Read South Giziga 2CH 34 Bible Online

2CH 34 - South Giziga bible

2CH 34

¹Zoziyas micifi buy madiɗa na, naɓa naŋ ti vi dangafaɗa, a zum buyo vi kukur makir ngaŋ kaˀ a Zeruzaleme.

²A gi gwat mikaslsla a mihiri ngi Bumbulvuŋ. A sipi di i sar ngi dideˀ naŋ Daviti, ko a ngizli avu gwat ngi gi naŋ neˀ le ta.

³Ar vi midangafaɗ naŋ ar buyo na, a zla sipa Buymisemuŋ ngi dideˀ naŋ Davite, naɓa i zuŋ aruŋ. Angi vi mukuruˀ nga cuw naŋ ar buyo ma na, a zla zuɓa dili ngi Zudahay ati ngi Zeruzalemey avra: a waha li miɗingir ɗingir ngi gi mikuliheye, kuli ɓamtalay waɗ kuli miciɗa ti ciɗey malla mipa ti piheye.

⁴A wahaka li gi mikuli da Baˀalaya daˀ a mihiri naŋ, a waha li wura urdihey misi a hirnga li gi mikuliheye, a ngila kuli ɓamtalay waɗ kuli miciɗa ti ciɗey malla mipa ti piheye, a musukuɗo taŋ burkuɗ burkuɗ, a zliɗa taŋ kwiɗ kwiɗ ng'ar zivi ngi mizli migaka taŋ mikuli zleˀe vuna,

⁵a wura tesl ngi masay da kuli tayna ar li ngi mikuli taŋhay vuna. Zoziyas muzuɓa dili ngi si ruwuy Zuda ati Zeruzaleme kahana.

⁶Dar aru ng'ar walahay Manase, Efrayim, Simeyoŋ, nga Neftali waɗ ng'ar walahay midigwi taŋhay.

⁷A waha li gi mikuliheye, a buko kuli ɓamtalay waɗ kuli miciɗa ti ciɗeye, musukuɗ musukuɗ burkuɗ, a waha li wura urdihey misi asi ruwuy Israyele gar. Dar a mi nga Zeruzalem a muŋ.

⁸Oziyasa, angi vi mukuruˀ nga dangafaɗ naŋ ar buyo, a dirba naŋ muzuɓa dili ngi si ruwuyo waɗ ngir hay ngi Buymisemuŋ na, a slina Safaŋ mangal ngi Asaliya ati Maˀaseya, buy miwi walahay waɗ Yoˀa, mangal ngi Zoˀakas, i mijiviɗ ngi buy vuna, a ɓa taŋ ɓa ara ɗiyaka hiri ngi hay ngi Bumbulvuŋ Buymisemuŋ naŋ.

⁹Taŋ ara lumaka masay Hilkiya, madiɗa, a rakaŋ ti dala musoko di ng'ar hay ngi Buymisemuŋ, mizli levi mijigina mizlingrehey micikilaka avu mizli Manasehey, Efrayimey waɗ avu Israyeley gar, avu mizli Zuda ati Benjameŋhey gar waɗ avu mizli Zeruzalemey muvulaka ng'ar hay ngi Buymisemuŋ.

¹⁰Dar a vulaka asi haŋ ngi mizli migi slrahay, misi taŋ i buyɓi ngi hay ngi Bumbulvuŋ. Migi slra ngir hay ngi Bumbulvuŋhoy tuwa, a ɗiyam di hiri ngi hay ngi Buymisemuŋ.

¹¹Naŋ kine, a vulaka dala tuwa da mujuwa marjahay ati mindira hayay, ɓa a hiɗikam di ɗugur miciɗahay waɗ dum ngi viŋhey, ngi jaha hayay, buy Zudahay mupulaka taŋ mbak a hiryam na.

¹²Mizli ara gaka slra taŋ ti mevel mezle, levi, buy ngi slraˀahaya, i ti: Yahat ati Obadiya angi muy ngi Merarihey waɗ Zakari ati Mesulam angi muy ngi Kehatay. Levi mekelemey cek misinaka kiɗa gwat ngi dunguroy na,

¹³a wam nga taŋ i mijijira gwatay waɗ migi slra ko wanahayka gar. Levi mekelemeye, slra taŋ i toho gwat, buy ɓihey malla jigina mizlingrehey.

¹⁴Ti taŋ mahilaka dala mipaka ar hay ngi Bumbulvuŋ na, masay Hilkiya, a luuma ɗerewol ɓimujuwa ngi Bumbulvuŋ muvula da Moyis zleˀe.

¹⁵Dar Hilkiya a ɓa Safaŋ, mbur mutoho gwata: «I luuma ɗerewol ɓimujuwa le ar hay ngi Bumbulvuŋ.» Hilkiya a vula ɗerewol tuwa da Safaŋ.

¹⁶Safaŋ aru di da buy, a sipaŋ ɓi, a ɓaŋ: «Slraka mupula asi haŋ ngi gawla ɗikey na gar, ara gakaŋ.

¹⁷Dala taŋ mulumaka ar hay Bumbulvuŋ na, a hilaka le gar, a vulaka le da buyɓi ngi slrahay waɗ da migi slraˀahaya.»

¹⁸A dirba nah, Safaŋ mbur mutoho gwat tuwa, a ɓa buyo. «masay Hilkiya, a vuliy ɗerewol ani.» Dar Safaŋ tuwa, a slufa a mbuŋ buyo.

