Read South Giziga 2CH 27 Bible Online

2CH 27 - South Giziga bible

2CH 27

¹Yotam micifi buy madiɗa na, naɓa naŋ ti vi kukur cuw nga zlum, a zum buy a Zeruzaleme vi kuruˀ nga merkeɗe. A zilaka mumuŋ naŋ Yerusa, zuŋ ngi Sadok.

²Yotam a gi gwat mikaslsla a mihiri ngi Bumbulvuŋ, heˀ kaɓa cine naŋ Oziyas, manja a ci ar hay ngi Bumbulvuŋ ɓula. Amma mizli a ndiram i mihiryahay le na si.

³I naŋ mindira mizlingre vay muŋ ngi hay ngi Bumbulvuŋ na. A ndir gwatay le ar mohol ngi slala Ofel na.

⁴A ndir walahay madiɗahay le a muwã Zuda, waɗ li ɗumoy ati hay migilahay ar li ngi wuzla widiseye.

⁵Yotam a gi vurum ti buy ngi Amoŋhoy, a lum bugawla le a hirnga taŋ. Angi vi nah, Amoŋhoy a vulakaŋ ɓiri bara ton makir, alkamari ton durmuk makir, waɗ daw giziŋ ton durmuk makir, hana i gwat Amoŋhoy muvulakaŋ taŋ. Angi vi mucuw naŋ ati mimakir naŋ ma na, a vulakaŋ taŋ kanah ma.

⁶Yotam a lum gidaŋ kanah na, asi a cica sipi jiviɗ naŋ kaslsla a mbuŋ Bumbulvuŋ Buymisemuŋ naŋ.

⁷Is ngi ɓi ngi slra ngi Yotam, vurum naŋ miga taŋ gar ati gwat naŋ miga taŋ gar na, i mutuho taŋ le ar ɗerewol ngi buy madiɗa ngi Israyeley ati ngi buy madiɗa ngi Zudahaya.

⁸Ti Yotam micifi buy madiɗa na, naɓa naŋ ti vi kukur cuw nga zlum, yo a zum buy a Zeruzaleme vi kuruˀ nga merkeɗe.

⁹Yotam mumuc na, a dikaka ar walahay ngi Daviti. Mangal naŋ Ahas a zuɓa li naŋ.