Read South Giziga 2CH 30 Bible Online

2CH 30 - South Giziga bible

2CH 30

¹Ezekiyas a zilo Israyeley ati Zudahaya gar, hã a tuh letir da mizli Efrayimey ati Manasehey, ɓa a soko ng'ar hay ngi Bumbulvuŋ a Zeruzalem, ɓa a gam muguzlum Pak ngi Bumbulvuŋ Buymisemuŋ ngi Israyeleye.

²Naɓa buy ati mizli hirnga naŋhay waɗ jum ngi mizli ngi Zeruzaleme, a tiɓaka wuluk ngi gi muguzlum Paka le ar kiya mucuw naŋ.

³Asi mike na, taŋ migaka zleˀe ar hin naŋ kaslsla gu ta na, asi masayaya, mitiram taŋ pal na, taŋ pireˀe, yo mizli a kusom a Zeruzaleme t'aruŋ.

⁴Ɓi nah a cira hiri le da buy ati zigiduwo.

⁵A zlaka ɓa ɓi nah bal bal asi ruwuy Israyel gar, zle a Ber-seba hã a Daŋ. A ziloko mizli nga Zeruzalem ngi gi muguzlum Pak ngi Bumbulvuŋ Buymisemuŋ ngi Israyel, asi mizli magaka zleˀe kaɓa mutohoko ɓi naŋ na, taŋ haɗi ta.

⁶Letirey buy ati mizli hirnga naŋhay mutohoko taŋ tuwa, mijiviɗey a ram taŋ da mizli ngi si ruwuy Israyel ati Zuda zlar gar, a tilam mi ti ɓi ngi buyo da mizli, a ɓaka taŋ: «Israyeley, kum mulohoko tisi haŋ ngi buy Asirihey na, moko a muŋ ng'avu Bumbulvuŋ Buymisemuŋ ngi Abraham, ngi Izak waɗ ngi Zakopo, ɓa naŋ kwana, a mo ng'avu kum aya.

⁷Ki gam kaɓa cine kumoy ati sukum kumoy na ta, Bumbulvuŋ Buymisemuŋ ngi dideˀ taŋhaya, taŋ a gam teŋteŋ ava ta, mbak hã a vula taŋ, ɓa mizli a ngizlaka taŋ, kaɓa kum mapuraka ani na.

⁸Wurenna so na, ki cinam takaɓa cine kumoy na mata. Vulam haŋ ng'avu Bumbulvuŋ, a ram ng'ar hay naŋ, naŋ mitiri di pal ngi caˀa na, yo gam gawla ngi Bumbulvuŋ Buymisemuŋ kumo, ɓa mevele mufõh fõh ar kum na, a tisli.

⁹Naŋ kine, da ki moko le ng'avu Bumbulvuŋ na, naɓa sukum kumoy ati ziri kumoy mijahay nga hirwur mulak na, mizli miji taŋhay vuna, a sa puraka taŋ ircece, yo a sa pulaka taŋ, a moko nga hirwuy hana a muŋ. Asi Bumbulvuŋ Buymisemuŋ kumo, naŋ mezle haɗa, yo a pur ircece. Da ki moko le ng'ava na, naŋ anta sa mbiɗi duba avu kumo ta.»

¹⁰Mijiviɗeye, a ram vur walahay vur walahay angi hirwuy Efrayim ati Manase zlar gar, hã sesẽŋ a Zabuloŋ, amma mizli a singiram ar taŋ, yo a puraka ɓi taŋ ka ɓi ngi sefel.

¹¹Ti nah gar na, mizli mekelemey ar sukwi ngi Aser, ngi Manase ati ngi Zabuloŋ, a sinaka malambaˀ taŋ le, a ram nga Zeruzaleme.

¹²Asi ruwuy Zuda kwana, Buymisemuŋ ara gi slra, ɓi ngi buy ati mizli hirnga naŋhay miɓaka na, ɓa mizli, jom ˀay purla, a gaka kaɓa Bumbulvuŋ miɓa.

¹³Angi kiya mucuw naŋ ngi vi na, mizli a kusom haɗi a Zeruzaleme ngi gi muguzlum ngi ɗaf manja ˀis a ra: mizli a kusom haɗi teˀe.

¹⁴A zlaka a wahaka li gi mikulihey misi a Zeruzaleme, waɗ li gi mikuli ngi urdi ngi wur ti wuroyo, ara zliɗaka taŋ ng'ar hurjijiŋ a Sedroŋ.

