Read South Giziga 2CH 28 Bible Online

2CH 28 - South Giziga bible

2CH 28

¹Ahas micifi buy madiɗa, naɓa naŋ ti vi kukur cuw, a zum buy a Zeruzaleme vi kuruˀ nga merkeɗe. A gi gwat mikaslsla a mihiri ngi Bumbulvuŋ kaɓa dideˀ naŋ Davite ta.

²A sipi di nga naŋ i sar ngi buy Israyeley, hã a vuɗ kulihey ngi gi mezegwel da Baˀalay.

³Naŋ ti haŋ naŋ, a gi mikuli ti urdi angi hurjijiŋ ngi Hinom, yo a gi mikuli ti ziri naŋ mizilehey, kaɓa gi gwat mukuyta wãˀ ngi sukwi ngi mizli Bumbulvuŋ muɓula taŋ a mbuŋ Israyele na.

⁴A gi mikuli ti ginewey, yo a wur urdi ar li miɗingir ɗingir ngi gi mikulihey, a muwãhay waɗ asi widis mikip kipey gar.

⁵Bumbulvuŋ Buymisemuŋ naŋ a vulaŋ asi haŋ ngi buy Siri, Sirihey a kiɗakaŋ, yo a jam bekehey haɗi ma, a ram taŋ nga Damas. A ci asi haŋ ngi Peka, mangal ngi Remaliya, buy Israyel, a tikaŋˀay muwãˀ naŋ.

⁶Angi hin purla na, Peka, mangal ngi Remaliya, a kiɗ soje miwirwireye durmuk skat ti kukur cuw asi Zudahaya. Asi Zudahay a pulaka Bumbulvuŋ Buymisemuŋ ngi dideˀ taŋhaya le.

⁷Zikri, mbur bugawla ngi Efrayime, a kiɗa Maˀaseya, mangal ngi buy Azirikam, mbur micawwa ngi hay buyo waɗ Elkana, gawla migweˀ ngi vu buy.

⁸Israyel vay muŋhoyo, a jam asi sukum taŋhaya, mizli durmuk skat skat cuw, ngwasay, ziri mizilehey ati mongosohoy. A hilam gwat taŋhaya haɗa ma, a cohom taŋ nga Samari.

⁹Mijiviɗ ngi Bumbulvuŋ ada a Samari, a zilaka Odet, a bo nga ji hirnga ti soje Israyeley mandilam nga Samari, a ɓa taŋ: «Ani Bumbulvuŋ Buymisemuŋ ngi dideˀ kumoy miji mevel ar Zudahay tuwa na, a vulukum taŋ le asi haŋ kumo, joˀ ki ngizlaka taŋ ti himaˀ haɗi, hã hurum naŋ a ndil sesẽŋ a muŋ.

¹⁰Na wurenna, mizli Zuda ati Zeruzalem tayna, ki wuɗam ɓa ki gam taŋ beke waɗ gawla kumoy kini! Da kine na, naɓa ki gam di i mungra tehhe a muŋ avu Bumbulvuŋ Buymisemuŋ kumo takwa?

¹¹Wurenna cinikiy di ɗi, sukum kum Zudahay, kum mijoko taŋ ng'ar beke na, pulaka taŋ, asi Bumbulvuŋ a ro ti mevel fõh fõh ar kum.»

¹²Buyoy a slikiɗam a wuzla buy Efrayimeye, i ti: Azariya, mangal ngi Yohanaŋ, Berekiya mangal ngi Mesilemot, Yehizikiya mangal ngi Salum waɗ Amasa mangal ngi Hatlay, a mbiɗaka hirnga da mizli mamoko tir vurumo,

¹³dar a ɓaka taŋ na: «Ki soko ti bekehey ng'aka ta, asi a sa ci ti ndra ar mungra a mbuŋ Bumbulvuŋ. Ki wuɗam ɓa ki poko mekelem nga mi mungra ndra ati malambaˀ ndrahay na ma, dambalaka mungra ndrahay vuna taŋ dudok avu ndra, yo Buymisemuŋ a ro ti mevel fõh fõh ar Israyeleye si!»

