Read South Giziga 2CH 29 Bible Online

2CH 29 - South Giziga bible

2CH 29

¹Ezekiyas micifi buy madiɗa na, naɓa naŋ ti vi kukur cuw nga zlum, yo a zum buy a Zeruzaleme vi kukur cuw nga ngoltir. Mumuŋ naŋ i zuŋ ngi Zakari, a zilaka Abi.

²A gi gwat mikaslsla a mihiri ngi Bumbulvuŋ, heˀ kaɓa dideˀ naŋ Daviti.

³Ezekiyasa, ar vi mudumbuŋ, kiya muɓulaˀ naŋ ar buyo si na, a wuna miviŋ ngi hay ngi Bumbulvuŋhoyo, a ɗiya hiri taŋ.

⁴A zilo masayay ati levihey, a cikila taŋ arleˀe, kini tisi pas ngi mipriki,

⁵a ɓa taŋ: «Kum levihey, cinam! Wurenna, tiram pal, yo hay ngi Bumbulvuŋ Buymisemuŋ ngi dideˀ kumoyo, tiram di pal. Gwat misi dilihey misi ar hay ngi Bumbulvuŋ gar na, bam taŋ avra.

⁶Asi dideˀ ndraˀahaya, a gam teŋteŋ avu Bumbulvuŋ Buymisemuŋ ndra ta, yo a gam malambaˀ le a mbuŋ naŋ: a pulakaŋ mbak, a ɗuvam hiri ng'ar hay ngi Bumbulvuŋ mata, yo a mbiɗakaŋ duba le,

⁷hã a gicaka miviŋ ngi jawleeruhoyo giceˀ giceˀe, a mucaka vu ngi lampeheye, a pulaka wura urdi ati gi mikuli mizlam zlam wãˀ da Buymisemuŋ ngi Israyele.

⁸Nah na, a ga ɓa Bumbulvuŋ a slikiɗ himaˀ ar Zudahay waɗ ar Zeruzalemeye, hã a tiri taŋ gwat ngi muɗa didak, mazluwun vu, yo ngi singir, kaɓa kum mapuraka ti hiri kum ani na.

⁹Taŋ mikiɗaka dideˀ ndrahay ti maslalam, a jaka ziri ndra mizile ati mongosohoy waɗ ngwas ndrahay ng'ar beke na vurˀe.

¹⁰Wurenna so na, i wuluk le ngi jumoˀay ati Bumbulvuŋ Buymisemuŋ ngi Israyele, ɓa mevele mufõh fõh ar ndra na, a tisli.

¹¹Ziri ɗuwoy, wurenna, ki slam himaˀ ta, asi Bumbulvuŋ a wini di i kum ngi cici a mbuŋ naŋ, ngi gaŋ mezegwel, ngi gaŋ slra waɗ ngi wuraŋ urdi.»

¹²Akẽh na, levihey a slikiɗam dedeŋ a mbuŋ: asi muy ngi Kehata, i ti: Mahat mangal ngi Amasay, Zowel mangal ngi Azariya. Asi muy ngi Merariheye, i ti: Kis, mangal ngi Abidi waɗ Azariya, mangal ngi Yehalelel. Asi muy ngi Gersoŋhoyo, i ti: Yoˀa, mangal ngi Zima waɗ Eden, mangal ngi Yoˀa.

¹³Asi muy ngi Elisafaŋhaya, i ti: Simri ati Yeˀiyel. Asi muy ngi Asafaya, i ti: Zakari ati Mataniya.

¹⁴Asi muy ngi Hemana, i ti: Yeˀiyel ati Simey. Asi muy ngi Yedutuŋhoyo, i ti: Semaya ati Uziyel.

¹⁵A kusoko sukum taŋhaya, a tiram taŋ pal. A dirba nah, a ram nga bi ti dili ngir hay ngi Bumbulvuŋ, kaɓa buy miɓa, yo kaɓa mingiɓi ngi Bumbulvuŋ.

¹⁶Masayay a cam ng'ar hay ngi Bumbulvuŋ, ɓa a bam ti dili ngi haya, yo gwat misi dili hey, taŋ mulumaka taŋ gar ar hay ngi Bumbulvuŋ na, a boko taŋ nga wazlaray. A dirba nah, levihey a hilaka taŋ, a bam taŋ, ara zliɗaka taŋ ar hurjijiŋ a Sedroŋ.

¹⁷A zlaka tiram ti hay ngi Bumbulvuŋ pal na, ti hin mudumbuŋ ngi kiya. Ar hin midangafaɗ naŋ na, a ndiloko le ar jawleeru ngi Bumbulvuŋ. A gam hin dangafaɗ ar li tiri ti hay ngi Bumbulvuŋ pala. Ar hin mukuruˀ nga merkeɗ ngi kiya mudumbuŋ hana na, a kiɗaka mi ngi slra le.

¹⁸Dar akẽh na, a ram ngi hay buy Ezekiyasa, a ɓakaŋ na: «Buy, i bam ti dili ngir hay ngi Bumbulvuŋ le gar, waɗ ngir li gi mikuli mizlam zlam wãˀa, jom ati ngi gwat ngi slra naŋhaya, ngi tabul ngi pi ɗafahay jom ati ngi gwat ngi slra naŋhaya,

¹⁹waɗ ngi gwatay, buy Ahas mizliɗa taŋ lambaˀ zleˀe ti ziriɗa mi naŋ ar zuma buyo. Gwat tayna, i ɗiyaka taŋ le ar li taŋhaya, yo i tiram taŋ le pal. I paka taŋ le sek a mbuŋ li gi mikuli da Bumbulvuŋ.»