¹⁹Buy tuwa micina ɓi ngir ɗerewol ɓimujuwa cin cin na, a ngira zana ngi vu vuhoyo.

²⁰Akẽh na, a zila ti Hilkiya, Ahikam, mangal ngi safaŋ, Abdoŋ mangal ngi Mika, Safaŋ mbur mutoho gwat waɗ Asaya, gawla nga naŋ buyo, a ɓa taŋ na:

²¹«Ɓi ngi ɗerewol mulumoko di hana na, ara cufuɗaka Bumbulvuŋ aseˀe vur ya, vur is ngi Israyel ati Zudahaya. Asi mingiɓi hana i ɓi madiɗa, Bumbulvuŋ a zuɓ himaˀ le fõh fõh ar ndra, asi dideˀ ndrahay a jaka ɓi nga naŋ Bumbulvuŋ a hirnga ta, yo a gaka gwata kaɓa mutohoko cek ar ɗerewol hana na ta.»

²²Hilkiya ati mizli buy muwuna taŋ tuwa, a ram ng'avu Hulda, ngwas mijiviɗe. Hulda i ngwas ngi Salum, mbur mijigina zana ngi mezegweley ar hay ngi Buymisemuŋ, i mangal ngi Tokehat, yo i dideˀ meciɗek ngi Hasra. Hulda, naŋ a slala nawayaŋ a Zeruzalem. Mizli a ɓakaŋ ɓi ngi buyo, a kiɗ mi na,

²³joˀ Hulda a ɓa taŋ: «Bumbulvuŋ Buymisemuŋ ngi Israyel a ɓi na: ara ɓaka mbur mislino kum ng'avi ya vuna ani:

²⁴Bumbulvuŋ a ɓi na: I wuɗ i go mendere ng'ar li hana waɗ ng'ar mizli ngi raˀahaya. Nis mutoho gar ar ɗerewol muslufaka a mbuŋ buy Zuda na gar na, i ga gar muduba.

²⁵Asi a pulikiy le fuku, yo a wuram urdihey le da kulihey, hã gwat ngi gi taŋ gar na, a slikiɗiy mevel. Vurˀe, i zuɓ himaˀ le fõh fõh ng'ar li hana, himaˀ ɗu anta muc mata.

²⁶Amma buy Zuda mislino kum nga cufuɗiy na, kisa ɓakaŋ na: Bumbulvuŋ Buymisemuŋ ngi Israyel a ɓi ani: Ki cine mingiɓi ngir ɗerewol hana le kuy kuy,

²⁷ka micina mingiɓi ya miɓa vur li hana waɗ vur mizli ngi raˀahaya cin cin na, a wusuw mevele le, hã ki hin hirnga le a mbuŋ ɗu, ya Bumbulvuŋ. Ani ki hin hirnga le a mbuŋ ɗu, ki ngira zana ɗik ngi vu vuhoyo, hã ki tuwuy a mbuŋ ɗu. Naŋ kuy, ya kwana i cinuw di le, i mingiɓi ɗu, ya Bumbulvuŋ.

²⁸Ani i wuɗ i sa ga ɓa kisa mucu, kisa muc ti zuy. Bonoy ya mawuɗ i ga da li hana waɗ da mizli ngi raˀahay na, ko k'anta sa pura ta.» Dar misliney ara mbiɗaka ɓi nah da buyo.

²⁹Buy a slin ng'avi mizli micawwa ngi Zuda ati ngi Zeruzalemey gar ɓa a cikilam.

³⁰A dirba nah, a ram ng'ar hay ngi Bumbulvuŋ, gar taŋ ati mizli Zudahay, ngi Zeruzalemey, masayay, levihey waɗ mizli gar, zle avu ziri hã avu mizli madiɗahay. Ɗerewol ngi jumoˀay, mulumoko di ar hay ngi Bumbulvuŋ tuwa, a slufaka taŋ di cek ti gidaŋ.

³¹Buy a slikiɗ deŋ ar li naŋ misi anga, a mahiri ngi jumoˀay naŋ ati Bumbulvuŋ, i jumoˀay matika ˀay da mbur ɓa a sipa Bumbulvuŋ, ɓimuɗuva naŋhay, gwat naŋ naŋ mawuɗ, waɗ ɓimujuwa naŋhay gar na, ɓa a ja taŋ a hirnga ti mevel pal wãˀ, waɗ ti membezleŋ ngi vu wãˀ, ɓa a gam slra ti mingiɓi ngi jumoˀay mutoho ar ɗerewol hana.

³²Buy a ɓa mizli ngi Zeruzalemeye gar waɗ ngi Benjameŋheye ɓa a ɓam sey a gaka kanah. Dar mizli Zeruzalemey a gaka gwata kaɓa jumoˀay taŋ ati Buymisemuŋ ngi dideˀ taŋhaya.

³³Akẽh na, Zoziyas a susuyumo gi gwat malambaˀ mukuyta wãˀ ngi si ruwuy Israyele gar, yo a tikaˀay da mizli ngi si ruwuy Israyel gar, ɓa a huruk hurukam a mbuŋ Bumbulvuŋ Buymisemuŋ taŋ. Angi hin ngi siifa ngi Zoziyasa gar na, ko Israyeley a mbiɗam duba avu Bumbulvuŋ Buymisemuŋ ngi dideˀ taŋhaya ta.