Read South Giziga 2CH 31 Bible Online

2CH 31 - South Giziga bible

2CH 31

¹A dirba muguzlum mikiɗ mi na, Israyeley misi akẽh gar a ram ng'ar walahay Zudahay, ara wahaka ɗugur mikaˀka haya, a bukoko kuli ɓamtalaya, a wahaka li miɗingir ɗingir magam mikulihey ar taŋ ati li gi mikuliheye, waɗ susuyum susuyum taŋ leɗeɗ wãˀ asi ruwuy Zuda, Benjameŋ waɗ asi ruwuy Efrayim ati Manase ma. A dirba nah, Israyeley gar a mam ng'ar walahay taŋhay a muŋ, mbur gar ngi hay naŋ ngi hay naŋ.

²Ezekiyas a cifa masayay ati leviheye, mizli ti hunum taŋ ti hunum taŋ, bac nga hirnga hunum taŋ vuna ma na, a vula slra ngi mburo ngi mburo. A vul da masayay ati leviheye, i slra ngi mikuli mizlam zlam, mikuli ngi ngiɓiˀay, slra ngi mezegweley, gi sise ati ngi hunuma Bumbulvuŋ a mizlingre walahay guɗuk ngi Bumbulvuŋ.

³Buy a wuɗ cah avu zlili naŋ, ɓa ngi gi mikuli mizlam zlamay, magaka taŋ ti miprik waɗ ti pastaˀa, magaka taŋ tapas sabat, tapas kiya muslo le, waɗ tapas muguzlum mekelemeye, kaɓa mutohoko ɓi nah ar ɓimujuwa ngi Bumbulvuŋ.

⁴Dar buy a ɓa mizli Zeruzalemeye, ɓa a vulaka mi ngi masayay ati leviheye, ɓa a vulaka vu taŋ taˀ kuy kuy ngi sipa ɓimujuwa ngi Bumbulvuŋ.

⁵Taŋ misinaka ɓimujuwa nah sin si na, Israyeley a soko ti mudumbuŋ ngi alkamari taŋhaya ciɗngim ciɗngim, mbaazla, mal, mam ati gwat ngi migam mekelemey gar si. Yo a soko ti mukuruˀ ngi gwat taŋhaya tiɗeˀe.

⁶Israyel ati Zudahay misi ar walahay Zudahaya, taŋ kwana, a vulaka mukuruˀ ngi slahay, tumuŋhoy ati ngi ˀawaya waɗ ngi gwat muvulahay le da Bumbulvuŋ Buymisemuŋ taŋ na ma.

⁷A zlaka cikila gwata zikitiŋ zikitiŋ ar kiya mimakir naŋ, a sa kiɗ mi ar kiya mitarnaˀ naŋ.

⁸Ezekiyas ati mizli hirnga naŋhay musoko puraka gwatay mizikitiŋ zikitiŋ tuwa na, a gaka sise da Bumbulvuŋ waɗ da Israyel, mizli naŋhaya.

⁹Ezekiyas a cufuɗa masayay ati leviheye vur gwat mizikitiŋ zikitiŋhey tuwa.

¹⁰masay Azariya, madiɗa, muy ngi Sadok, a mbiɗaŋ di: «Diga mizli mizlaka so ti gwat ngi migam taŋhay ng'ar hay ngi Bumbulvuŋ na, i zumam hã i mbam, is naŋ a ndir lambaˀ, asi Bumbulvuŋ a ɗuwula mi le da mizli naŋhaya, mizikitiŋ zikitiŋ hana i is naŋ mindir.»

¹¹Ezekiyas a ɓa mizli, ɓa a ɗiyam hayay a ciki hay ngi Bumbulvuŋ, ɓa ngi wi vu ti gwatay anga, joˀ mizli a ɗiyaka taŋ.

¹²Gwatay mizli mawuɗam avu gwat ngi migamay, mukuruˀ ngi gwatay ati gwat muvulahay le da Buymisemuŋ tuwa, a soko taŋ ng'ara so. Konaniya, mbur levi, a wunakaŋ naŋ i miji kaw ngi gwatay, mijingaˀ naŋ kwana, i sukum naŋ Simey.

¹³Buy Ezekiyas waɗ masay Azariya, madiɗa, buy ngi hay ngi Buymisemuŋ, a juwaka ɓi nah na, Konaniya ati Simeye, mijigina gwatay macinam tivi taŋ i ti: Yehiyel, Azaziya, Nahat, Asayel, Yerimot, Yosabat, Eliyel, Ismakiya, Mahat waɗ Benaya.

¹⁴Kore, mbur levi, mangal ngi Imna, mijigina mizlingre vay ngi si pas ngi miprike, slra nga naŋ i gi welele ti gwat mizli muvulaka le da Buymisemuŋ, yo gwat muvula le da Bumbulvuŋ ati gwat mipal wãˀ na, mawuɗoka taŋ i naŋ.

¹⁵Mizli macinam ti vaˀa ar walahay ngi masayaya, i ti: Eden, Miniyamin, Yesuwa, Semaya, Amariya waɗ Sekaniya. Mizli, sey a wunkaka gwat ngi zum da sukum taŋhaya ti jiviɗ naŋ kasl kasl, vur hunum taŋ vur hunum taŋ, wal wal anta ar wala ngi mizli micawwahay ati ziri ta.

¹⁶Mbak mizli mutohoko slimiɗ taŋ hanayna le ma na, ziri misi ti vihey, zle avu makir malla mufuna le, yo mizli masoko vur hin gar ng'ar hay ngi Bumbulvuŋ, ti hunum taŋ ti hunum taŋ gar na, a lumam gwat lum le ngi ga slra taŋ.

¹⁷A tohoko masayaya, vur hay ngi cine taŋ ngi cine taŋ, yo ngi leviheye, zle ti vi kukur cuw hã nga mbuŋ, ti ngay taŋ, ti hunum taŋ.

¹⁸A tohoko taŋ jom ati mizli ngi hayaya gar: ngwasay, ziri mizile ati mongosohoyo waɗ mizli migweˀ ngi vi taŋhaya, misi zliv, gwat muvula le da Buymisemuŋ na, a zumaka zuy ar pas gar.

¹⁹yo a tohoko ziri ngi Aroŋhoy, masayaya, misi angi prok ngi walahay taŋhaya. A wunam mizli, daɗ daɗ ti zlimiɗ taŋhaya, ngi wunka gwat ngi zum da mizli gar a wuzla masayaya waɗ da mizli gar mutohoko slimiɗ taŋhaya le a wuzla leviheye.

²⁰Ezekiyas a gakahana asi ruwuy Zuda gar, a gi di i gwat mezle, gwat mikaslsla, ti jiviɗ mijeŋŋe a mbuŋ Bumbulvuŋ Buymisemuŋ naŋ.

²¹Gwat naŋ maga gar vur slra ngi hay ngi Buymisemuŋ, vur ɓimujuwa ati ɓimuɗuva gar na, a ga ti sipa Buymisemuŋ naŋ ti mevel purla, yo a ga le kasl kasl.