Read South Giziga 2CH 33 Bible Online

2CH 33 - South Giziga bible

2CH 33

¹Manase micifi buy madiɗa na, naɓa naŋ ti vi kuruˀ nga cuw, a zum buy a Zeruzaleme vi kukur zlum ti zlum.

²A gi gwat malambaˀ a mihiri ngi Bumbulvuŋ. A sipi gi gwat mukuyta wãˀ ngi sukwi ngi mizli, Bumbulvuŋ muɓula taŋ, ɓa a pulaka li da Israyeley na.

³Li miɗingir ɗingir ngi mikulihey, cine naŋ Ezekiyas muwaha taŋ zleˀe na, a ndira hiri taŋhay a muŋ. A ɗiyi li gi mikulihey da Baˀalay, a ɗiyi kuli ɓamtalay. A huruk huruk a mbuŋ gwat mipal ngi muŋhoy, a ga taŋ mezegwel.

⁴A ɗiyi li gi mikulihey ar hay ngi Bumbulvuŋ. Bumbulvuŋ a ɓi le zleˀe vur hay nah na: «A Zeruzaleme, i sa ndir anga ngi caˀa.»

⁵A ndir li gi mikuli da gwat mipal ngi muŋhoy a wazlarayay mucuw misi ar ngi hay Bumbulvuŋ.

⁶Naŋ vuna ti haŋ naŋ, a zluma ziri naŋhaya ngi mikuli ar hurjijiŋ a Hinom. A gi slra ti ɓi ngi pura jubuɗ, ɓi ngi cucuk, ɓi ngi mijuwri waɗ ɓi ngi njol. A gi malambaˀ ti gidaŋ ti gidaŋ a mbuŋ Bumbulvuŋ ngi jaŋ mevel.

⁷A ciɗ kuli, a ɗuva taˀ ar hay ngi Buymisemuŋ. Buymisemuŋ a ɓa Davit ati mangal naŋ Salomoŋ le ani ngbaŋ: «Hay hana, yo Zeruzaleme, i wuna a wuzla walahay ngi si ruwuy Zudahay gar na, ɓa i sa ndir anga ngi sete.

⁸Yo ma na, y'anta sa ɓula Israyeleye kileŋ avu hirwuy, ya muvula da dideˀ taŋhay na mata. Amma so na, ɓimuɗuvahay, Moyis miɓa taŋ di cek, ɓimujuwahay cek, ɓi micica ati ɓi ya mujuwa a mevel ngi gi gar na, sey da ara gam taŋ slra far.»

⁹Manase a ziza mizli Zudahay ati Zeruzalemeye, mbak a gam malambaˀ, fineˀ sukwi Bumbulvuŋ mingizla taŋ, ɓa a pulaka li da Israyeley na.

¹⁰Bumbulvuŋ a ɓa Manase ati mizli naŋhaya, amma ko a jam lesl ta.

¹¹Bumbulvuŋ a ga, joˀ soje ngi buy Asirihey a soko nga kiɗa vu ati taŋ: a jaka Manase, a cakaŋ kunayeley a balama, a juwakaŋ ti celelu ngi ɓiri gaza, vah vah hiri cuw, a ram di nga Babiloŋ.

¹²Ti naŋ misi ar bonoy na, a tumbulo Bumbulvuŋ Buymisemuŋ naŋ, a hin hirnga kuy kuy wãˀ a mbuŋ Buymisemuŋ ngi dideˀ naŋhaya.

¹³Dar a tumbuloŋ. Bumbulvuŋ a pulaŋ vu, a cinaŋ tumbul naŋ, dar a mi di nga Zeruzalem a muŋ, ɓa a zumabuy naŋ. Akẽh so na, Manase a si na le muduba, Bumbulvuŋ i Buymisemuŋ.

¹⁴A dirba nah na, Manase a ndir mohol migila haɗi, gun gun hirnga ngi walahay ngi Davite, tisi pas ngi pastaˀ ngi miviɗiviɗi ngi Gihoŋ, a sipa sozo ngi Sedroŋ silaɓɓa, ara guno di a Ofel, a ndil di sesẽŋ a mizlingre kilifey. Ar walahay Zuda muguno ti moholoy gar na, Manase a cifi madiɗa ngi sojehey.

¹⁵Manase a bi ti kulihey ati gwat miciɗahay tuwa tir hay ngi Bumbulvuŋ avra. A waha li gi mikulihey naŋ mindira taŋ a muwã ngi hay ngi Bumbulvuŋ waɗ a Zeruzaleme, ara zliɗa taŋ nga duba gala.

¹⁶A ndira li gi mikuli ngi Bumbulvuŋ hiri naŋ a muŋ. Joˀ a gi mikuli ngi ngiɓiˀay waɗ ngi hunuma Buymisemuŋ angaŋ. A ɓa Zudahaya ɓa a huruk hurukam a mbuŋ Bumbulvuŋ Buymisemuŋ ngi Israyel.

¹⁷Mizli ara gam mikuli ar li miɗingir ɗingirey vuna aruŋ ngbaŋ, amma a gaka ti slimiɗ ngi Bumbulvuŋ Buymisemuŋ taŋ ɓula.

¹⁸Is ngi slra ngi Manase miga taŋ, diradibiɗ da Buymisemuŋ, waɗ mingiɓi ngi mizli mupuroy maɓakaŋ taŋ ti slimiɗ ngi Bumbulvuŋ Buymisemuŋ ngi Israyel na, t'ada angi ɗerewol ngi slra ngi buy madiɗa ngi Israyeley.

¹⁹Dira dibiɗ naŋ, yo Buymisemuŋ micinaŋ di, ɓi ngi mungra naŋhay gar ati gi teŋteŋ naŋ ta gar ti naŋ mihin hirnga zleˀe t'aruŋ, waɗ lihey naŋ mindir li miɗingir ɗingirey ngi gi mikuli ar taŋ, naŋ mingi kuli ɓamtalay ati gwat miciɗa ti ciɗey gar na, i mutoho taŋ le ar Slra ngi Hozay.

²⁰Manase mumuc na, a dikakaŋ a hay naŋ. Mangal naŋ Amoŋ a zum buy ar li naŋ.

²¹Amoŋ micifi buy madiɗa na, naɓa naŋ ti vi kukur cuw nga cuw, a zum buy a Zeruzaleme vi cuw.

²²A gi gwat malambaˀ a mihiri ngi Bumbulvuŋ, kaɓa cine naŋ Manase. Amoŋ a gi mikuli, yo a huruk huruk a mbuŋ kulihey, cine naŋ miciɗa taŋ na ceke.

²³Amma naŋ a hin hirnga a mbuŋ Bumbulvuŋ kaɓa cine naŋ Manase mihin na ta. Amoŋ a gi mungra fineˀ ngi cine ma jaka.

²⁴Gawla naŋhay a gam gidiɓi a hirnga naŋ, a kiɗaka vagay a hay naŋ tehhe a muŋ.

²⁵Amma mizli Zudahay a kiɗaka mizli migam gidiɓi ar buy Amoŋ tuwa vagay vagay cek. Dar a cam mangal naŋ Zoziyas ar li naŋ.