Read South Giziga 2CH 36 Bible Online

2CH 36 - South Giziga bible

2CH 36

¹Mizli ngi si ruwuyo, a zuɓaka Zoˀakas, mangal ngi Zoziyasa, a pakaŋ mal ngi vula slra, a cakaŋ buy ar li ngi cine.

²Ti Zoˀakas micifi buy madiɗa na, naɓa naŋ ti vi kukur cuw nga makir, a zum buy a Zeruzaleme kiya makir.

³Neko buy Ezipte, a bi di tir buy avra, a Zeruzaleme, a tikaˀay da mizli ngi si ruwuyoyo, ɓa sey a wurkakaŋ buutu, ɓiri bara kilo durmuk makir waɗ ɓiri tapasl tapasl kilo kukur makir.

⁴Dar buy Ezipte tuwa, a cifa sukum naŋ Eliyakim i buy Zuda ati Zeruzaleme, a mbiɗaŋ slimiɗe Zoˀakim. A zuɓa sukum naŋ Zoˀakas tuwa, aru di nga Ezipte.

⁵Zoˀakim micifi buy madiɗa, naɓa naŋ ti vi kukur cuw nga zlum, a zum buy a Zeruzaleme vi kuruˀ ngaŋ kaˀa. A gi gwat malambaˀ a mihiri ngi Bumbulvuŋ Buymisemuŋ naŋ ta.

⁶Nabukodonozor, buy madiɗa ngi Babiloŋ, a bi vurum nga kiɗa vu ati naŋ. A juwa Zoˀakime ti celelu ngi ɓiri gaza, vah vah makaw cuw, aru di nga Babiloŋ.

⁷Nabukodonozor tuwa, a hil gwatay ti sukwi wal wal haɗa ar hay ngi Bumbulvuŋ, dar ara pa taŋ ar hay nga naŋ buy, a Babiloŋ.

⁸Is ngi slra ngi Zoˀakime, gwat malambaˀhay muwãˀ naŋ miga taŋ ati gwat misa gi ava gar na, i mutoho taŋ le ar ɗerewol ngi buy madiɗa ngi Israyeley ati ngi Zudahaya. Mangal naŋ Zoˀakiŋ a zum buy ar li naŋ.

⁹Zoˀakiŋ micifi buy madiɗa na, naɓa naŋ ti vi dangafaɗa, a zum buy a Zeruzaleme, kiya makir ti hin kuruˀu. A gi gwat malambaˀ a mihiri ngi Bumbulvuŋ.

¹⁰Ar zli virzi ngi mohor na, Nabukodonozor a slino mizli ɓa a jaka Zoˀakiŋ, ɓa a ram di nga Babiloŋ waɗ gwat mupuɗaw puɗaway ngir hay ngi Bumbulvuŋ, dar a cifi buy Zuda ati Zeruzalem, i sukum naŋ Sedesiyas.

¹¹Sedesiyas micifi buy madiɗa na, naɓa naŋ ti vi kukur cuw ngaŋ kaˀ, a zum buy a Zeruzaleme vi kuruˀ ngaŋ kaˀa.

¹²A gi gwat malambaˀ a mihiri ngi Bumbulvuŋ Buymisemuŋ naŋ. Mijiviɗ Zeremi maɓaŋ kaɓa Bumbulvuŋ miɓaŋ di na, naŋ anta ngum hina hirnga a mbuŋ naŋ ta.

¹³Nabukodonozor muhudumoŋ ti slimiɗ ngi Bumbulvuŋ tuwa ma na, a sli himaˀ, hirnga gidaŋ, mbak mo ng'avu Bumbulvuŋ Buymisemuŋ ngi Israyele jak ma.

¹⁴Yo ma na, buy ngi masayay ati buy ngi mizli, ara ziriɗaka mi ngi Buymisemuŋ ti gidaŋ, a gam gwat malambaˀ muwãˀ ngi sukwi mekelemey magakaŋ, a hiryaka hay ngi Bumbulvuŋ mitiri di nga naŋ a Zeruzaleme.

¹⁵Bumbulvuŋ Buymisemuŋ ngi dideˀ taŋhaya, a slino taŋ mizli, ɓa aka ka taŋ mumuyuŋ ngi zay sla a slimiɗe, asi mizli naŋhay waɗ hay nga naŋ vuna, ara gakaŋ ircece.

¹⁶Amma Israyeley tuwa, a singiram ar mislin ngi Buymisemuŋhoyo, a hirsaka mingiɓi naŋ, yo a singiram ar mijiviɗ naŋhaya. Dar Buymisemuŋ a zuɓ himaˀ ar taŋ fõh fõh, a tik mata.

¹⁷Buymisemuŋ a pa mi da buy ngi Babiloŋhoy, a tiɓa hirwuyo wãˀ, a kiɗa gawla taŋhay hã ar hay ngi Buymisemuŋ, ko a pur ircece da gawlahay ta, da diilihey ta, da mizli madiɗahay ta, da midigilahay ta.

¹⁸A hila gwat ngir hay ngi Buymisemuŋhoyo cek, gwat madiɗahay ati memeɗehey, zlili ngir ngi hay Buymisemuŋ, zlili ngi buy, ngi gawla naŋhay, a cuh taŋ cek nga Babiloŋ.

¹⁹Dar Babiloŋhoy a wuraka hay ngi Buymisemuŋ, a wahaka mohol ngi Zeruzaleme, a wuraka hay ngi buyoyo, yo a hiryaka gwat mupuɗaw puɗaway ngir walahaya cek.

²⁰Mizli mindiram ti siifa na, a ja taŋ cek nga Babiloŋ, a tiri taŋ beke naŋhay, yo ngi ziri naŋhay, hã a ndila zumabuy ngi Persehey.

²¹Mingiɓi ngi Bumbulvuŋ mubo ti balam Zeremi na, a gi le muduba: «Asa pulaka hirwuyo mbak ngi vi kukur tarnaˀ, hã hin ngi sabat naŋhay mikiɗam mi le, ɓa ngi wurka hin ngi sabatay, mija taŋ a hirnga zleˀe ta na.»

²²Ar vi mudumbuŋ ngi Sirus, buy madiɗa ngi Perse mazum buy a Babiloŋ na, Bumbulvuŋ a juwa le ɓa a ga gwat naŋ mubo di ti balam Zeremi zleˀe tuwa muduba. Bumbulvuŋ a wuna lesl ngi Sirus, buy Perse, ɓa asi ruwuy naŋ mazum buy anga gar na, a til di mi ti til malla toh toh ti tuh:

²³«Sirus, buy Perse a ɓi na: zumabuy ngi si ruwuyoy gar na, Bumbulvuŋ, Buymuŋ, a vuliy taŋ le, yo naŋ vuna ti haŋ naŋ, a puliy jiviɗ le ɓa i ndiraŋ hay a Zeruzalem, walahay Zuda. Mbur a wuzla kumo muso ti wuzla mizli naŋhay ti wuzla mizli naŋhay gar na, i mizilahay le ɓa a mam nga Zeruzalem. Anja Bumbulvuŋ Buymisemuŋ taŋ a ndir ati taŋ!»