya, a ci aseˀeŋ, mizli gambara masayay da Bumbulvuŋ, kukur dangafaɗ sek aseˀeŋ.

¹⁸A cicam zlak avu buy Oziyasa, a ɓakaŋ: «Mawura mukuturɓuy da Bumbulvuŋ i ka ta Oziyas, amma i masay, ziri ngi Aroŋhoy, mihĩˀĩ vurˀe! Bi tir hay ngi Bumbulvuŋ avra, asi ki gi teŋteŋ ta! Ki gi hana i slra ngi hirya hay mipal hana, avu Bumbulvuŋ Buymisemuŋ, i slra ngi ɗuvuw hirnga ta.

¹⁹Oziyas a ro kaw ti gwat ngi wura urdi zleˀe a haŋ, a zla ji mevel ar masayay tuwa. Naŋ muro ar mevel tuwa na, kukula a midibiɗe, daˀ a mbuŋ masayaya, ar hay ngi Bumbulvuŋ, gweˀ avu li gi mikuli ti urdi.

²⁰masay Azariya, madiɗa ati masayay gar, ara purakaŋ, keɗ na, kukula a midibiɗe! A ɓuloko di kutum tir haya, joˀ naŋ vuna kwana, a wuso vu ng'avra, asi Bumbulvuŋ a gaŋ kukula le.

²¹Buy Oziyas a ndir ti kukula hã avu muc naŋ. Naŋ misi ti kukula tuwa na, sey a cifi pal naŋ ar hay naŋ baˀ avu mizli, asi a cifakaŋ baˀ avu hay ngi Bumbulvuŋ. Mangal naŋ Yotam, madiɗa ngi hay naŋ buyo, a wa mizli ngi si ruwuyo.

²²Is ngi slra ngi Oziyasa, zle angi zli virzi naŋ hã avu kiɗa mi naŋ na, mijiviɗ Ezay, mangal ngi Amot a toho le.

²³Ti Oziyas mumuc na, a dikakaŋ aciki dideˀ naŋhay, angi li ngi zivi ngi buyoy, asi a ɓam na: «Naŋ i misi kukula!» Dar mangal naŋ Yotam a zum buy ar li naŋ.