Read South Giziga 2CH 35 Bible Online

2CH 35 - South Giziga bible

2CH 35

¹Zoziyas a ga muguzlum Pak ngi Bumbulvuŋ a Zeruzalem, a kiɗaka ginew ngi muguzlumoyo ar hin mukuruˀ nga mufaɗ ngi kiya mudumbuŋ.

²Zoziyas a vula gidaŋ da masayay ar slra taŋ, ɓa a gam slra ar hay Bumbulvuŋ.

³Levi misi slra taŋ i dubuna gwat da Israyeley gar, yo mizli muvuku vu taŋ ngi slra ngi Bumbulvuŋ na, a ɓa taŋ: «Caka akoti ng'ar hay ngi Buymisemuŋ, Salomoŋ buy Israyel, mangal ngi Davit mindira na, anta ngi sa jijir ti jijir ar gagalaˀay kumoy mata. Wurenna, gam slra ngi Bumbulvuŋ Buymisemuŋ kum, waɗ ngi Israyel, mizli naŋhay.

⁴Wuɗukam vur muy ngi wazlaray kumoy ngi wazlaray kumoyo, yo vur hunum kum ngi gi slra ngi gi slra, kaɓa mutohoko ɓi nah angi ɗerewol ngi Davit, buy Israyel waɗ ar ngi mangal naŋ Salomoŋ.

⁵Cicam ar hay ngi Bumbulvuŋ vur muy vur muy ngi wazlaray ngi sukum kumoy, ziri ngi mizli, yo kaɓa levihey muwunkam vur hunum taŋ vur hunum taŋ, vur wazlaray taŋhay vur wazlaray taŋhaya.

⁶Gaka Paka, tiram pal, yo cicam zlak ngi jina sukum kumoyo, ɓa ki gam slra ti mingiɓi Bumbulvuŋ muvulo di ti si haŋ Moyis na.»

⁷Zoziyas a hil ziri tumuŋhoy ati ziri ˀaw nga naŋhay durmuk kukur makir, a vula da Israyeley misi akẽh ngi gi muguzlum Paka, waɗ slahay durmuk makir mubo tir zlili ngi buyoyo ma.

⁸Mizli hirnga nga naŋhay vuna kwana, a vulam gineweye ti gula ti hazum da mizli, da masayay waɗ da leviheye. Hilkiya, Zakari ati Yehiyel, buyɓi ngi hay ngi Buymisemuŋhoyo, a vulam ziri tumuŋhoy durmuk cuw ti skat skat merkeɗ da masayay, ɓa a gam di mikuli ngi Paka, yo a vulam slahay skat skat makir ma.

⁹Konaniya ati sukum naŋhay, ti Semeya ati Netaneyel, Hasabiya, Yehiyel waɗ Yosabat, buy ngi leviheye, a vulam ziri tumuŋhoy durmuk zlum waɗ slahay skat skat zlum da leviheye, ɓa ngi gi mikuli ngi Paka.

¹⁰A ɗiyaka ɓi ngi ru ti slra ani: masayay a cicam ar li taŋ, levihey kwana ti hunum taŋ, kaɓa buy miɓa taŋ di ɗaˀ le zleˀe.

¹¹A slaka ˀay ngi ginew ngi mikuli ngi Pakaya, a vulaka pumbus taŋhaya da masayay, joˀ taŋ a paka ar li gi mikuli. Leviheye kwana, slra taŋ i suwuta gwatay.

¹²Taŋ mira vulaka mi nga taŋ da mizli, kaɓa avu wuɗuk taŋ vur muy vur muy ngi wazlaray taŋhaya na, mi ngi Bumbulvuŋ mavulakaŋ di, mikuli mizlam zlam wãˀ na kwana, a paka nah sek murvay, kaɓa mutohoko ɓi nah ar ɗerewol ngi Moyis. A gam ti slahayakanah ma.

¹³A fukoko zuŋ tumuŋ ngi mikuli ngi Paka ti fuku, kaɓa sipi jiviɗ naŋ, amma gwat ngi zum mekelemeye, a da ka taŋ ti di ar misirgaɗay, ar digiɗimey malla ar taasahay, a wusam vu ngi wunuk naŋ da mizli Israyeley gar.

¹⁴A dirba nah, levihey a da ka ngi masayay ati nga taŋ vuna. Asi mike na, masayay, dideˀ ngi Aroŋhoyo, a roko welele zleˀe ar li gi mikuli mizlam zlamay waɗ ar li zluma mungul ngi mikuli mekelemeye, hã duvuɗu, madaka ɗafa i levihey na vurˀe.