²⁰Prik prik ngi li naŋ muwun na, buy Ezekiyas a cikila buyoy ngir walahaya, a jiɗam ng'ar hay ngi Bumbulvuŋ bummoˀ.

²¹A soko ti gusoŋ tarnaˀ, zlengerek tarnaˀ, ziri tumuŋhoy tarnaˀ, bazuway tarnaˀ, ɓa a gam taŋ mikuli ngi pula mungra ngi mizli ngi hay buyoy, ngi hay ngi Bumbulvuŋ waɗ ngi mizli Zudahaya. Buy a ɓa masayay, dideˀ ngi Aroŋhoyo, ɓa a gam taŋ mikuli ar li gi mikuli da Bumbulvuŋ.

²²A slaka ˀay ngi gusoŋhoy tuwa, masayay a tiɓaka pumbuso, a paka ng'ar li gi mikuli. A slaka ˀay ngi izimey waɗ ngi zlengerekey tuwa, masayay a tiɓaka pumbus taŋhaya, a paka ng'ar li gi mikuli.

²³A dirba nah, bazuwayay ngi gi mikuli ngi pula mungra na, a soko taŋ nga mbuŋ buy ati zigiduwo, dar buy ati zigiduwo, a bucaka haŋ ar taŋ.

²⁴Masayay, a slaka ˀay taŋ, a tiɓaka pumbus taŋ, a paka ng'ar li gi mikuli ɓa ngi zuɓa mungra ngi Israyeley gar, vur mike na, mikuli mizlam zlam ati mikuli ngi pula mungra, buy miɓi ɓa a gaka na, vur Israyeley gar.

²⁵Buy a cifa leviheye ar hay ngi Bumbulvuŋ, ti jãwjãway, ti gujuvuroy waɗ garayahay a haŋ, kaɓa ɓi ngi Davit miɓa ati ngi Gat, mbur mupur waɗ ngi mijiviɗ Nataŋ. Asi ɓi miɓa nah na, i ɓi ngi Bumbulvuŋ mubo tivi mijiviɗ naŋhay.

²⁶Leviheye, ti taŋ micifam jojoˀ ti gwat ngi dunguroy, Davit miɗiya taŋ tuwa, yo masayaya kwana, ti za raˀahaya na,

²⁷Ezekiyas a ɓa mizli, a gam mikuli mizlam zlam ar li gi mikuli, yo hirak ti taŋ mira zlaka gi mikuli mizlam zlam tuwa na, a zlaka zli dimis ngi hunuma Bumbulvuŋ ya, a faka za raˀahaya asi gwat ngi kiɗ ngi dunguroy, Davit, buy Israyel miɗiya taŋ tuwa.

²⁸Mizli mukos kos gar tuwa huruk huruk a ruwuy, dimis ara zli, yo za ra ara fi, hã tay mi ngi mikuli ngi zlum ti zlumo.

²⁹Mikuli mikiɗ mi na, buy ati mizli misi akẽh gar, a huruk hurukam dilak dilak, a hurkom a ruwuy a ruwuy.

³⁰Akẽh na, buy Ezekiyas ati buyoy a ɓaka leviheye, ɓa a hunumaka Buymisemuŋ ti dimis ngi Davit ati ngi Asaf, mbur mupur na. Dar levihey a hunumakaŋ ti mumul, a huruk hurukam, a hurukom a mbuŋ Buymisemuŋ.

³¹Ezekiyas a zla mingiɓi, a ɓi: «Wurenna, ani kum gar ti gwatay a haŋ ngi vul da Bumbulvuŋ so, girjohoko, gwat ngi mikuli ngi jumoˀay ati ngi hunuma Bumbulvuŋ, soko taŋ ng'ar hay naŋ. Dar mizli a soko ti gwat ngi mikulihey ati gwat ngi vul ngi hunuma Buymisemuŋ, yo mizli misi ti mevel mezlehey gar na, a soko ti ginew ngi mikuli ngi zlum zlam zlam wãˀa.

³²Gwat taŋ migam di mikuli mizlam zlama jom gar na, sla kukur tarnaˀ, zlengerek skat, ziri tumuŋhoy skat skat cuw, a gam taŋ mikuli zlam zlam gar taŋ da Bumbulvuŋ.»

³³Mikuli mekelemeye kwana, sla skat skat merkeɗ, tumuŋ ati ˀawaya durmuk makir.

³⁴Masayay misi akẽh taŋ haɗa ta, a suwutaka ginew ngi zlum zlam zlamaya gar gu ta. Vurˀe, sukum taŋ levihey a jinaka taŋ ar slra taŋ, hã avu kiɗa mi naŋ, yo hã masayay migam gwat ɓa a tiram taŋ pala. Asi mike na, leviheye taŋ wirwir haɗa ngi gi gwat ɓa a tiram taŋ pala.

³⁵Gisiŋ, Mikuli ngi zlum zlam zlamaya, taŋ haɗa, jom ati mungul ngi gi mikuli ngi ngiɓiˀay waɗ mbaazla ngi pusl asi mikuli mizlam zlama. A ɗiyaka slra ngi gi ar hay ngi Bumbulvuŋ kahana.

³⁶Ezekiyas ati mizli gar, ara mumulom asi gwat Buymisemuŋ miga vur taŋ gar, asi gwatay a gam kutum kutum si.