¹⁵Ar hin mukuruˀ nga mufaɗ ngi kiya mucuw naŋ na, a slaka ˀay ngi ginew ngi Pakaya. Masayay ati leviheye, mesem a ga taŋ, a tiram, taŋ pal, a ram ara gaka mikuli mizlam zlamaya ar hay ngi Bumbulvuŋ.

¹⁶A roko dedeŋ ar li taŋ ar li taŋ, kaɓa mutohoko ar ɓimujuwa ngi Moyis, mbur ngi Buymisemuŋ: levihey a tiɓaka pumbus ngi ginewey magam taŋ mikuli, a vulaka da masayay, joˀ taŋ kwana, a paka ng'ar li gi mikuli.

¹⁷Asi mike, mizli haɗi a wuzla kuso, mitiram taŋ pal ta tuwa na, a ndilaka ngi gi slra mipal da Bumbulvuŋ ta, dar levihey a slaka ˀay ngi ginew ngi mikulihey ar deɗe taŋ.

¹⁸Mizli haɗi a zuɓaka dili taŋhay avra ta, vendeke naŋ i mizli Efrayimey, Manasehey, Isakaray waɗ Zabuloŋhoy, amma a zumam ɗaf ngi Paka gbaˀ na si, a gaka kaɓa mutoho ɓi naŋ na ta. Dar Ezekiyas a dir dibiɗ vur taŋ, a ɓi: «Bumbulvuŋ mezle, anja ki pula mungra ngi

¹⁹mizli gar mutumom vu ti mevel purla ngi sipuw ka Buymisemuŋ, ka Bumbulvuŋ Buymisemuŋ ngi dideˀ taŋhay na, ko da taŋ ti hereweɗ a mbuŋ gwat muvuku vu taŋ tekeɗe kwana, pula taŋ mungra taŋ na takwa!»

²⁰Bumbulvuŋ a cine diradibiɗ ngi Ezekiyasa le, a ga bonoy da mizli mata.

²¹Israyeley misi a Zeruzaleme, a gaka muguzlum ngi Peŋ manja ˀis ara ti mumul haɗa, hã hin tarnaˀa. Naɓa levihey ati masayaya kwana, vur hin gar na, ara hunumaka Bumbulvuŋ ti gwat ngi dunguroy mahurumom haɗa, mihĩˀĩ vurˀe.

²²Levihey mupulaka mevel taŋ le mbak kuy kuy da Bumbulvuŋ gar na, mingiɓi ngi Ezekiyas a ci le a mevel taŋ. Joˀ a ram ti gi muguzlumo hã hin tarnaˀ, a roko gam mikuli ngi ngiɓiˀay, yo ara gaka sise da Bumbulvuŋ Buymisemuŋ ngi dideˀ taŋhaya.

²³A dirba nah, mizli gar mukusomo, a hĩyãka le, ɓa a gam hin tarnaˀ mekelem ava ma, a gam hin tarnaˀ ava ma ar li gi muguzlumo ti mumul.

²⁴Asi mike na, Ezekiyas, buy Zuda, a vul vur mizli mukos kos vuna, gusoŋ durmuk waɗ tumuŋ ati ˀaway durmuk tarnaˀa, yo mizli hirnga naŋhay na kwana, a vulam le vur mizli mukos kos vuna ya, gusoŋ durmuk waɗ tumuŋ ati ˀaway durmuk kuruˀ ma. Masayay a bam tiram le, taŋ pal.

²⁵Jum ngi mizli Zudahay gar ara mumulom. Naŋ kine, ti masayay, levihey, jum ngi mizli musoko ti Israyel gar, mizli misi ti hayay musoko tisi ruwuy Israyel, misi ti hay taŋhay a Zuda gar na, ara mumulom.

²⁶Mumul a gi haɗa a Zeruzaleme, asi diga ti hin ngi Salomoŋ, mangal ngi Davit, buy Israyel na, a gam muguzlum misi kanah a Zeruzaleme ɗaˀ ta.

²⁷A dirba nah na, Levihey masayay a slikiɗam, a ɗuwulaka mi da mizli. ˀAy ngi diradibiɗ taŋ a ndil sesẽŋ a muŋ, ar li Buymisemuŋ mipal misi anga, a tiɓa diradibiɗ taŋ.