¹⁴Mizli mamoko tir vurum tuwa, a pulaka bekeheye ati gwat taŋ mihiloko taŋ ar vurumo daˀ a mbuŋ buyoy ati zigiduwo.

¹⁵Akẽh na, mizli muwunahay pal pal, a slikiɗam, a vulaka gidaŋ da dangayaya. Gwatay taŋ mihiloko taŋ ar vurum tuwa, a hilam avu zanahay ati ta rakaya, a vulaka taŋ da mizli miɓaˀ ɓaˀ kine. A vulaka gwat ngi zum waɗ gwat ngi si da mizli gar, yo a juwaka taŋ waˀahaya. A hilaka misi bleheye cek a duba zunguhoy, a ram taŋ ng'avu sukum taŋ Zudahay a Zeriko, ar walahay Dibinojehey. A dirba nah, a mam nga Samari a muŋ.

¹⁶Ti di nah na, buy Ahas a slin ng'avu buy Asirihey ɓa a soko jinakaŋ.

¹⁷Edomoy a soko ma nga kiɗa vu ati Zudahay, yo a jam mizli ng'ar beke ma.

¹⁸Yo Filistiheye kwana, a cam le ng'ar walahay ngir Mikutukoyo, yo ng'ar vay ayzaw, hirwuy Zudahaya. A zumaka walahay Bet-Semes, Ayaloŋ, Gederot ati Soko, Timna, Gimzo waɗ prok taŋhaya, dar a pam ar taŋ.

¹⁹Naŋ kine, Bumbulvuŋ mitika ˀay da Zudahaya na, asi Ahas mihizigiɗa mizli Zudahaya, ɓa a pulaka Bumbulvuŋ, yo ɓa mizli a ziriɗakaŋ mi na.

²⁰Teglat-Falasar, buy Asiri, anja ɓa aru nga jina Ahas tuwa ma na, naŋ aru nga zlaŋ ngi kiɗa vu jak ma.

²¹Naŋ kine, Ahas a hil cah avu zlili ngir hay ngi Bumbulvuŋ, cah avu ngi buyo, waɗ cah avu ngi mizli madiɗa ngi buyoyo, a vula da buy Asiri, amma ko a lum jini vurˀe ta.

²²Ahasa, ko ti taŋ mindahakaŋ hirnga ndah na tekeɗe kwana, ara ziriɗa mi ngi Bumbulvuŋ ti vendeke na si jaka.

²³A ga mikuli da kuli ngi si ruwuy Damasay, mipakaŋ hirnga vuna jaka, a ɓi: «Ani kuli ngi buy Sirihey ara jinaka taŋ, zuwen i ga taŋ mikuli ɓa a soko jinikiy ya.» Dambalaka migaka ɓa buy ati Israyeley gar a zizaka hirnga taŋ na, i kuli tayna vuna.

²⁴Ahas a cikila hirnga ngi gwat ngir hay ngi Buymisemuŋhoyo, a waha taŋ meɗ meɗ. A gica miviŋ ngi hay ngi Bumbulvuŋhoyo kiɗasl kiɗasl. A dirba nah, a ndir li gi mikulihey ar mazlaka jiviɗ ngi Zeruzalemey gar.

²⁵Ar walahay ngi si ruwuy Zuda gar na, a ɗiyi li miɗingir ɗingir ngi wura urdihey da kuli ngi mulakay. Naŋ miga gwat ngi ji mevel da Bumbulvuŋ Buymisemuŋ ngi dideˀ naŋhay na kahana so.

²⁶Ahasa, is ngi slra naŋ ati gwat naŋ miga taŋ gar, zle avu zli virzi naŋ hã avu kiɗa mi naŋ na, i mutoho le ar ɗerewol ngi buy madiɗa ngi Zudahay ati Israyeleye.

²⁷Ahas mumuc na, a dikakaŋ ar walahay Zeruzalem, amma aka kaŋ angi zivi ngi buyoy ta ɓula. Mangal naŋ Ezekiyas a zum buy ar li naŋ.