Read South Giziga 2CH 32 Bible Online

2CH 32 - South Giziga bible

2CH 32

¹A dirba ɓi tayna mucohom ati slrahay, Ezekiyas miga taŋ ti biga gi teŋteŋ naŋ a mbuŋ Buymisemuŋ na, Senakerip, buy Asiri, aru nga kiɗa vu ati walahay mugunohoy le ti mohol misi asi ruwuy Zuda, a wuɗ ɓa a tiɓa taŋ.

²Ezekiyas mupura Senakirip ara so ti wuluk ngi kiɗa vu ati Zeruzaleme na,

³a kiɗam slir ati mizli hirnga naŋhay waɗ madiɗa ngi soje naŋhaya, ɓa a dislaka jiviɗ ngi yam miviɗiviɗihey misi a duba gala na, joˀ mizli a jinakaŋ.

⁴Mizli a kusom kweslekwesle, a dislaka miviɗiviɗi ngi yamaya gar ati zlazlar maɓul ti ruwuyo, a ɓam na: «Anja Asirihey masa ndiloko na, a lumam yam aka haɗa ta.»

⁵Ezekiyas a tum vu tum, a ndira hiri ngi mohol muwaha le zleˀe tuwa cek, a ndir hay migilahay ar taŋ waɗ a ndir hay migila mekelem a hur mohol vuna ma, a dika hiri ngi li mazilaka Millo misi ar walahay ngi Davite, yo a ɗiyi ziwitey ati mbarayay mbeˀ mbeˀe.

⁶A cifi madiɗa ngi sojehey ɓa a waka mizli, a kuso mizli cek cek ng'avaŋ a mizlingre ngi walahaya, joˀ a ɓa taŋ mi ngi vula taŋ gidaŋ ani:

⁷«Cicam gidaŋ gidaŋ, gambara gambara! Ki zluwunam ta, ki jijikam kirkir a mbuŋ buy Asiri waɗ a mbuŋ zigiduw muˀurnok ˀurnok misi aseˀe na ta. Asi mike na, misi gidaŋ mifineˀ misi nga naŋ na ada avu ndra:

⁸misi avu naŋ, i gidaŋ ngi mbur titra tewle, amma misi avu ndra, i Bumbulvuŋ Buymisemuŋ ndra, ɓa a jina ndra, yo ar kiɗa vu ndra gar na, a sa kiɗ vu asi ndra.» Mingiɓi ngi Ezekiyas, buy Zuda, a vula gidaŋ le da mizli.

⁹A dirba nah na, Senakerip, buy Asiri, naɓa naŋ da zleˀe ati soje naŋhay gar a Lakis. A slino gawla naŋhay baɗ a diga ng'avi Ezekiyas, buy Zuda waɗ ng'avi mizli Zudahay gar misi a Zeruzaleme, a ɓaka taŋ na:

¹⁰«Senakerip, buy Asiri a ɓukum na: Zeruzalem, muguno le ti moholo, i muguno le ngi kiɗa vu si, na kum mujoara na, ki pulaka mevel kum asi waka?

¹¹Ezekiyas a ɓukum: ‹Bumbulvuŋ Buymisemuŋ ndra, a sa laha ndra tisi haŋ ngi buy Asiri›, na a gukum di i gilaw ti gi, ɓa madalyam waɗ may a kuɗukum ta kwa?

¹²Mususuymo li miɗingir ɗingirey naŋhay ngi gi mikuli ati li gi mikuli naŋhay na, i naŋ vuna takwa? Yo miɓa Zudahay ati Zeruzalemey, ɓa a huruk hurukam a mbuŋ li gi mikuli purla tewle, yo ɓa a wuram urdi sey ara tewle na, i naŋ vuna takwa?

¹³Gwat, ya ati dideˀ ɗuwoy migaka da mizli ngir duniya gar na, ki si na ta kwa? Kuli ngi mizli ngir duniyahay vuna, a tiɓaka hirwuy taŋhaya le gisiŋ tisi haŋ ɗu kwa?

¹⁴Dideˀ ɗuwoy mingizlaka sukwi ngi mizli tayna gar na, i kuli wana a wuzla kuli taŋhay vuna mitiɓa taŋ gu tisi haŋ ɗu ka? Na, Buymisemuŋ kumo a sa tuɓukum tisi haŋ ɗu gu mbri mbrike?

¹⁵Wurenna, ki pulaka Ezekiyas a hurɓukum, a gukum gilaw kine ta! Ki tiɓaka ɓi naŋ ta, asi ko kuli, ko sukwi malla ko zumabuy wana gar na, mindila ngi laha mizli naŋhay tisi haŋ ɗu ati ngi dideˀ ɗuwoyo na, anta. Sokkota kuli kumoy jak ma, anta sa luhukum tisi haŋ ɗu gu ta.»

¹⁶Gawla ngi buy Senakeripey tuwa, a roko ɓam ɓi malambaˀ aruŋ ar Bumbulvuŋ Buymisemuŋ na si, waɗ ar gawla naŋ Ezekiyasa.

¹⁷Senakerip, buy Asiri a tuh letirey ngi za Bumbulvuŋ Buymisemuŋ ngi Israyele, ɓa a singir angaŋ, a ɓaŋ: «Kuli ngi sukwi ngi mizli ngir duniya gar, milahaka mizli taŋhaya tisi haŋ ɗu gu ta na, Buymisemuŋ ngi Ezekiyasa kwana, anta sa laha mizli naŋhaya tisi haŋ ɗu gu ta ya.»

