Read South Giziga 2CH 3 Bible Online

2CH 3 - South Giziga bible

2CH 3

¹Salomoŋ a zla ndira hay ngi Bumbulvuŋ a Zeruzalem a muwã Moriya, ar li Buymisemuŋ mibiga vu da cine naŋ Davit, ar li Davit miɗiya a məlaŋ ngi Ornaŋ, mbur Zebusi.

²Salomoŋ a zla ndir naŋ ar kiya mucuw naŋ ngi vi mumufaɗ naŋ ar buyo.

³Ɗuva virzi ngi ndira hay ngi Buymisemuŋ, Salomoŋ a wa ani kaɓa mawam gwat misi zleˀe: jek naŋ, metir kukur makir, sliprik naŋ, metir kuruˀu.

⁴jawleeru, jek naŋ, metir kuruˀ, a waka tir sliprik ngi hay madiɗa, gil naŋ so na, metir kukur merkeɗe. Huroˀ naŋ gar, a puyakaŋ ɓiri tapasl tapasl pal naŋ.

⁵A tupaˀa dum ngi migidaŋ mimezle da dalam ngi hay madiɗa na zlar gar, a kuroŋ ɓiri tapasl tapasl mileɗeɗe sirit wãˀ, waɗ kalaf ngi dibinoje ati sen memeɗehey ɗiyeˀ ɗiyeˀ avu dum mutupaˀ tupaˀ avu dalam tuwa.

⁶Hay madiɗa nah vuna, a gaŋ wuya ti ɗugur mupuɗaw puɗaway ma. Ɓiri tapasl tapasl migam di slra a ra, i musoko di ti ruwuy Parvayim.

⁷Gwat ngi hur hayay gar na, a kuro taŋɓiri tapasl tapasl sirit sirit: i mbalay, dum ngi miviŋhey, hur dalama, palalam ngi miviŋhey, waɗ kerubeŋhey ceɗ ceɗ avu dum ngi vi dalam ngi hur haya.

⁸Yo a ɓa mizli, a ɗiyam hay mazilaka ‹li mipal wãˀ›, jek naŋ metir kuruˀ, a wa tir sliprik ngi hay madiɗa, waɗ sliprik naŋ metir kuruˀ ma. A kuroŋ ɓiri tapasl tapasl mileɗeɗe, a tiki ɓiri tapasl tapasl ton kukur cuw ngi ga slra nah.

⁹Ɓiri tapasl tapaslmigam taŋ ponti ngi slra na, dudok naŋ reta kilo. Dum micihila ngi muŋ ngi hur viŋ kwana, a kuroŋ ɓiri tapasl tapasl sirit sirit wãˀ.

¹⁰A hur li mipal wãˀ tuwa na, a ɓa mizli, a pam kerubeŋhey cuw ti ɓiri muluwuslaŋ, waɗ a kuro taŋ ɓiri tapasl tapasl sirit sirit wãˀ.

¹¹Kirpasl ngi kerubeŋheye, jek taŋ metir kuruˀu. Kirpasl ngi mudumbuŋ, jek naŋ metir cuw ti reta, hã a wusa dalam ngi hur haya vrek vrek, kirpasl vay numuŋ kwana, metir cuw ti reta, hã a wusa kirpasl ngi kerubeŋ vay numuŋ vrek vrek.

¹²Kirpasl ngi kerubeŋ numuŋ, jek naŋ metir cuw ti reta, hã a wusa dalam ngi haya, kirpasl vay numuŋ metir cuw ti reta, hã a zliram vrek vrek ati kirpasl ngi kerubeŋ mekeleme.

¹³Kirpasl ngi kerubeŋ tayna, pusak pusak na, jek taŋ metir kuruˀu. Taŋ dedeŋ dedeŋ, hiri pulaˀ pulaˀ nga hur hay.

¹⁴A ɓa mizli, a jam gabaga mislirkeɗ, munduva naŋ wit wit, cihhe waɗ mindezze, a gakaŋ wuya ti kerubeŋhey taf taf, dar dar ava.

¹⁵A ɓa mizli, a ngam ɓamtalay cuw a mbuŋ haya, gil taŋ metir kuruˀ nga tarnaˀ kuruˀ nga tarnaˀ, mecepek tiɗeˀ tiɗeˀ a hirnga taŋhaya, jek ngi mecepeke, metir cuw ti reta cuw ti reta.

¹⁶A ɗiyam sen memeɗehey kaɓa ngir hay ngi Buymisemuŋ tuwa, waɗ tiɗeˀ tiɗeˀ taŋ a hirnga ɓamtalaya. A ɗiyam gwatay laŋ laŋ skat, ka yi ngi hunduruk, a luwaka taŋ law law avu mi ngi sen memeɗehey tuwa.

¹⁷A ng'aka ɓamtalay tuwa kaˀ kaˀ a mbuŋ hay ngi Buymisemuŋ, pal ti hazum, pal ti gula: a zilaka misi tir vay hazumo: Yakiŋ, yo misi tir vay gula: Boˀas.