¹⁵Dideˀ ngi Asafay, mizli dimiseye, t'ada ar li taŋ, kaɓa mudubunaka taŋ ɓi nah, mudubunaka taŋ di i ti: Davit, Asaf, Heman waɗ Yedutuŋ, mbur mavul kuti da buy. Mijigina mizlingreheye kwana, t'ada a mizlingreheye tiɗeˀe. Tˀanta pulaka slra taŋ mbak le ta, asi levi sukum taŋhaya, ara da ka taŋ ɗafa.

¹⁶A ɗiyaka ɓi ngi ru ti slra ngi Bumbulvuŋ gar tapasa, ɓa a gaka muguzlum Paka, yo ɓa a gaka mikuli ngi zlum ti zlumoyo ar li gi mikuli ngi Bumbulvuŋ, kaɓa buy Zoziyas miɓa taŋ ɓi nah.

¹⁷Naŋ kine, Israyeley misi akẽh, a gaka muguzlum Paka tapasa, yo a gaka muguzlum ngi ɗaf manja ˀis a ra, hã hin tarnaˀ.

¹⁸Diga avu hin ngi mijiviɗ Samuyel na, a gam muguzlum Pak ɗaˀ kanah ta, yo ko buy Israyel purla migi muguzlum Pak ɗaˀ ka ngi Zoziyas na, anta. Muguzlum, buy miga ati masayay, levihey, mizli Zudahay gar ati Israyeley misi akẽh, waɗ mizli Zeruzalemey.

¹⁹Muguzlum Pak nah na, a gaka ar vi mukuruˀ nga dangafaɗ naŋ ngi Zoziyas ar buyo.

²⁰A dirba buy Zoziyas mikiɗa mi ngi ɗiya hiri ngi hay ngi Buymisemuŋ na, Neko, buy madiɗa ngi Ezipte, aru nga kiɗa vu a Karkemis, a ciki mizaw Efrat, joˀ Zoziyas aru nga zlir di dibiɗi.

²¹Neko a slin mizli ɓa ara ɓaka Zoziyasa: «Buy Zuda, mizlira ndra ati ka i mike? Ya mibi dana nga kiɗa vu na, ati ka ta, amma ati mesene ɗu misi zlezle. Buymisemuŋ a ɓiy ɓa i wus vu. Buymisemuŋ misi ati ya na, ki gaŋ gwat ngi ji mevel ta, da kine na, naɓa a sa kiɗuw vagay.»

²²Gar ti nah kwana, ko Zoziyas a ngum mbiɗa wuluko ta, asi ara sipi jiviɗ ngi jigina mi, ɓa a kiɗam vu ati naŋ vuna zleˀe si. A ngum cine mi ngi Neko ta, i mingiɓi muso ti vu Buymisemuŋ ngbaŋ, ara zliram kiɗa vu ar li micay ngi Megido.

²³Misi luvutoy a mulaka buy Zoziyasa, a ɓa gawla naŋhaya: «Zuɓikiy, a gikiy waˀa le haɗi wãˀ.»

²⁴Gawla naŋhay, a zuɓakaŋ tir mota ngi vurum naŋ, aka ka ng'ar mota mekelem ngi vurumo, a ram di nga Zeruzalem. A muc, a dikaka ar zivi ngi dideˀ naŋhay a diga. Dar Zudahay ati Zeruzalemey gar, a tuwaka Zoziyasa.

²⁵Mijiviɗ Zeremi a zli dimis ngi tuwa Zoziyasa. Zil ati ngwas mizli dimisey gar na, ara zilaka slimiɗ ngi Zoziyasa ar dimise hã dana. A tiri ɓi ngi sirik asi ruwuy Israyele, waɗ a caka dimis tayna nga wuzla dimis ngi tuwa vuhoy.

²⁶Is ngi slra ngi Zoziyas miga taŋ ati naŋ mibiga sipa jiviɗ ngi Buymisemuŋ, kasl kasl kaɓa mutohoko ar ɓimujuwa ngi Bumbulvuŋ,

²⁷slra naŋhay, zle avu zli virzi naŋ hã avu kiɗa mi naŋ na, i mutoho taŋ le ar ɗerewol ngi buy madiɗa ngi Israyeley ati ngi Zudahaya.