¹⁸Gawla ngi Senakeripey tuwa, a tilam mi ti gidaŋ ti mi heber da mizli Zeruzalemey misi ar mohol tuwa, ɓa a jijikam, yo ɓa a gaka taŋ zluwun, kanah na, ɓa a tiɓaka walahaya ti tuwaˀ ta.

¹⁹A ɓam ɓi a hirnga Buymisemuŋ ngi Zeruzaleme, kaɓa taŋ maɓam ɓi ngi kuli ngi mizli ngir duniyahay, misi i mizli miɗiyaka taŋ ti ɗiyi.

²⁰Akẽh na, buy Ezekiyas ati mijiviɗ Ezayi, mangal ngi Amot, a diram dibiɗ vur ɓi nah, a tilam mi ng'avu Buymisemuŋ.

²¹Joˀ Bumbulvuŋ a slino modro naŋ ng'ar li pi sar ngi Asiriheye, a ngizla soje miwirwirey ati madiɗa ngi sojehey waɗ mizli hirnga ngi buy Asiriheye pay. Buy Asiri tuwa, a mi tilngir tirngir ti mesem nga ruwuy naŋ. Naŋ mici ng'ar hay kuli naŋ na, ziri naŋhay tehhe a muŋ a kiɗaka vagay ti maslalam.

²²Naŋ kahana, Bumbulvuŋ milaha Ezekiyas ati mizli Zeruzalemey tisi haŋ ngi Senakerip, buy Asiri, waɗ tisi haŋ ngi mesene naŋhaya gar. Dar a ga ɓa t'ada zuy zuy ati midigwi taŋhay tika tika gar.

²³Mizli haɗa a soko ti gwatay nga Zeruzaleme ngi vul da Bumbulvuŋ, waɗ gwatay ngatara da Ezekiyas, buy Zuda. Zle ar nah na, sukwi ngi mizli gar ara cikakaŋ hirnga.

²⁴Hirak ti nah na, Ezekiyas a diɗ jiji, breˀ breˀ ngi mucu, a tumbulo Bumbulvuŋ, a ɓaŋ... Bumbulvuŋ a bigaŋ gwat ngi mbuloŋ tir jiji naŋ.

²⁵Amma Ezekiyas a si na gi mezle ngi Buymisemuŋ na ta, naŋ mahuhum vu a mevele tuwa na, Buymisemuŋ a slikiɗ himaˀ ar naŋ, ar Zudahay waɗ ar Zeruzalemeye.

²⁶Ezekiyasa, gar ti naŋ mahuhum vu na kwana, naŋ ati Zeruzalemeye, a hinam hirnga a mbuŋ Buymisemuŋ. Mbak Ezekiyasa, ar hin ngi siifa naŋ na, Bumbulvuŋ a zuɓ himaˀ paɗ le ar taŋ mata.

²⁷Ezekiyas a gi zlili haɗi teˀe, yo a lum dudok haɗi ma. A ɓa mizli, a ndirakaŋ hayay ngi wi vu ti ɓiri bara, ɓiri tapasl tapasl, ɗugur mupuɗaw puɗaway, urdihey, mbarayay, waɗ sukwi ngi gwat mupuɗaw puɗaway gar.

²⁸Yo a ɓa mizli ma, a ndirakaŋ dirgwaɗay ngi wi vu ti alkamari, mbaazla waɗ mal, a ndirakaŋ gezleŋhey da sukwi ngi ginewey gar, waɗ gezleŋ cap cap da ginew mitaˀ jigin taˀ jigineye.

²⁹A ɓa mizli, a ndirakaŋ walahayay taˀ taˀ, yo naŋ da ti tumuŋhoy, ˀaway waɗ slahay haɗi, asi Buymisemuŋ a vulaŋ zlili le haɗi kuyta wãˀ.

³⁰Midisla miviɗiviɗi ngi yam maɓulo ti Gihoŋ na i naŋ, a pulaŋ baray ngir ti ruwuy, kini tisi pas ngi miprik ngi walahay ngi Daviti. Ezekiyasa, gwat naŋ miga gar na, a gi le kasl kasl.

³¹Vurˀe, ti di mislinoko mizli hirnga ngi Babiloŋhoy ngi so purakaŋ, ɓa a cufuɗakaŋ vur gwat migam ɗaˀ tahay migam asi ruwuy naŋ na, Buymisemuŋ a pulaŋ mbak, a ci a kwacay naŋ, ɓa a si na gwat ngir mevele wãˀ.

³²Is ngi slra Ezekiyas miga waɗ sipa jiviɗ ngi Buymisemuŋ naŋ na, i mutoho le ar ɗerewol mazilaka ‹kleŋ ngi mijiviɗ Ezay›, Ezay mangal ngi Amot, yo i mutoho le ar ɗerewol ngi buy Zudahay ati ngi Israyeleye.

³³Ti Ezekiyas mumuc na, a dikakaŋ gweˀ avu jiviɗ majiɗ ng'ar li dika dideˀ ngi Davitey. Ar muc naŋ na, mizli Zudahay gar waɗ Zeruzalemey gar, a gakaŋ dudoko. Dar mangal naŋ Manase a zum buy ar li naŋ.